ఐటీ ఉద్యోగులకు మళ్లీ నిరాశే.. మరో 5 నెలలు ఎదురు చూడాల్సిందే!

ప్రముఖ అంతర్జాతీయ ఐటీ కన్సల్టింగ్ అండ్ అవుట్‌సోర్సింగ్ కంపెనీ కాగ్నిజెంట్ షాకింగ్ ప్రకటన చేసింది. వేతనాల పెంపును మరోసారి వాయిదా వేసింది. వార్షిక వేతనాల పెంపును ఈ ఏడాది కూడా ఆగస్టులోనే అమలు చేయనున్నట్లు సంస్థ ఇటీవల ప్రకటించింది. కనీసం 5 నెలలు వాయిదా వేసిందన్నమాట. ఈ నాస్‌డాక్ లిస్టెడ్ కంపెనీ వేతనాల పెంపును ఇలా వరుసగా రెండో ఏడాది కూడా వాయిదా వేయడం ఆందోళన కలిగిస్తోంది. ఇటీవలే రెనోవేట్ చేసిన కోల్‌కతా ఆఫీస్ టౌన్ హాల్‌లో గురువారం రోజు కాగ్నిజెంట్ చీఫ్ ఎగ్జిక్యూటివ్ ఆఫీసర్ ఎస్. రవి కుమార్ ఈ ప్రకటన చేశారు. అయితే వేతనాల పెంపును వాయిదా వేసినప్పటికీ.. పెర్ఫామెన్స్ బోనస్ మాత్రం మార్చిలోనే ఉంటుందని స్పష్టం చేశారు.

'కాగ్నిజెంట్ మార్చిలోనే బోనస్ అందిస్తుంది. అసోసియేట్స్ అందరూ బోనస్‌కు సంబంధించి ఇ- లెటర్స్ మార్చి 10లోపు అందుకుంటారు." అని కాగ్నిజెంట్ ఉద్యోగులకు ఇంటర్నల్‌గా సమాచారం అందించింది. ఇదే సమయంలో బోనస్‌లకు సంబంధించి టీమ్ సభ్యులతో మార్చి 11లోగా సమాచారం అందించాలని.. స్పష్టం చేసింది.

సాధారణంగా కాగ్నిజెంట్ సంస్థ ప్రతి సంవత్సరమూ మార్చి సమయంలోనే బోనస్ సహా వేతనాల పెంపు అమలు చేస్తుంటుంది. అయితే కంపెనీ సీఈఓగా ఎస్. రవి కుమార్ బాధ్యతలు చేపట్టినప్పటి నుంచి.. బోనస్ మార్చి నెలలోనే ఇస్తుండగా.. మరోవైపు హైక్స్ మాత్రం ఆగస్టులో ఇస్తోంది. కిందటేడాది ఆగస్టులో కేవలం 1 నుంచి 5 శాతం మధ్యే వేతనాల పెంపు అమలు చేస్తోంది. ఆగస్టులో వేతనాల పెంపు గురించి చాలా ముందే సమాచారం అందించడం గమనార్హం. ఇది సిబ్బంది వలసల్ని అరికట్టేందుకు ఉపయోగపడుతుందని కంపెనీ భావిస్తోంది.

సిబ్బంది వలసలు కాగ్నిజెంట్‌ను కొంత కాలంగా వేధిస్తున్నాయని చెప్పొచ్చు. 2023లో అట్రిషన్ రేటు 13.8 శాతంగా ఉండగా.. 2024 చివరికి చూస్తే ఇది 15.9 శాతానికి పెరిగింది. అట్రిషన్ అంటే.. కంపెనీనే వీడే ఉద్యోగుల సంఖ్యను సూచిస్తుంది. 2024 డిసెంబర్ చివరినాటికి కాగ్నిజెంట్ అట్రిషన్ రేటు.. దీని ప్రత్యర్థులు.. భారత దిగ్గజ ఐటీ కంపెనీలైన టాటా కన్సల్టెన్సీ సర్వీసెస్ (TCS), ఇన్ఫోసిస్, హెచ్‌సీఎల్ టెక్నాలజీస్ వంటి వాటి కంటే ఎక్కువగా ఉండటం గమనార్హం. వీటిల్లో వరుసగా 13, 13.7, 13.2 శాతంగా అట్రిషన్ రేటు ఉంది. అయితే రవి కుమార్ బాధ్యతలు చేపట్టిన తర్వాతి నుంచి కంపెనీ దశ మారిపోయిందని చెప్పొచ్చు. 2023లో ఆదాయం తగ్గగా.. 2024లో మాత్రం 1.98 శాతం పెరిగి 19.74 బిలియన్ డాలర్లుగా నమోదైంది.