బిల్ గేట్స్‌తో చంద్రబాబు భేటీ, ,,,,ఐటీ నుంచి ఏఐ వైపు చర్చ

ఢిల్లీ పర్యటనలో ఉన్న ఏపీ ముఖ్యమంత్రి నారా చంద్రబాబు నాయుడు మైక్రోసాఫ్ట్ వ్యవస్థాపకుడు బిల్‌ గేట్స్‌తో బుధవారం భేటీ అయ్యారు. సుమారు 40 నిమిషాల పాటు చంద్రబాబు బిల్ గేట్స్ భేటీ జరిగింది. ఈ సందర్భంగా గేట్స్‌ ఫౌండేషన్‌, ఆంధ్రప్రదేశ్ ప్రభుత్వం మధ్య కీలక అంశాలపై చర్చ జరిగినట్లు తెలిసింది. విద్య, ఆరోగ్యం, వ్యవసాయ రంగాల్లో గేట్స్‌ ఫౌండేషన్‌ సహకారాన్ని ఆంధ్రప్రదేశ్ ప్రభుత్వం కోరుకుంటోంది. ఈ నేపథ్యంలో వీటికి సంబంధించిన అంశాలపై గేట్స్ ఫౌండేషన్, ఏపీ ప్రభుత్వం చర్చలు జరిగినట్లు తెలిసింది. మరోవైపు బిల్‌ గేట్స్‌తో సమావేశం వివరాలను ముఖ్యమంత్రి నారా చంద్రబాబు నాయుడు తన అధికారిక ఎక్స్ ఖాతా ద్వారా వెల్లడించారు. బిల్ గేట్స్‌తో సమావేశం అద్భుతంగా జరిగిందంటూ ట్వీట్ చేశారు.

"బిల్ గేట్స్‌తో ఈరోజు అద్భుతమైన సమావేశం జరిగింది. ఆంధ్రప్రదేశ్ ప్రజల అభివృద్ధి, సంక్షేమం కోసం ఆంధ్రప్రదేశ్ ప్రభుత్వం, గేట్స్ ఫౌండేషన్ ఎలా సహకరించుకోవచ్చనే దానిపై చర్చించాం. ఆరోగ్య సంరక్షణ, విద్య, వ్యవసాయం, ఉపాధి కల్పన వంటి కీలక రంగాలలో సేవలను మెరుగుపరచడానికి ఆర్టిఫిషియల్ ఇంటెలిజెన్స్, ప్రిడిక్టివ్ అనలిటిక్స్ వంటి అధునాతన సాంకేతిక పరిజ్ఞానాల వినియోగం గురించి చర్చించాం. స్వర్ణాంధ్రప్రదేశ్- 2047 విజన్ సాకారం చేసుకోవడానికి ఆంధ్రప్రదేశ్ ప్రభుత్వం పూర్తిగా కట్టుబడి ఉంది. గేట్స్ ఫౌండేషన్‌తో ఈ భాగస్వామ్యం.. ఏపీ ప్రజలను శక్తివంతం చేయడంతో పాటుగా ఈ లక్ష్యాన్ని సాధించడంలో కీలక పాత్ర పోషిస్తుందని విశ్వసిస్తున్నాం. ఆంధ్రప్రదేశ్ పురోగతికి బిల్ గేట్స్ తన సమయం, ఆలోచనలు, మద్దతు అందించినందుకు హృదయపూర్వకంగా కృతజ్ఞతలు తెలుపుతున్నా" అంటూ చంద్రబాబు ట్వీట్ చేశారు.

మరోవైపు కృత్రిమ మేధ రంగంలో గేట్స్ ఫౌండేషన్ సహకారం తీసుకోవాలని ఏపీ ప్రభుత్వం భావిస్తోంది. గేట్స్ ఫౌండేషన్‌తో ఒప్పందాల ద్వారా విద్య, ఆరోగ్యం, పరిపాలన, వ్యవసాయం,ఏఐ టెక్నాలజీపై ప్రభుత్వానికి గేట్స్‌ ఫౌండేషన్‌ సహకారం అందించనుంది. అలాగే విద్యార్తుల్లో నైపుణ్యం పెంచేలా, అధునాతన సాంకేతికతలపై అవగాహన కల్పించేలా విద్యారంగంలో గేట్స్ ఫౌండేషన్ ప్రభుత్వానికి సహకరించనుంది. పరిపాలనలో సులువుగా ఉండేందుకు రాష్ట్ర వ్యాప్తంగా డేటా లేక్‌ అభివృద్ధి కోసం సాంకేతిక సహకారం అందించనుంది.