వాకింగ్ లేదా జాగింగ్ వీటిలో బరువు తగ్గడానికి ఏది మంచిది

ప్రస్తుత మారుతున్న జీవనశైలి, పొల్యూషన్, తిండి అలవాట్ల కారణంగా జీవితంలో ఫిట్‌గా, ఆరోగ్యంగా ఉండటం సవాల్‌తో కూడుకుంది. ప్రతి ఒక్కరూ ఆరోగ్యంగా ఉండాలని కోరుకుంటారు. చాలా మంది వ్యాధులకు దూరంగా ఉండాలని అనేక ప్రయత్నాలు చేస్తారు. అయితే, చాలా మంది వ్యాయామంపై దృష్టి పెడుతున్నారు. కానీ, ఏ వ్యాయామం చేస్తే ఆరోగ్యానికి మేలు జరుగుతుందో చాలా మందికి తెలియదు. కొంతమంది వాకింగ్ చేయడం ఆరోగ్యానికి మంచిదని నమ్ముతారు.

మరికొందరు జాగింగ్ చేస్తారు. ఇంకొందరు జిమ్‌లు చుట్టూ తిరుగుతారు. అయితే, చాలా మంది వాకింగ్, జాగింగ్ వంటి వాటికి ఎక్కువ ప్రాధాన్యత ఇస్తారు. వాకింగ్, జాగింగ్ చాలా మంది చేయగలిగే వ్యాయామాలు. ఇవి ఆరోగ్యాన్ని కాపాడుకోవడంలో కీలక పాత్ర పోషిస్తాయి. అయితే, చాలా మందికి బరువు తగ్గడం కోసం వాకింగ్ లేదా జాగింగ్ రెండింటిలో ఏది బెస్ట్ అన్న కన్ఫ్యూజన్ ఉంటుంది. వాకింగ్, జాగింగ్ రెండింటి ప్రయోజనాలు, బరువు తగ్గడానికి ఏది బెస్ట్ అన్న విషయాలపై ఓ లుక్కేద్దాం.

వాకింగ్

ఏ వయసు వారైనా సరే సులభంగా చేయగలిగే వ్యాయామం నడక. వాకింగ్ చేయడం వల్ల శరీరం చురుగ్గా ఉంటుంది. వ్యాయామం చేయాలనుకునేవారు, శరీరాన్ని ఫిట్‌గా ఉంచుకోవాలనుకునేవారికి వాకింగ్ బెస్ట్ ఆప్షన్ అంటున్నారు నిపుణులు. ట్రెడ్ మీల్ ఉంటే ఇంట్లోనే వాకింగ్ చేసుకోవచ్చు. రోజూ ముప్పై నిమిషాలు నడవడం వల్ల 150 నుంచి 200 కేలరీల వరకు బర్న్ అవుతాయి. అంతేకాకుండా నడక వల్ల ఎన్నో ప్రయోజనాలు ఉన్నాయి.

నడకతో ప్రయోజనాలు

* గుండె ఆరోగ్యానికి మేలు చేస్తుంది - క్రమం తప్పకుండా నడవడం వల్ల గుండె ఆరోగ్యంగా ఉంటుంది. ఇది రక్తపోటును నియంత్రించడంలో, కొలెస్ట్రాల్ స్థాయిలను తగ్గించడంలో సహాయపడుతుంది .

* బరువు నియంత్రణ - నడక కేలరీలను బర్న్ చేస్తుంది. ఇది బరువు తగ్గడానికి సాయపడుతుంది. అయితే, ఇది జాగింగ్ కంటే కొంచెం స్లో ప్రాసెస్

* కీళ్లకు సురక్షితం - నడక కీళ్లపై తక్కువ ఒత్తిడిని కలిగిస్తుంది. దీంతో మోకాలి లేదా వెన్ను నొప్పి సమస్యలు ఉన్నవారికి వాకింగ్ బెస్ట్ ఆప్షన్.

* ఒత్తిడి నుంచి రిలీఫ్ - నడక మానసిక ఆరోగ్యానికి ప్రయోజనకరంగా ఉంటుంది. ఇది ఒత్తిడి, ఆందోళనను తగ్గించడంలో సాయపడుతుంది.

జాగింగ్

​జాగింగ్ అనేది నడక కంటే తీవ్రమైన, ప్రభావవంతమైన వ్యాయామం. ఇది వాకింగ్, రన్నింగ్‌కి మధ్యస్థంగా ఉంటుంది. ఎక్కువ కేలరీలు బర్న్ చేయాలనుకునేవారికి, ఫిట్నెస్ మెరుగుపర్చాలనుకునేవారికి ఇది బెస్ట్ అంటున్నారు నిపుణులు. జాగింగ్ వల్ల హృదయ స్పందన రేటు, జీవక్రియ పెరుగుతాయి. 30 నిమిషాలు జాగింగ్ చేయడం వల్ల 300 నుంచి 400 కేలరీలు బర్న్ అవుతాయి. జాగింగ్ వల్ల చాలా ప్రయోజనాలు ఉన్నాయి.

జాగింగ్ వల్ల ప్రయోజనాలు

* ఎక్కువ కేలరీలు బర్న్ అవుతాయి - జాగింగ్ నడక కంటే ఎక్కువ కేలరీలు బర్న్ చేస్తుంది. ఇది బరువు తగ్గడానికి మంచిది.

* గుండె, ఊపిరితిత్తుల సామర్థ్యాన్ని పెంచుతుంది - జాగింగ్ గుండె, ఊపిరితిత్తుల పనితీరును మెరుగుపరుస్తుంది. ఇది శరీరాన్ని ఫ్లెక్సిబుల్‌గా మారుస్తుంది.

* కండరాలను బలపరుస్తుంది - జాగింగ్ కాళ్ళు, కోర్ కండరాలను బలపరుస్తుంది .

* మానసిక ఆరోగ్యానికి ప్రయోజనాలు- జాగింగ్ ఎండార్ఫిన్ హార్మోన్ల స్థాయిని పెంచుతుంది. ఇది మానసిక స్థితిని మెరుగుపరుస్తుంది. ఒత్తిడిని తగ్గిస్తుంది.

ఏది మంచిది? 

నడక, జాగింగ్ రెండూ ఆరోగ్యానికి మేలు చేస్తాయి. కానీ ఏది మంచిది అనేది శారీరక స్థితి , ఆరోగ్య లక్ష్యాలపై ఆధారపడి ఉంటుంది. వాకింగ్ వల్ల ఫలితాలు స్థిరంగా ఉంటాయి. వాకింగ్ వల్ల బరువు తగ్గవచ్చు. రెగ్యులర్‌గా వాకింగ్ చేయడం వల్ల బరువు తగ్గవచ్చు. కానీ దీనికి సమయం పట్టవచ్చు. అయితే, వ్యాయామం స్టార్ట్ చేయాలనుకునేవారికి, కీళ్ల సమస్యలు, కాళ్ల నొప్పులు ఉన్నవారికి వాకింగ్ బెస్ట్ ఆప్షన్. అయితే, ఎక్కువ కేలరీలు బర్న్ చేయాలనుకుంటే జాగింగ్ బెస్ట్ ఆప్షన్. ఏ సమస్యలు లేనివారు జాగింగ్ చేయవచ్చు. జాగింగ్ రెగ్యులర్‌గా చేయడం వల్ల బరువు తగ్గవచ్చు. ఫిట్నెస్ మెరుగుపరుచుకోవాలనుకునేవారికి జాగింగ్ మంచిది కావచ్చు. జాగింగ్ వల్ల తొందరగా అలసిపోతారు. శారీరకంగా బలహీనంగా ఉన్నవారు వాకింగ్‌కి దూరంగా ఉండటమే మేలు.

ఈ విషయాలను గుర్తుంచుకోండి

* జాగింగ్ చేస్తున్నప్పుడు, గాయం ప్రమాదాన్ని తగ్గించడానికి సరైన బూట్లు ధరించండి. అంతేకాకుండా సరైన సాంకేతికతను ఉపయోగించండి. స్మార్ట్ వాచ్ లేదా స్మార్ట్ బ్యాండ్ వాడటం మంచిది.

* మీకు గుండె సమస్యలు ఉంటే, జాగింగ్ ప్రారంభించే ముందు వైద్యుడిని సంప్రదించండి.

* నడక అయినా జాగింగ్ అయినా, రెండు సందర్భాల్లోనూ హైడ్రేటెడ్ గా ఉండటం ముఖ్యం. అందుకే తగినంత నీరు తాగాలని గుర్తించుకోండి.