ట్రెండింగ్
Epaper    English    தமிழ்

ఇరాన్‌కు తీవ్ర హెచ్చరికలు జారీచేసిన ట్రంప్

international |  Suryaa Desk  | Published : Mon, Mar 31, 2025, 09:18 AM

అమెరికా అధ్యక్షుడు డొనాల్డ్ ట్రంప్ ఇరాన్‌కు తీవ్ర హెచ్చరికలు జారీ చేశారు. ఇరాన్ తన అణు కార్యక్రమంపై వాషింగ్టన్‌తో ఒక ఒప్పందానికి రాకుంటే బాంబు దాడులు తప్పవని హెచ్చరించారు. ఎన్బీసీ న్యూస్‌కు ఇచ్చిన టెలిఫోన్ ఇంటర్వ్యూలో ట్రంప్ మాట్లాడుతూ, అమెరికా, ఇరాన్ అధికారులు చర్చలు జరుపుతున్నారని వెల్లడించారు. "ఒకవేళ ఇరాన్ గనుక ఆ ఒప్పందంపై సంతకం చేయకపోతే తీవ్ర పర్యవసానాలు ఎదుర్కోవాల్సి ఉంటుంది. ఇరాన్ పేల్చివేస్తాం. ఒకవేళ వారు ఒప్పందం చేసుకోకుంటే, నేను నాలుగు సంవత్సరాల క్రితం చేసినట్లుగా వారిపై మరోసారి సుంకాలు విధిస్తాను" అని ఆయన పేర్కొన్నారు. ఒప్పందం చేసుకోకుంటే సైనిక పరిణామాలు ఉంటాయని ట్రంప్ చేసిన హెచ్చరికలను టెహ్రాన్ కొట్టిపారేసింది. ఇరాన్ విదేశాంగ మంత్రి అబ్బాస్ అరాక్‌చి తెలిపిన వివరాల ప్రకారం, ట్రంప్ ఒక లేఖ ద్వారా టెహ్రాన్‌ను కొత్త అణు ఒప్పందం చేసుకోవాలని కోరారు. దీనికి ఇరాన్ ప్రతిస్పందనను ఒమన్ ద్వారా పంపింది అని IRNA వార్తా సంస్థ పేర్కొంది. ఇరాన్‌ రహస్యంగా అణు ఆయుధాలను అభివృద్ధి చేసే ఎజెండాను కలిగి ఉందని పశ్చిమ దేశాలు ఎప్పటినుంచో ఆరోపిస్తున్నాయి. యురేనియంను అధిక స్థాయిలో శుద్ధి చేయడం ద్వారా అణు ఆయుధ సామర్థ్యాన్ని పొందేందుకు ప్రయత్నిస్తోందని, ఇది పౌర అణు ఇంధన కార్యక్రమానికి సమర్థనీయం కాదని ఆ దేశాలు చెబుతున్నాయి. అయితే, తమ అణు కార్యక్రమం పూర్తిగా పౌర అవసరాల కోసమేనని టెహ్రాన్ చెబుతోంది.






SURYAA NEWS, synonym with professional journalism, started basically to serve the Telugu language readers. And apart from that we have our own e-portal domains viz,. https://www.suryaa.com/ and https://epaper.suryaa.com