ట్రంప్ దెబ్బకొట్టినా భారీగా దిగొచ్చిన బంగారం ధరలు

బంగారం కొనుగోలు చేసే వారికి ఎట్టకేలకు శుభవార్త అందింది. ఇటీవల అమెరికా అధ్యక్షుడు డొనాల్డ్ ట్రంప్ విధించిన ప్రతీకార సుంకాల నేపథ్యంలో.. ఆర్థిక అనిశ్చితి నెలకొనగా.. బంగారం ధరలు భారీగా పెరిగిన సంగతి తెలిసిందే. సంక్షోభ సమయంలో సురక్షిత పెట్టుబడిగా బంగారాన్ని భావించి.. పెట్టుబడులు పెరగ్గా రేట్లు కూడా ఆల్ టైమ్ గరిష్ట స్థాయిలకు చేరాయి. ఇంటర్నేషనల్ మార్కెట్లో కిందటి రోజు ఉదయం ఒక దశలో స్పాట్ గోల్డ్ రేటు ఔన్సుకు (31.10 గ్రాములు) 3168 డాలర్ల వద్ద జీవన కాల గరిష్టాన్ని నమోదు చేశాయి. అయితే ఉన్నట్లుండి ఒక్కరోజులోనే సీన్ రివర్స్ అయింది. అంతర్జాతీయంగా, దేశీయంగా ధరలు భారీగా పడిపోవడం గమనార్హం. దీని వెనుక చాలా కారణాలే ఉన్నాయి.

అంతర్జాతీయ మార్కెట్లో గోల్డ్ రేట్లు గరిష్ట స్థాయిల నుంచి దాదాపు 3 శాతానికిపైగానే పడిపోయింది. ప్రస్తుతం స్పాట్ గోల్డ్ రేటు ఔన్సుకు 3080 డాలర్ల దిగువ స్థాయిలో ఉంది. ఇంట్రాడేలో చూస్తే ఇది 3060 డాలర్ల స్థాయికి కూడా దిగొచ్చింది. అంటే 100 డాలర్లకుపైగా పడిపోయిందని చెప్పొచ్చు. ఈ మధ్య కాలంలో ఒక్కరోజులో ఇలా పడిపోయిందే లేదు.

గోల్డ్ రేటు పతనానికి ప్రాఫిట్ బుకింగ్ ప్రధాన కారణంగా వినిపిస్తోంది. అంటే ఇప్పటికే భారీగా పెరగడంతో.. లాభాలను సొమ్ము చేసుకునేందుకు ఇన్వెస్టర్లు అమ్మకాలు జరిపినట్లు విశ్లేషిస్తున్నారు నిపుణులు. మరోవైపు డాలర్ పుంజుకోవడం కూడా బంగారం ధర తగ్గేందుకు కారణమైందని తెలుస్తోంది.

ఇదే సమయంలో దేశీయంగా కూడా ఇప్పటికే గోల్డ్ రేట్లు భారీగా పడిపోయాయి. హైదరాబాద్ నగరంలో 22 క్యారెట్ల పసిడి ధర తాజాగా రూ. 1600 పడిపోగా.. తులం రూ. 84 వేలకు దిగొచ్చింది. 24 క్యారెట్ల గోల్డ్ ధర రూ. 1740 తగ్గి 10 గ్రాములు రూ. 91,640 కి పడిపోయింది. మరోవైపు వెండి ధర ఒక్కరోజులోనే రూ. 4 వేలు తగ్గడం విశేషం.

అయితే.. ఇప్పుడు ఇన్వెస్టర్లు ఈ రోజు విడుదల కానున్న యూఎస్ నాన్‌ఫామ్ పేరోల్స్ డేటాపై దృష్టి సారించారు. ఈ డేటా యూఎస్ ఫెడరల్ రిజర్వ్ వడ్డీ రేట్ల భవిష్యత్తు నిర్ణయాలను ప్రభావితం చేయనుంది, దీని ఫలితంగా బంగారం ధరలపై కూడా ప్రభావం పడే అవకాశం ఉంది. అమెరికాలో ఉద్యోగాల సంఖ్య అంచనాల కంటే ఎక్కువగా ఉంటే, డాలర్ బలపడవచ్చు, దీనివల్ల బంగారం ధరలు మరింత తగ్గే అవకాశం ఉంది. అదే విధంగా, అంచనాల కంటే తక్కువ ఉద్యోగాలు పెరిగితే, డాలర్ బలహీనపడి బంగారం ధరలు పెరగవచ్చు. ఈ డేటాతో పాటు, ఫెడ్ ఛైర్మన్ జెరోమ్ పావెల్ ప్రసంగం కూడా బంగారం ధరల్ని తీవ్రంగా ప్రభావితం చేస్తుంది.