హేజెల్‌వుడ్‌ని ఎత్తుకున్న విరాట్ కోహ్లి.. ఎమోషనల్ వీడియో

ఈ ఐపీఎల్‌లో ఆర్సీబీకి ఎన్నో కాళరాత్రులను మిగిల్చిన చిన్నస్వామి స్టేడియం మొత్తానికి ఓ వెలుగునిచ్చింది. బెంగళూరు చిన్నస్వామి స్టేడియం అంటేనే ఆర్సీబీ ఫ్యాన్స్ హడలిపోతున్నారు. హోం గ్రౌండ్ అయినప్పటికీ ఆ స్టేడియంలో గెలవడానికి ఆర్సీబీ నానా తంటాలు పడాల్సి వస్తోంది. బయట గ్రౌండ్‌లలో గెలుస్తున్న ఆర్సీబీ, హోం గ్రౌండ్‌లో మాత్రం వరుసగా మూడు ఓటములను చవిచూసింది. రాజస్థాన్‌తో జరిగిన నాలుగో మ్యాచ్‌లో కూడా దాదాపు ఓడిపోయినంత పని చేసింది. కానీ హేజెల్‌వుడ్ అద్భుత బౌలింగ్‌తో బతికిబట్టకట్టింది. దాంతో మ్యాచ్ అనంతరం విరాట్ కోహ్లి హేజెల్‌వుడ్‌ని ఎత్తుకుని మరీ థాంక్స్ చెప్పాడు.

ఐపీఎల్ 2025లో రాయల్ ఛాలెంజర్స్ బెంగళూరు జట్టు ఆరో విజయాన్ని నమోదు చేసింది. ఇప్పటి వరకు తొమ్మిది మ్యాచ్‌లు ఆడిన ఆర్సీబీ మూడు ఓడి, ఆరు గెలిచింది. ఓడిన మూడు మ్యాచ్‌లు కూడా తమ హోం గ్రౌండ్ బెంగళూరు చిన్నస్వామి స్టేడియంలోనే. దాంతో నిన్న రాత్రి రాజస్థాన్ రాయల్స్‌తో జరిగిన మ్యాచ్‌లో అటు ఆటగాళ్లతో పాటు ఇటు ఫ్యాన్స్ కూడా ఆఖరి ఓవర్ వరకూ గెలుస్తామో? లేదో? అన్న టెన్షన్‌లో మునిగిపోయారు.

16వ ఓవర్ వరకూ రాజస్థాన్ రాయల్స్ చేతిలో ఉన్న మ్యాచ్ 17వ ఓవర్‌లో హేజెల్‌వుడ్ బౌలింగ్‌తో ఒక్కసారిగా మారిపోయింది. ఆఖరి నాలుగు ఓవర్లకు రాజస్థాన్‌కు 46 పరుగులు కావాల్సి ఉండగా హేజెల్‌వుడ్ అద్భుతంగా బౌలింగ్ చేసి మ్యాచ్‌ని మలుపు తిప్పాడు. హేజెల్‌వుడ్ నాలుగు ఓవర్లలో 33 పరుగులు ఇవ్వగా.. 17, 19 ఓవర్లలో కేవలం ఏడు పరుగులే ఇచ్చి మూడు వికెట్లు తీసుకున్నాడు.

ఆఖరి రెండు ఓవర్లలో కేవలం 18 పరుగులే కావాల్సి ఉండటం, క్రీజులో ధృవ్ జురెల్ ఉండటంతో ఆర్సీబీ ఫ్యాన్స్ ఆశలు వదిలేసుకున్నారు. 19వ ఓవర్‌లో హేజెల్‌వుడ్ జురెల్‌తో పాటు ఆర్చర్‌ను వరుస బంతుల్లోనే అవుట్ చేయడమే కాకుండా.. ఆ ఓవర్‌లో కేవలం ఒక్క పరుగు మాత్రమే ఇచ్చాడు. దాంతో ఆర్సీబీ ఆశలు సజీవమయ్యాయి. ఆఖరి ఓవర్‌లో దయాల్ ఐదు పరుగులే ఇవ్వడంతో 11 పరుగుల తేడాతో విజయం సాధించింది.

ఆర్సీబీ విజయం సాధించిన తర్వాత బౌండరీ వద్ద ఫీల్డింగ్ చేస్తున్న విరాట్ కోహ్లి విజయోత్సాహంలో మునిగిపోయాడు. డగౌట్ ప్లేయర్లతో కలిసి సెలబ్రేట్ చేసుకుని.. గ్రౌండ్‌లోకి పరిగెత్తుకుంటూ వచ్చి హేజెల్‌వుడ్‌ని ఎత్తుకున్నాడు. మ్యాచ్ గెలిపించినందుకు థాంక్స్ చెబుతూ కోహ్లి హేజెల్‌వుడ్‌ని అలా ఎత్తుకున్నాడు. ఈ విజయంతో ఆర్సీబీ పాయింట్ల పట్టికలో దూసుకుపోయింది. తొమ్మిది మ్యాచ్‌లలో ఆరు గెలిచి పాయింట్ల పట్టికలో మూడో స్థానానికి వచ్చింది.