లివర్‌లో టాక్సిన్లు, మురికి పేరుకుపోతే...కనిపించే లక్షణాలు ఇవే

ఈ రోజుల్లో ఆరోగ్యంగా ఉండటం సవాల్‌తో కూడుకున్న పని. బిజీ లైఫ్, చెడు ఆహారపు అలవాట్లు, పెరుగుతున్న ఒత్తిడి శారీరక, మానసిక ఆరోగ్యంపై చెడు ప్రభావాన్ని చూపుతున్నాయి. వర్క్ లైఫ్, డిజిటల్ వాడకం, సరైన సమయంలో విశ్రాంతి తీసుకోకపోవడం, వ్యాయామానికి దూరంగా ఉండటం వల్ల అనేస ఆరోగ్య సమస్యలు ఎదుర్కొంటున్నారు. వీటి కారణంగా శరీరంలో కీలక అవయవాలపై ప్రభావం ఎక్కువ పడుతుంది. అయితే, ముఖ్యంగా కాలేయంపై ప్రతికూల ప్రభావాలు కనిపిస్తున్నాయి. కాలేయం మానవ శరీరంలో ఎంతో ముఖ్యమైన అవయవం. లివర్ ఎన్నో విధుల్ని నిర్వహిస్తుంది. ఇది రక్తాన్ని శుభ్రపరుస్తుంది. జీవక్రియను వేగవంతం చేస్తుంది.

ఆహారాన్ని జీర్ణం చేసే ఎంజైమ్స్ విడుదలతో పాటు అనేక పనులు నిర్వహిస్తుంది. అయితే, కాలేయంలో మురికి లేదా విషపదార్థాలు (టాక్సిన్లు) పేరుకుపోవడం ప్రారంభించినప్పుడు.. దాని ప్రభావం మొత్తం శరీరంపై కనిపిస్తుంది. ప్రారంభంలో దీని లక్షణాలు స్వల్పంగా ఉంటాయి. శరీరంలో పదే పదే కొన్ని లక్షణాలు కనిపిస్తే జాగ్రత్తగా ఉండాలి. సకాలంలో వీటిని గుర్తించకపోతే కాలేయం ప్రమాదంలో పడే అవకాశం ఉంది. ఫ్యాటీ లివర్‌తో పాటు లివర్ సిర్రోసిస్, లివర్ ఇన్‌ఫెక్షన్, లివర్ ఫెయిల్యూర్ మొదలైన వాటి ప్రమాదం పెరుగుతుంది. లివర్‌లో టాక్సిన్లు పేరుకుపోయినప్పుడు కనిపించే లక్షణాలేంటో ఇప్పుడు తెలుసుకుందాం.

ఉబ్బరం

​కాలేయంలో టాక్సిన్లు పేరుకుపోయినప్పుడు ఉబ్బరం, గ్యాస్ సమస్యలు, అపానవాయువు వంటి సమస్యల్ని ఎదుర్కోవాల్సి ఉంటుంది. తరుచుగా ఉబ్బరం, కడుపు బరువు ఉండటం, అపానవాయువు ఎక్కువగా విడుదల చేయడం వంటి సమస్యలను ఎదుర్కొంటుంటే.. మీరు జాగ్రత్త పడాలి. కాలేయంలో టాక్సిన్లు పేరుకుపోయి.. అది సరిగ్గా రక్తాన్ని క్లీన్ చేయడం లేదని అర్థం. కాలేయం పిత్తాన్ని సరిగ్గా ఉత్పత్తి చేయలేనప్పుడు, జీర్ణ ప్రక్రియ ప్రభావితమవుతుంది.

అలసట, బలహీనత

శరీరం నుంచి టాక్సిన్లు తొలగించడంలో కాలేయం కీలక పాత్ర పోషిస్తుంది. ఇది సరిగ్గా పనిచేయనప్పుడు, శరీరంలో హానికరమైన పదార్థాలు పేరుకుపోవడం ప్రారంభిస్తాయి. ఇది శక్తి స్థాయిని ప్రభావితం చేస్తుంది. దీని కారణంగా ఒక వ్యక్తి ఎటువంటి పని, ఎక్కువ శ్రమ లేకపోయినా అలసిపోయినట్లు, నీరసంగా, బలహీనంగా కనిపిస్తాడు. ఈ లక్షణం పదే పదే కనిపిస్తే వెంటనే అలర్ట్ అవ్వాలని నిపుణులు సూచిస్తున్నారు.

మొటిమలు, చర్మంపై దురద

కాలేయంలో మురికి లేదా విషపదార్థాలు పేరుకుపోవడం ప్రారంభించినప్పుడు, దాని ప్రభావం మొదట చర్మంపై కనిపిస్తుంది. ముఖం మీద తరచుగా మొటిమలు రావడం, చర్మం దురదగా ఉండటం లేదా చర్మం పొడిబారి నిర్జీవంగా మారడం జరుగుతుంది. ఈ లక్షణాలు కాలేయం సరిగ్గా పనిచేయడం లేదని సంకేతం కావచ్చు. ఇవి ఎక్కువగా పదే పదే కనిపిస్తే డాక్టర్‌ని సంప్రదించి తగిన వైద్య పరీక్షలు చేయించుకోవాలని నిపుణులు సూచిస్తున్నారు.

దుర్వాసన

కాలేయం పనితీరు తగ్గినప్పుడు, శరీరంలో పేరుకుపోయిన టాక్సిన్లను అది తొలగించలేదు. దీంతో, జీర్ణక్రియపై ప్రభావం ఎక్కువగా ఉంటుంది. ఇది జీర్ణక్రియపై ప్రభావం చూపుతుంది. గ్యాస్, అసిడిటీ వంటి సమస్యలు పెరుగుతాయి. దీనివల్ల శరీరం నుంచి దుర్వాసన వస్తుంది. ఇది కాలేయ రుగ్మతకు ప్రధాన సంకేతం కావచ్చు.

కళ్లు, చర్మం పసుపు రంగులోకి మారడం

కాలేయంలో టాక్సిన్లు పేరుకుపోయినప్పుడు అది రక్తాన్ని సరిగ్గా శుభ్రం చేయలేదు. దీంతో చర్మంపై, కళ్ళలో పసుపు రంగు కనిపించడం ప్రారంభమవుతుంది. ఈ పరిస్థితిని కామెర్లు అంటారు. ఇది హెపటైటిస్ లేదా సిర్రోసిస్ వంటి తీవ్రమైన కాలేయ వ్యాధికి సంకేతం కావచ్చు. పచ్చ కామెర్లు లక్షణాలు కనిపించినప్పుడు వెంటనే డాక్టర్‌ని సంప్రదించాలని నిపుణులు చెబుతున్నారు. నిర్లక్ష్యం చేస్తే పెద్ద ప్రమాదంలో పడే అవకాశం ఉంది.

కాళ్ల వాపులు

​కాలేయ పనితీరు మెరుగ్గా లేనప్పుడు శరీరంలో టాక్సిన్స్ పేరుకుపోతుంటాయి. దీంతో.. చాలా అవయవాల్లో నీరు ఎక్కువగా చేరుతుంది. దీంతో.. శరీరంలోని కొన్ని భాగాలు వాపులకు లోనవుతుంటాయి. ముఖ్యంగా కాళ్లు, పాదాల్లో వాపులు కనిపిస్తాయి. చేతి వేళ్లతో నొక్కితే చర్మం లోపలికి పోతుంది. ఈ లక్షణాలు పదే పదే కనిపిస్తుంటే నిర్లక్ష్యం చేయకండి. లివర్ డ్యామేజ్‌ని సూచించే సంకేతం ఇది. అందుకే వెంటనే డాక్టర్‌ని సంప్రదించి వైద్య పరీక్షలు చేయించుకోండి.