తులం బంగారానికి బ్యాంకులు లోన్ ఎంత వస్తుందో తెలుసా...?

అత్యవసర పరిస్థితులు ఎప్పుడు వస్తాయో ఎవరూ చెప్పలేరు. ఆ సమయంలో తక్షణ ఆర్థిక సహాయం కోసం చాలామంది చూసే మొదటి ఆప్షన్ లోన్. బంధువులు, తెలిసిన వారి వద్ద వడ్డీకి తీసుకోవడం లేదా చిట్టీలు వేయడం వంటివి కొందరికి అందుబాటులో ఉండకపోవచ్చు. అలాంటి వారికి తమ వద్ద ఉన్న బంగారం ఒక ఆశాకిరణం. బ్యాంకులు, ఫైనాన్స్ కంపెనీలు.. మీ బంగారాన్ని తనఖా పెడితే రుణం అందిస్తాయి. అయితే, మీ బంగారం స్వచ్ఛతను బట్టి ఎంత రుణం పొందొచ్చో తెలుసుకోవడం చాలా ముఖ్యం.

బంగారు రుణం ఒక సురక్షితమైన రుణం కాబట్టి చాలామంది బయట అధిక వడ్డీలకు డబ్బు తీసుకునే బదులు దీనిని ఎంచుకుంటారు. నిజానికి, బంగారు రుణాలపై వడ్డీ రేట్లు కూడా చాలా తక్కువగా ఉంటాయి. మరి ప్రస్తుతం, మీ వద్ద ఉన్న తులం (10 గ్రాముల) బంగారంపై ఎంత రుణం పొందవచ్చో ఇప్పుడు వివరంగా తెలుసుకుందాం.

బంగారం విలువలో 75 శాతం వరకు రుణం..

బ్యాంకులు, ఫైనాన్స్ కంపెనీలు తమ వినియోగదారులకు వారి బంగారం విలువలో 75 శాతం వరకు రుణంగా అందిస్తున్నాయి. అయితే, మీరు పొందే రుణ మొత్తం మీ బంగారం స్వచ్ఛత (క్యారెట్లు), పరిమాణంపై ఆధారపడి ఉంటుంది. రిజర్వ్ బ్యాంక్ ఆఫ్ ఇండియా (RBI) మార్గదర్శకాల ప్రకారం ఇది గరిష్ట పరిమితి అయినప్పటికీ, పోటీ కారణంగా కొన్ని సంస్థలు కొంచెం ఎక్కువ మొత్తాన్ని కూడా ఇవ్వవచ్చు.

ఉదాహరణకు, మీ వద్ద రూ. 1,00,000 విలువైన బంగారం ఉంటే, మీరు దాదాపు రూ. 75,000 వరకు బంగారు రుణం పొందవచ్చు. ప్రస్తుతం బంగారు రుణాలపై వడ్డీ రేట్లు 8 శాతం నుంచి 24 శాతం వరకు ఉండొచ్చు. అంతేకాకుండా, బ్యాంకులు, ఫైనాన్స్ కంపెనీలు ఈ లోన్లపై ప్రాసెసింగ్ ఫీజులను కూడా వసూలు చేస్తాయి.

10 గ్రాముల బంగారానికి ఎంత రుణం వస్తుంది?

మీరు దగ్గర ఉన్న బంగారం స్వచ్ఛతను బట్టి లోన్ మొత్తం మారుతుంది. వివిధ క్యారెట్ల బంగారంపై వచ్చే రుణాల వివరాలు ఇలా ఉన్నాయి.

24 క్యారెట్ల బంగారం ధర హైదరాబాద్ నగరంలో ప్రస్తుతం 10 గ్రాములకు రూ. 98,240 వద్ద ఉండగా.. ఇందులో 75 శాతం అంటే రూ. 73,680 లోన్ వస్తుంది. ఇక 22 క్యారెట్ల బంగారం (10 గ్రాములు) ధర ప్రస్తుతం రూ. 90,050 గా ఉండగా.. దీంట్లో 75 శాతం రూ. 67,537 లోన్ పొందొచ్చు. అంటే ఇక్కడ 24 క్యారెట్ల బంగారంపై కాస్త ఎక్కువ మొత్తం లోన్ పొందొచ్చన్నమాట.

అయితే ఈ మొత్తం వివిధ బ్యాంకులు, ఫైనాన్స్ కంపెనీల విధానాల్ని బట్టి మారొచ్చు. ప్రైవేట్ ఫైనాన్స్ కంపెనీలు కొన్నిసార్లు కొంచెం ఎక్కువ మొత్తాన్ని కూడా అందించే అవకాశం ఉంది. రుణం తీసుకునే ముందు వివిధ సంస్థల వడ్డీ రేట్లు, ప్రాసెసింగ్ ఫీజులు, ఇతర ఛార్జీలను తప్పకుండా తెలుసుకోవాలి.

అత్యవసర పరిస్థితుల్లో బంగారు రుణం ఒక మంచి ఆర్థిక సహాయకారిగా ఉపయోగపడుతుంది. అయితే, మీ బంగారం స్వచ్ఛతను నిర్ధరించుకోవడం, వివిధ రుణ సంస్థల ఆఫర్లను సరిపోల్చడం, తిరిగి చెల్లించే సామర్థ్యాన్ని అంచనా వేసుకోవడం చాలా ముఖ్యం. సరైన సమాచారంతో మీరు మీ బంగారాన్ని సమర్థంగా ఉపయోగించుకొని ఆర్థిక అవసరాలను తీర్చుకోవచ్చు.