ఏపీకి రూ.95వేల కోట్ల భారీ పరిశ్రమ

ఆంధ్రప్రదేశ్‌లో బీపీసీఎల్ (భారత్‌ పెట్రోలియం కార్పొరేషన్) రూ.95వేల కోట్ల పెట్టుబడితో గ్రీన్‌ఫీల్డ్‌ రిఫైనరీ, పెట్రో కెమికల్‌ కాంప్లెక్స్‌ ఏర్పాటు చేయబోతోంది. నెల్లూరు జిల్లా రామాయపట్నం పోర్టు సమీపంలో ఈ రిఫైనరీ ఏర్పాటు దిశగా అడుగులుపడుతున్నాయి. నెల్లూరులో బీపీసీఎల్ ప్రాజెక్టును వేగంగా పూర్తి చేయడానికి ప్రభుత్వం చర్యలు తీసుకుంటోంది. ఈ క్రమంలో బీపీసీఎల్ ప్రాజెక్టు త్వరగా పూర్తయ్యేందుకు ప్రభుత్వం పీఐయూ కమిటీని ఏర్పాటు చేసింది. ఈ కమిటీ ప్రాజెక్టుకు కావలసిన సహాయం అందిస్తుంది. ప్రభుత్వ మార్గదర్శకాలను అమలు చేస్తుంది.. ప్రోత్సాహకాలను పర్యవేక్షిస్తుందని ఉత్తర్వుల్లో పేర్కొన్నారు. ఈ కమిటీకిని పరిశ్రమల శాఖ కమిషనర్/డైరెక్టర్ ఛైర్‌పర్సన్‌గా వ్యవహరిస్తారు.

'ఈ కమిటీలో మొత్తం 16 మంది సభ్యులు ఉంటారు.. APIIC ఎగ్జిక్యూటివ్‌ డైరెక్టర్, ఏపీ మారిటైం బోర్డు CEO, నెల్లూరు జిల్లా కలెక్టర్, ఏపీ ట్రాన్స్‌కో డైరెక్టర్‌ (గ్రిడ్‌), నెల్లూరు ట్రాన్స్‌కో SE, ఏపీసీపీడీసీఎల్‌ CMD, జలవనరుల శాఖ E.N.C., పురపాలక శాఖ జేడీ స్థాయి అధికారి, స్టాంపులు, రిజిస్ట్రేషన్ల శాఖ జేడీ స్థాయి అధికారి, కాలుష్య నియంత్రణ మండలి ప్రతినిధి, నెల్లూరు, ప్రకాశం జిల్లాల DFOలు, APIIC తిరుపతి జోనల్‌ మేనేజర్, జిల్లా పరిశ్రమల కేంద్రం జనరల్‌ మేనేజర్, BPCL సంస్థ ప్రతినిధి, పరిశ్రమల శాఖ జేడీ, ఇంకా అవసరమైతే ఇతర అధికారులు కూడా ఉంటారు' అని ప్రభుత్వం ఉత్తర్వుల్లో పేర్కొంది. ఈ బీపీసీఎల్ పరిశ్రమకు కావలసిన రోడ్లు, నీరు, విద్యుత్ వంటి సదుపాయాలను ఈ కమిటీ చూసుకుంటుంది. ప్రోత్సాహకాలను లెక్కించడానికి వాణిజ్య పన్నుల శాఖ అధికారులు కూడా ఉంటారు. ఈ పీఐయూ కమిటీ ప్రతి నెలా సమావేశమై ప్రాజెక్టు ఎంతవరకు వచ్చిందో చర్చిస్తుంది. గనుల శాఖ కార్యదర్శి ప్రవీణ్‌కుమార్‌ను నోడల్‌ అధికారిగా నియమించారు.

భారత్ పెట్రోలియం కార్పొరేషన్ (బీపీసీఎల్) దాదాపు రూ.95 వేల కోట్లతో దేశంలోనే అతి ఖరీదైన రిఫైనరీని ఏర్పాటు చేయనుంది. ఇది ఏడాదికి తొమ్మిది మిలియన్ టన్నుల సామర్థ్యం కలిగి ఉంటుంది. ఆయిల్ రిఫైనరీ కమ్ పెట్రో కెమికల్ కాంప్లెక్స్‌ను ఏర్పాటు చేయనున్నారు. బీపీసీఎల్ ఈ ప్రాజెక్టును ప్రతిష్టాత్మకంగా చేపడుతోంది.