ఫ్రెంచ్ పర్యాటకరాలిపై ఉదయ్‌పూర్‌లో అత్యాచారం

ఫ్రెంచ్ మహిళపై రాజస్థాన్‌లోని ఉదయ్‌పూర్‌లో అత్యాచారం జరిగింది. యాట్ షూట్ కోసం ఉదయ్‌పూర్‌ వచ్చిన సదరు పర్యాటకురాలిపై ఒక ఈవెంట్ మేనేజ్‌మెంట్ సంస్థకు చెందిన ఉద్యోగి ఈ ఘాతుకాననికి పాల్పడ్డాడు. ఉదయ్‌పూర్‌లో జరిగిన ఈ ఘటన స్థానికంగానే కాకుండా, అంతర్జాతీయంగా కలకలం రేపింది.

ఉదయ్‌పూర్‌ ఎస్పీ యోగేష్ గోయల్ మాట్లాడుతూ.. బద్గావ్ పోలీస్ స్టేషన్‌లో అత్యాచారంపై ఫిర్యాదు అందినట్లు తెలిపారు. టైగర్ హిల్స్‌లోని ఒక రెస్టారెంట్‌లో ఒక పార్టీ జరిగింది. ఈ పార్టీలో స్థానిక మహిళలు, ఫ్రెంచ్ పర్యాటకులు పెద్ద ఎత్తున పాల్గొన్నారని వెల్లడించారు. ఈ పార్టీని నిర్వహిస్తున్న ఈవెంట్ మేనేజ్‌మెంట్‌ సంస్థకు చెందిన ఉద్యోగితో ఫ్రెంచ్ పర్యాటకురాలికి పరిచయం ఏర్పడిందని తెలిపారు. ఆ పార్టీలో విందు వినోదం ముగిసిన తర్వాత సదరు ఉద్యోగి ఆ ఫ్రెంచ్ మహిళను ఉదయ్‌పూర్ సిటీ చూపిస్తానని మభ్యపెట్టి బయటకు తీసుకెళ్లాడని, ఆ తర్వాత నగరాన్ని చూపించకుండా హోటల్ గదికి తీసుకెళ్లినట్లు ఉదయ్‌పూర్‌ ఎస్పీ యోగేష్ గోయల్ తెలిపారు.

ఆ హోటల్ గదిలోనే ఫ్రెంచ్ పర్యాటకురాలిపై నిందితుడు సిద్ధార్థ్ లైంగిక దాడికి పాల్పడినట్లు పోలీసులు వెల్లడించారు. ఈ మేరకు బాధిత మహిళ ఫిర్యాదు చేసినట్లు తెలిపారు.. ఈ ఘటనపై బద్గావ్ పోలీసులు పలు సెక్షన్ల కింద కేసు నమోదు చేశారు. పోలీసులు వెంటనే బాధితురాలిని వైద్య పరీక్షల నిమిత్తం ఆసుపత్రికి తరలించారు. ఈ కేసులో ఆరోపణలు ఎదుర్కొంటున్న నిందితుడు సిద్ధార్థ్‌ ప్రస్తుతం పరారీలో ఉన్నాడు. అతని ఆచూకీ కోసం పోలీసులు విస్తృతంగా గాలిస్తున్నారు.

ఫ్రెంచ్ రాయబార కార్యాలయానికి ఈ విషయం తెలియజేసినట్లు అధికారులు తెలిపారు. ఈ ఘటనలో సంబంధం ఉన్న ఇతర వ్యక్తులను కూడా పోలీసులు విచారిస్తున్నారు. ఇలాంటి దారుణాలు పునరావృతం కాకుండా ప్రభుత్వం, పోలీసులు కఠిన చర్యలు తీసుకోవాలని పర్యాటక వర్గాలు, మహిళా సంఘాలు డిమాండ్ చేస్తున్నాయి. ముఖ్యంగా పర్యాటకులకు ఇలాంటి జరక్కుండా ఉండేలా జాగ్రత్తలు తీసుకోవాలని సూచిస్తున్నారు. ఇలాంటివే తరచుగా జరుగుతూ పోతే.. పర్యాటక రంగంపై దెబ్బ పడుతుందని వివరిస్తున్నారు.