24 మంది విద్యార్థినులపై టీచర్ లైంగిక వేధింపులు

పిల్లలకు విద్యాబుద్ధులు నేర్పించి.. భావి పౌరులుగా తయారు చేయాల్సిన ఉపాధ్యాయులే దారితప్పుతున్నారు. తమ ఇంట్లో కంటే పాఠశాలలోనే ఉంటూ ఉపాధ్యాయులతో విద్యార్థులు తమ అనుబంధాన్ని పెంచుకుంటారు. బాలికలు తమకు చదువు నేర్పే గురువులను తమ తండ్రిలాగా భావిస్తారు. కానీ కొందరు టీచర్లు వెకిలి చేష్టలతో గురువులపై ఉండే గౌరవం రోజురోజుకూ సన్నగిల్లుతోంది. అలాంటి ఓ కీచక గురువు.. విద్యార్ధినులపై లైంగిక వేధింపులకు పాల్పడిన ఘటన హిమాచల్ ప్రదేశ్‌లో వెలుగులోకి వచ్చింది. 24 మంది బాలికలను లైంగికంగా వేధించాడనే ఆరోపణలపై ప్రభుత్వ పాఠశాలలో ఒక ఉపాధ్యాయుడ్ని పోలీసులు అరెస్టు చేశారు. బాధిత విద్యార్థుల ఫిర్యాదుతో కీచక గురువు ఉదంతం వెలుగులోకి వచ్చింది. ప్రస్తుతం ఈ ఘటన దేశవ్యాప్తంగా సంచలనం సృష్టిస్తోంది.

‘శిక్షా సంభాద్’ కార్యక్రమం సందర్భంగా ఏడు నుంచి పదో తరగతి విద్యార్థినులు స్కూల్ ప్రిన్సిపాల్‌కు ఫిర్యాదు చేశారు. గణిత టీచర్ తరచూ అసభ్యంగా తాకేవారని, మానసికంగా వేధించేవారని లిఖితపూర్వకంగా తెలిపారు. ట్రెయిన్డ్ గ్రాడ్యుయేట్ టీచర్ (TGT)‌పై పాఠశాల స్థాయి లైంగిక వేధింపుల నిరోధక కమిటీ సమావేశంలో ఈ విషయాన్ని విద్యార్థులు ఉద్ఘాటించారు.

విద్యార్థుల ఫిర్యాదుల అనంతరం తల్లిదండ్రులను పిలిపించి విషయం తెలియజేయగా.. వారు షాక్‌కు గురయ్యారు. తమ పిల్లలు ఇలాంటి వేధింపులకు గురయ్యారని అసలు ఊహించలేదని చెప్పారు. కీచక ఉపాధ్యాయుడు, స్కూల్ మేనేజ్‌మెంట్‌‌కు వ్యతిరేకంగా‌ నినాదాలు చేస్తూ.. అతడిపై కఠిన చర్యలు తీసుకోవాలని వారు డిమాండ్ చేశారు.

వేధింపులకు పాల్పడిన టీచర్‌పై పోక్సో చట్టం సహీ అనేక సెక్షన్ల కింద పోలీసులు కేసులు నమోదుచేశారు. అరెస్టు చేసిన అనంతరం స్థానిక కోర్టులో హాజరుపరచగా.. అతడికి న్యాయస్థానం మూడు రోజుల పోలీసు కస్టడీ విధించింది. మరోవైపు, ఈ ఘటనపై విద్యాశాఖ తీవ్రంగా స్పందించింది. సిర్మౌర్ జిల్లా విద్యాధికారి స్కూల్‌ను సందర్శించి, విద్యార్థులు, టీచర్లు, సిబ్బందుల వాంగ్మూలాలు నమోదు చేసి, నివేదికను వారం రోజుల్లో పంపించాలని రాష్ట్ర విద్యా శాఖ డైరెక్టర్ ఆదేశించారు.

స్థానిక పోలీసు అధికారి యోగేష్ రోల్టా మాట్లాడుతూ.. ‘ఈ కేసును అత్యంత ప్రాధాన్యతతో పరిశీలిస్తున్నాం. స్పాట్ విజిట్ పూర్తయ్యింది, విద్యార్థుల వాంగ్మూలాలు నమోదు చేశాం’ అని తెలిపారు.