అమెరికాలో ఇస్కాన్ ఆలయంపై కాల్పులు,,చర్యలు తీసుకోవాలని భారత్ డిమాండ్

కృష్ణ భక్తికి ప్రసిద్ధి చెందని ఇస్కాన్ ఆలయంపై కాల్పులు జరగడం సంచలనంగా మారింది. గతంలో బంగ్లాదేశ్‌లో ఇస్కాన్ ఆలయంపై దాడి చేయడమే కాక.. చిన్మయ్ కృష్ణదాస్‌ని బంగ్లా ప్రభుత్వం అరెస్ట్ చేయడాన్ని ప్రపంచవ్యాప్తంగా ఉన్న హిందువులు తీవ్రంగా ఖండించారు. ఈ సంఘటనను మర్చిపోయేలోపే ఇప్పుడు మరో చోట ఇస్కాన్ ఆలయంపై కాల్పులు జరగడం సంచలనంగా మారింది. అమెరికాలోని ఇస్కాన్ ఆలయంపై కాల్పులు జరిపారు దుండగులు. దీనిపై భారత్ తీవ్ర ఆగ్రహం వ్యక్తం చేస్తుంది. ఆవివరాలు..

అమెరికాలోని ఉతాహ్ రాష్ట్రంలో ఉన్న ఇస్కాన్ రాధా కృష్ణ దేవాలయంపై కొందరు దుండగులు కాల్పులు జరిపారు. ఈ ఘటనను భారత్ తీవ్రంగా ఖండించింది. నిందితులపై వెంటనే చర్యలు తీసుకోవాలని శాన్ ఫ్రాన్సిస్కోలోని భారత కాన్సులేట్ జనరల్ కోరింది. గత నెలలో మూడుసార్లు ఇలాంటి దాడులు జరిగాయని, ఇది విద్వేషపూరిత చర్యగా అనుమానిస్తున్నామని ఆలయ అధికారులు వెల్లడించారు.

ఈ ఘటనపై భారత్ స్పందించింది. ఉతాహ్ రాష్ట్రంలోని స్పానిష్ ఫోర్క్‌లో ఉన్న ఇస్కాన్ శ్రీశ్రీ రాధా కృష్ణ దేవాలయంపై జరిగిన కాల్పుల ఘటనను ఖండిస్తున్నామని భారత కాన్సులేట్ జనరల్ తెలిపింది. భక్తులకు, ఆలయ అధికారులకు అండగా ఉంటామని హామీ ఇచ్చింది. ఈ ఘటనపై స్థానిక అధికారులు వెంటనే చర్యలు తీసుకోవాలని కోరింది. ఈ మేరకు ఎక్స్‌లో పోస్ట్ చేసింది.

హోలీ వేడుకలకు ప్రసిద్ధి చెందిన ఇస్కాన్ దేవాలయంపై కొందరు వ్యక్తులు విద్వేషంతో కాల్పులు జరిపారు. రాత్రిపూట భక్తులు, అతిథులు ఆలయంలో ఉండగానే ఈ ఘటన జరిగింది. ఈ కాల్పుల వల్ల ఆలయానికి చాలా నష్టం వాటిల్లింది. సుమారు 20 నుంచి 30 బుల్లెట్లు గోడల్లోకి దూసుకెళ్లాయి. గతంలో కూడా ఈ ఆలయంపై దాడులు జరిగాయని ఆలయ అధికారులు తెలిపారు.

దేవాలయ అధ్యక్షుడు వాయ్ వార్డెన్ మాట్లాడుతూ, గత నెలలో మూడుసార్లు గుడిపై కాల్పులు జరిగాయని చెప్పారు. స్వాగత తోరణాలు, గోడలు, కిటికీల్లోకి బుల్లెట్లు దిగాయన్నారు. గత కొన్ని దశాబ్దాలుగా ఇక్కడ ఎలాంటి సమస్యలు లేవని, కానీ ఇటీవల ఇలాంటి ఘటనలు జరుగుతున్నాయని ఆయన ఆందోళన వ్యక్తం చేశారు. ఇలాంటి సంఘటనలు మళ్లీ జరగకుండా చూడాలని ఆయన అధికారులను కోరారు. ఈ గుడిని 1990 మొదట్లో నిర్మించారు.

ఈ ఏడాది మార్చి 9న కాలిఫోర్నియాలో కూడా ఇలాంటి సంఘటనే జరిగింది. లాస్ ఏంజెలెస్‌లో ఖలిస్థానీ ప్రజాభిప్రాయ సేకరణ కార్యక్రమం ముందు చినోహిల్స్‌లోని బోచసన్వాసి అక్షర పురుషోత్తం స్వామినారాయణ సంస్థ(బోప్స్)హిందూ దేవాలయంపై దాడి జరిగిందని ఆలయ అధికారులు తెలిపారు.