డెలివరీ బాయ్‌నంటూ ఇంట్లో దూరి అత్యాచారం

దేశంలో మహిళల రక్షణకు ఎన్ని కఠిన చట్టాలు తెచ్చినా లాభం లేకుండా పోతుంది. నెలల వయసున్న పసి పిల్లలు మొదలు కాటికి కాళ్లు చాపిన 90 ఏళ్ల వృద్ధురాలి వరకు ఎవరిని వదలడం లేదు. కామంతో కళ్లు ముసుకుపోయి ప్రవర్తిస్తున్నారు. తాజాగా కోల్‌కతాలో లా విద్యార్థినిపై గ్యాంగ్ రేప్ వ్యవహారం దేశాన్ని కుదిపేసింది. ఇక తాజాగా మరో దారుణం వెలుగులోకి వచ్చింది. కొరియర్ బాయ్ పేరు చెప్పి బలవంతంగా ఇంట్లోకి ప్రవేశించి.. మహిళపై అత్యాచారం చేశాడో వ్యక్తి. పైగా ఆమె మొబైల్లోనే సెల్ఫీ దిగి మళ్లీ వస్తానంటూ హెచ్చరించి అక్కడ నుంచి వెళ్లిపోయాడు. ఈ దారుణ సంఘటన వివరాలు ఇలా ఉన్నాయి.

పోలీసులు తెలిపిన వివరాల ప్రకారం.. బాధితురాలు మహారాష్ట్ర పుణెలోని ఓ పాష్ అపార్ట్‌మెంట్‌లో నివాసం ఉంటుంది. ఓ ప్రైవేటు కంపెనీలో పని చేస్తుంది. ఈక్రమంలో బుధవారం రాత్రి 7.30 గంటలకు నిందితుడు డెలివరీ బాయ్‌నంటూ మహిళ నివాసం ఉండే ప్లాట్ దగ్గరకు వచ్చాడు. బ్యాంక్ నుంచి మీకు కొరియర్ వచ్చిందని చెప్పాడు. బాధితురాలి మొబైల్ నంబర్‌కి ఓటీపీ వస్తుంది.. అది చెప్పమని అడిగాడు.

దీంతో బాధితురాలు తన మొబైల్‌లో ఓటీపీ చెక్ చేయడం కోసం లోపలికి వెళ్లింది. ఇదే అవకాశంగా భావించిన ఆ వ్యక్తి ఇంట్లో దూరి ఆమెపై అత్యాచారం చేశాడు. ఆతర్వాత ఇంటి నుంచి వెళ్తూ బాధితురాలి మొబైల్‌లో సెల్ఫి దిగి.. మళ్లీ కలుద్దాం అని మెసేజ్ పెట్టి వెళ్లాడు. అయితే నిందితుడు బాధితురాలి మీద కెమికల్ స్ప్రే చేసి.. ఆమె స్పృహ కోల్పోయేలా చేసి.. ఆ తర్వాత అత్యాచారానికి ఒడిగట్టి ఉంటాడని భావిస్తున్నారు. సుమారు గంట పాటు ఆమె స్పృహ కోల్పోయిందని తెలిసింది.

రాత్రి 8.30 ప్రాంతంలో బాధితురాలికి మెలకువ రావడంతో.. జరిగిన దారుణం గురించి తన బంధువులకు సమాచారం అందించింది. వారు వెంటనే పోలీసులకు తెలిపారు. సమాచారం తెలిసిన వెంటనే పోలీసులు సంఘటనా స్థలానికి చేరుకుని కేసు నమోదు చేశారు. బాధితురాలు నిందితుడిని గుర్తించే స్థితిలో లేదు. దీంతో పోలీసులు ఆ ప్రాంతంలో ఉన్న సీసీటీవీ ఫుటేజ్ ఆధారంగా నిందితుడి ఆచూకీ గుర్తించడం కోసం ప్రయత్నాలు చేస్తున్నారు.

బాధితురాలికి ఓ సోదరుడు కూడా ఉన్నాడని.. అతడు పని నిమిత్తం బయటకు వెళ్లాడని.. ఆ సమయంలోనే ఈ దారుణం చోటు చేసుకుందని పోలీసులు తెలిపారు. ఒంటరిగా ఇళ్లల్లో ఉండే మహిళలు, యువతులు జాగ్రత్తగా ఉండాలని.. ప్రతి ఒక్కరిని నమ్మవద్దని.. పూర్తిగా తెలుసుకున్న తర్వాతే ఎవరినైనా ఇంట్లోకి అనుమతించాలని.. ఏమాత్రం అనుమానాస్పదంగా ఉన్నా పోలీసులకు సమాచారం అందించాలని సూచించారు.