భార్యకు కాల్ చేసి మాట్లాడుతూ.. గన్‌తో కాల్చుకుని చనిపోయిన జవాన్

శ్రీ సత్యసాయి జిల్లాకు చెందిన సీఆర్‌పీఎఫ్ జవాన్ ఆత్మహత్య కలకలం రేపింది. ఛత్తీస్‌గఢ్‌లోని రాయ్‌పూర్‌లో విధుల్లో ఉన్న మురళి భార్యకు ఫోన్ కాల్ చేసి కొద్దిసేపు మాట్లాడాడు.. కొద్దిసేపటికే తుపాకీతో కాల్చుకుని ప్రాణాలు తీసుకున్నాడు. కనగానపల్లి మండలం శివపురంకొట్టానికి చెందిన కంచుకుంట మురళి 2017లో సీఆర్‌పీఎఫ్‌లో జవాన్‌గా చేరగా.. మురళికి పావనితో ఐదేళ్ల క్రితం ప్రేమ వివాహమైంది. ఈ దంపతులకు తారక్‌రామ్, మహిలు సంతానం. ఆదివారం రాత్రి 10 గంటల సమయంలో మురళి తన భార్యకు వీడియో కాల్ చేసి మాట్లాడారు.

పావని ఏం చేస్తున్నావాని ఆరా తీశారు.. పిల్లలు భోజనం చేశారా అని క్షేమ సమాచారాలు అడిగారు. న్న ఆరోగ్య పరిస్థితి క్షీణిస్తోంది.. ఆయన్ను బాగా చూసుకోవాలి. అలాగే చెల్లికి మంచి వరుడ్ని చూసి పెళ్లి చేయాలి. మంచి ఇల్లు కట్టుకుని.. పిల్లల్ని బాగా చదివించి జీవితంలో బాగా స్థిరపడేలా చేయాలి. నేను రూ.34 లక్షల వరకు అప్పు చేశా.. నువ్వే మన కుటుంబానికి అండగా ఉండి బాగా చూసుకోవాలి' అని చెప్పారు మురళి. అలా మాట్లాడుతూనే తుపాకీతో కాల్చుకున్నారు.. భార్య పిలిచినా పలకలేదు. ఆ శబ్దం విని ఓ తోటి జవాన్ వచ్చి చూడగా అప్పటికే మురళి చనిపోయాడు. వెంటనే కుటుంబ సభ్యులకు సమాచారం ఇచ్చారు.

ప్రాథమిక సమాచారం ప్రకారం మురళి ఆర్థిక ఇబ్బందుల కారణంగానే ఆత్మహత్య చేసుకున్నట్లు తెలుస్తోంది. మురళి ఆత్మహత్యతో శివపురంకొట్టాలలో విషాదఛాయలు అలుముకున్నాయి. అయితే మురళి తండ్రి ముత్యాలన్న కొంతకాలంగా క్యాన్సర్‌తో బాధపడుతున్నారు. అయితే ఆయనకు బెంగళూరులోని ఓ ఆస్పత్రిలో ట్రీట్మెంట్ అందిస్తున్నారు. తండ్రి కోసం మురిళ దాదాపు రూ.30 లక్షల వరకు అప్పు చేసినట్లు తెలుస్తోంది. మురళి కారుకు నాలుగు నెలల క్రితం ప్రమాదం జరిగింది. ఈ ఘటనలో ఒకరు చనిపోగా..

మృతుడి కుటుంబ సభ్యులు రాజీ కోసం రూ.15 లక్షలు డిమాండ్ చేసినట్లు సమాచారం. అయితే తండ్రి వైద్యం కోసం దాచుకున్న రూ.4 లక్షల్ని ఆ కుటుంబానికి ఇచ్చినట్లు చెబుతున్నారు. మురళి ఇలా మొత్తం రూ.34 లక్షల వరకు అప్పులు చేశారంటున్నారు.. అలాగే సోదరికి పెళ్లి చేయాల్సి ఉండటంతో ఒత్తిడికి గురై ఇలా ప్రాణాలు తీసుకున్నారని అనుమానాలు వ్యక్తం చేస్తున్నారు.