వాహనదారులకు షాక్.. ఆ ఫాస్టాగ్స్ అన్నీ బ్లాక్

జాతీయ రహదారులపై ప్రయాణించే వాహనాలు టోల్ ట్యాక్స్ చెల్లించాల్సి ఉంటుంది. టోల్ ఫీజ్ చెల్లించకుండా జర్నీ చేయలేం. ఇది అందరికి తెలిసిందే. అయితే, టోల్ గేట్ల వద్ద ట్రాఫిక్ జామ్ కాకుండా, క్షణాల వ్యవధిలోనే వెళ్లేందుకు ఫాస్టాగ్ టెక్నాలజీని అందుబాటులోకి తెచ్చిన సంగతి తెలిసిందే. ఫాస్టాగ్ గేట్ వద్దకు వాహనం రాగానే ఆటోమేటిక్‌గా పేమెంట్ జరిగి గేట్ తెరుచుకుంటుంది. వాహనం క్షణాల్లోనే టోల్ గేట్ దాటి వెళ్లిపోతుంది. ఇది అందరికి తెలిసిందే. అయితే, ఫాస్టాగ్ విషయంలో కొందరు వాహనదారులు చేసే చర్యల వల్ల టోల్ గేట్ల వద్ద ట్రాఫిక్ జామ్ సహా ఇతర సమస్యలు తలెత్తుతున్నట్లు జాతీయ రహదారుల ప్రాధికార సంస్థ గుర్తించింది. ఈ క్రమంలో జూలై 11వ తేదీన ఓ ప్రకటన జారీ చేసింది.

ఇకపై లూజ్ ఫాస్టాగ్ ఉపయోగిస్తే కఠిన చర్యలు తీసుకుంటామని, అలాంటి ఫాస్టాగ్ లను వెంటనే బ్లాక్ చేస్తామని హెచ్చరించింది. ఫాస్టాగ్‌లను వాహనం విండ్ షీల్డ్ గ్లాస్‌పై సరైన ప్రాంతంలో అంటించకపోయినా సమస్య తలెత్తుతుంది కాబట్టి వాటిని సైతం బ్లాక్ చేస్తామని తెలిపింది. కొందరు టోల్ గేటు వద్ద ఫాస్టాగ్ కార్డును చేతి ద్వారా కెమెరా స్కానర్లకు చూపిస్తున్నారని కేంద్రం గుర్తించినట్లు తెలిపింది. ఇలా విండ్ స్కీన్‌కు అంటించకుండా కొందరు వాహన యజమానులు చేతులో పట్టుకుని సమస్యలకు కారణమవుతున్నారని తెలిపింది. దీంతో టోల్ గేట్ల వద్ద తప్పుడు ఛార్జీలు, క్లోజ్డ్ లూప్ సిస్టమ్ దుర్వినియోగం వంటివి జరుగుతున్నాయని, మొత్తంగా ఎలక్ట్రానిక్ టోల్ కలెక్షన్ వ్యవస్థకే సమస్య వస్తోందని ఆందోళన వ్యక్తం చేసింది. దీంతో టోల్ ప్లాజాల వద్ద అనవసరమైన జాప్యం జరిగి ఇతర వాహనదారులు ఇబ్బందులు పడుతున్నట్లు తెలిపింది.

ఇలాంటి లూజ్ ఫాస్టాగ్‌లను గుర్తించి వెంటనే చర్యలు తీసుకునేందుకు నేషనల్ హైవేస్ అథారిటీ ఆఫ్ ఇండియా కీలక నిర్ణయంతీసుకుంది. టోల్ కలెక్షన్ ఏజెంట్లకు ప్రత్యేక ఈ-మెయిల్ ఐడీ అందించింది. టోల్ గేట్ల వద్ద ఏదైనా వాహన యజమాని చేతితో ఫాస్టాగ్ పట్టుకుని కనిపించడం, సరైన ప్లేస్‌లో అంటించకపోవడం వంటివి గుర్తిస్తే వెంటనే వాటి వివరాలు తెలియజేయాలని సూచించినట్లు తెలిపింది. టోల్ కలెక్షన్ ఏజెన్సీల నుంచి వచ్చే సమాచారం మేరకు ఎన్‌హెచ్ఏఐ తక్షణం చర్యలు తీసుకుంటుంది. అలాంటి ఫాస్టాగ్‌లను బ్లాక్ లిస్ట్‌లో పెట్టడం లేదా హాట్ లిస్ట్‌లో పెట్టడం వంటి చర్యలు తీసుకుంటుంది.

కొందరు వాహనదారులు ఫాస్టాగ్‌ను దుర్వినియోగం చేస్తున్నట్లు కేంద్రం గుర్తించింది. చిన్న వాహనాల ఫాస్టాగ్‌ను పెద్ద వాహనాలకు ఉపయోగించి తక్కువ టోల్ చెల్లించడం, క్లోజ్డ్ లూప్ సిస్టమ్ ద్వారా రీఫండ్ కోరడం వంటివి చేస్తున్నారని, దీంతో ఆదాయం కోల్పోవాల్సి వస్తోందని తెలిపింది. అలాగే భౌతికంగా ఫాస్టాగ్ స్కాన్ చేయడం ద్వారా టోల్ గేట్ల వద్ద రద్దీ ఏర్పడడం, ఫాస్టాగ్ అసలు ఉద్దేశాన్ని దెబ్బతీయడం వంటివి జరుగుతున్నట్లు తెలిపింది. వీటన్నింటికి చెక్ పెట్టేందుకే లూజ్ ఫాస్టాగ్‌లను గుర్తించి బ్లాక్ చేయాలని నిర్ణయించినట్లు తెలిపింది. ఇలా ఒక వాహనం ఫాస్టాగ్ మరొకదానికి, చిన్న వాహనం ఫాస్టాగ్ పెద్ద వాహనానికి వాడడం, చేతితో స్కాన్ చేయించడం వంటివి చేస్తే కార్డ్ బ్లాక్ అవుతుందని గుర్తుంచుకోవాలని హెచ్చరించింది.