కంచె దాటుకుని రోడ్డుపైకి,,,అలిపిరి సమీపంలో చిరుత కలకలం

తిరుపతిలో మరోసారి చిరుత పులి సంచారం కలకలం రేపింది. గురువారం తెల్లవారుజామున 5:30 గంటల సమయంలో తిరుపతిలో అలిపిరి - జూపార్క్ రోడ్డులో కల్వర్టు వద్ద చిరుత ప్రత్యక్షమైంది. అటవీశాఖ ఏర్పాటు చేసిన ఇనుప కంచెను దాటుకుని చిరుత రోడ్డుపైకి రావడంతో వాహనదారులు భయపడ్డారు. అటుగా వెళ్తున్న కొందరు దానిని వీడియోలు తీశారు. ఆ చిరుత రోడ్డుపై అలాగే ఉండిపోవడతో వాహనదారులు భయాందోళనకు గురయ్యారు. దీంతో ఒకేవైపు నుంచి వాహనాలు వెళ్లాయి. చాలాసేపు చిరుత అక్కడే కూర్చుని ఉండటంతో తమ మొబైల్‌‌లో చిత్రీకరించారు. ప్రస్తుతం ఈ వీడియోలు సోషల్ మీడియాలో వైరల్ అవుతున్నాయి. అటవీ శాఖ అధికారులు చిరుతను పట్టుకునేందుకు ప్రయత్నాలు చేస్తున్నారు.

కాగా, గతకొద్ది రోజులుగా తిరుమలలో చిరుత సంచారం వార్తలు శ్రీవారి భక్తులను భయాందోళనకు గురిచేస్తున్నాయి. ఇటీవల తిరుమల మొదటి ఘాట్ రోడ్డులో చిరుత ప్రత్యక్షమైంది. మొదటి ఘాట్‌ రోడ్డులోని వినాయకుడి ఆలయం సమీపంలో వాహనదారులకు చిరుత కనిపించింది. రహదారి పక్కనే ఉన్న పిట్టగోడపై కూర్చున్న చిరుత. వాహనాల శబ్దంతో భయపడిపోయి అక్కడి నుంచి పరుగులు పెట్టింది. అటు, చిరుతను చూసిన వాహనదారులు హడలిపోయారు. వరుసగా ఇటువంటి ఘటనలు భక్తులను కలవరపెడుతున్నాయి.

అటు, చిరుతలు సంచారంతో తిరుమల తిరుపతి దేవస్థానం ( టీటీడీ) కూడా అప్రమత్తమైంది. అలిపిరి మెట్ల మార్గంలో శ్రీవారి భక్తులను గుంపులు గుంపులుగా ఓ సెక్యూరిటీ గార్డ్‌ సాయంతో పంపుతోంది. సెక్యూరిటీ గార్డు, మెగాఫోన్‌తో గోవింద నామాలు జపిస్తూ భక్తులను కొండపైకి చేరుకుంటున్నారు. గతంలో చిన్నారులపై చిరుత దాడి చేసిన ఘటనలు చోటుచేసుకున్నాయి. దీంతో టీటీడీ అధికారులు సీసీటీవీలు, ట్రాప్ కెమెరాల ద్వారా నిరంతర పర్యవేక్షణ కొనసాగిస్తున్నారు. శేషాచలం అడవుల్లో ఏనుగులు, చిరుతలు, ఎలుగుబంట్లు, వంటి ఇతర అటవీ జంతువులు ఎక్కువగా సంచరిస్తుంటాయి. తిరుమలకు వెళ్లే మార్గంలో అలిపిరి, శ్రీవారిమెట్లు, గాలిగోపురం ప్రాంతాల్లో తరుచూ భక్తులకు ఇవి కనిపిస్తూ ఉంటాయి. ఇక క్రూరమృగాల కదలికలను గుర్తించడానికి తిరుమల చుట్టుపక్కల దాదాపు 500 సీసీటీవీ కెమెరాలను సైత ఏర్పాటు చేశారు.