అమెరికా చిన్నారులను దత్తత తీసుకునే హక్కు భారతీయులకు లేదు..: బాంబే హైకోర్టు స్పష్టం

అమెరికా పౌరసత్వం కలిగిన తమ బంధువుల పిల్లలను దత్తత తీసుకునే ప్రాథమిక హక్కు భారతీయులకు లేదని బాంబే హైకోర్టు స్పష్టం చేసింది. అమెరికా పౌరసత్వం కలిగిన తమ బంధువుల పిల్లవాడిని దత్తత తీసుకోవడానికి ఓ జంట దాఖలు చేసిన పిటిషన్‌ను హైకోర్టు తోసిపుచ్చింది. ముఖ్యంగా దత్తతకు ఇక్కడి చట్టాలు అంగీకరించవని.. యూఎస్ చట్టాల ప్రకారం దత్తత తీసుకుని.. ఆ తర్వాతే ఇక్కడి దత్తత విధానాన్ని పాటించాలని సూచించింది.

వివరాల్లోకి వెళ్తే.. భారతీయ దంపతులకు అమెరికా బంధువులు ఉన్నారు. అయితే వారికి 2019లో ఓ బాబు పుట్టాడు. అక్కడే పుట్టడంతో అతడికి అమెరికా పౌరసత్వం లభించింది. కాకపోతే భారతీయ దంపతులకు పిల్లలు లేకపోవడంతో అతడిని తెచ్చి పెంచుకుంటున్నారు. ముఖ్యంగా నెలల వయసు ఉండగానే అతడిని భారత్ తీసుకు వచ్చారు. అప్పటి నుంచి అతడు వీరితోనే ఉంటుండగా.. అతడిని దత్తత తీసుకోవాలని భావించారు. కానీ ఇందుకు చట్టపరమైన సవాళ్లు ఎదురయ్యాయి. దీంతో వీరు మొదటగా.. సెంట్రల్ అడాప్షన్ రిసోర్స్ ఏజెన్సీ (CARA)ని సంప్రదించారు. అక్కడ రిజిస్ట్రేషన్ చేయించుకోవాలని చాలానే ప్రయత్నించారు.

కానీ ఈ దత్తతకు ఇక్కడ చట్టాలు అంగీకరించని సదరు సంస్థ తేల్చి చెప్పింది. దీంతో జంట బాంబే హైకోర్టును ఆశ్రయించింది. ఈక్రమంలోనే నేడు విచారణ జరిపిన న్యాయస్థానం.. వీరికి షాక్ ఇచ్చింది. ముఖ్యంగా ఈ కేసును విచారించిన జస్టిస్ రేవతి మోహితే డేరే మరియు జస్టిస్ నీలా గోఖలేలతో కూడిన డివిజన్ బెంచ్.. భారతీయ చట్టాల ప్రకారం ఈ విషయంలో ప్రాథమిక హక్కు లేదని తేల్చి చెప్పింది. జువైనల్ జస్టిస్ (కేర్ అండ్ ప్రొటెక్షన్ ఆఫ్ చిల్డ్రన్) చట్టం మరియు దత్తత నిబంధనల ప్రకారం.. విదేశీ పౌరసత్వం కలిగిన పిల్లలను దత్తత తీసుకోవడానికి ఎటువంటి హక్కు లేదని కోర్టు పేర్కొంది.

పిటిషనర్లు తమకు అమెరికా పౌరసత్వం కలిగిన పిల్లవాడిని దత్తత తీసుకునే ప్రాథమిక హక్కు ఉందని వాదించినప్పటికీ, కోర్టు ఆ వాదనను అంగీకరించలేదు. అలాగే అమెరికా పౌరసత్వం కలిగిన పిల్లవాడిని భారతీయ పౌరుడు దత్తత తీసుకోవడం ద్వారా అతని ప్రాథమిక హక్కులకు ఎటువంటి భంగం కలగదని కూడా కోర్టు పేర్కొంది. ఒకవేళ ఆ దంపతులు పిల్లవాడిని దత్తత తీసుకోవాలనుకుంటే.. ముందుగా అమెరికా చట్టాల ప్రకారం అక్కడ దత్తత ప్రక్రియను పూర్తి చేయాలని, ఆ తర్వాత దత్తత తీసుకున్న విదేశీ పిల్లవాడిని భారత దేశానికి తీసుకురావడానికి సంబంధించిన తదుపరి ప్రక్రియలను అనుసరించవచ్చని సూచించింది.