రేషన్ డిపోలు లబ్దిదారులకు అందుబాటులో ఉండాలి
Andhra Pradesh Telugu | Suryaa Desk | Published : Mon, Jul 21, 2025, 12:05 PM
సచివాలయాల పరిధిలో ఉన్న బియ్యం కార్డుదారులకు అందుబాటులోనే రేషన్ డిపోలు ఉండాలని డీలర్లకు విశాఖ జిల్లా పౌరసరఫరాల అధికారి వి.భాస్కర్ స్పష్టంచేశారు. రేషన్ డీలర్ల ఇష్టారాజ్యం శీర్షికన ఆదివారం ‘ఆంధ్రజ్యోతి’లో ప్రచురితమైన కథనంపై ఆయన స్పందించారు. ఈ మేరకు సహాయ పౌరసరఫరాల అధికారులు, చెకింగ్ ఇన్స్పెక్టర్లు, డీలర్లకు ఒక సందేశం పంపారు. కార్డుదారుల ప్రయోజనం కోసం గతంలోనే ప్రతి సచివాలయం పరిధిలో క్లస్టర్లకు డిపోలు అనుసంధానం చేశారన్నారు. అయితే కొన్నిచోట్ల కార్డుదారులకు దూరంగా డిపోలు ఉన్నట్టు వస్తున్న ఫిర్యాదులపై పలుమార్లు సూచనలు చేశామన్నారు. కొందరు మార్పు, చేర్పులు చేశారన్నారు. ఆగస్టు ఒకటోతేదీ కల్లా మిగిలిన వారంతా గతంలో మ్యాపింగ్ అయిన విధంగా సచివాలయాల పరిధిలో కార్డుదారులకు అందుబాటులో డిపోలు ఏర్పాటుచేయాలన్నారు. అప్పటికీ మార్పులు చేయకపోతే చర్యలు తీసుకుంటామని హెచ్చరించారు. ఈ విషయంలో ఏఎస్వోలు, చెకింగ్ ఇన్స్పెక్టర్లు తమ పరిధిలోని డిపోలన్నీ సచివాలయాల పరిధిలో ఉన్నాయా.? లేదా తనిఖీ చేసి వెంటనే నివేదిక పంపాలని ఆదేశించారు.
|
|