మేం నిజం వైపు మాత్రమే నిలబడతాం..:పార్లమెంటులో కేంద్రమంత్రి

అహ్మదాబాద్‌లో గత నెలలో జరిగిన ఎయిర్ ఇండియా విమాన ప్రమాదంపై దర్యాప్తు నిష్పక్షపాతంగా, నిబంధనల ప్రకారమే జరుగుతోందని కేంద్ర విమానయాన శాఖ మంత్రి కింజరాపు రామ్మోహన్ నాయుడు పార్లమెంటులో స్పష్టం చేశారు. ఈ ఘటనపై విదేశీ మీడియాలు తప్పుడు సమాచారాన్ని వ్యాప్తి చేస్తున్నాయని ఆగ్రహం వ్యక్తం చేశారు. ఇష్టం వచ్చినట్లుగా సొంత కథనాలను ప్రచారం చేస్తున్నారని ఆక్షేపించారు. విమాన ప్రమాదాలపై దర్యాప్తు ప్రక్రియ, అంతర్జాతీయ నిబంధనలు, ప్రమాణాలు, ప్రొటోకాల్స్‌కు అనుగుణంగానే జరుగుతుందని మంత్రి నొక్కి చెప్పారు.

ముఖ్యంగా తమ దర్యాప్తు పారదర్శకంగా, నిబంధనలకు అనుగుణంగా సాగుతోందన్నారు. ఇందులో ఎలాంటి పక్షపాతం లేదుని ఆయన ప్రకటించారు. ప్రాథమిక నివేదిక అందినట్లు, దానిని సమీక్షిస్తున్నట్లు తెలిపారు. తుది నివేదికలో మరింత సమాచారం వెల్లడవుతుందని ఆశాభావం వ్యక్తం చేశారు. ఈ విచారణ ప్రక్రియ జరుగుతుండగానే విదేశీ మీడియా సంస్థలు తమ వ్యక్తిగత అభిప్రాయాలను, తప్పుడు సమాచారాన్ని ప్రచారం చేయడం సరికాదని మంత్రి హితవు పలికారు. ఇలాంటి సున్నితమైన విషయాలపై అసంబద్ధమైన వ్యాఖ్యలు చేయడం, నిర్ధారణకు రాని విషయాలను వ్యాప్తి చేయడం తగదని పేర్కొన్నారు.

ఈ ప్రమాదంలో విమానంలోని బ్లాక్ బాక్స్‌కు నష్టం వాటిల్లినప్పటికీ.. అందులోని డేటాను విజయవంతంగా తిరిగి పొందామన్నారు. అలాగే డీకోడ్ కూడా చేయగలిగామని రామ్మోహన్ నాయుడు వెల్లడించారు. భారత దేశంలో ఈ తరహా సాంకేతిక విజయం సాధించడం ఇదే మొదటి సారి అని అన్నారు. ఇది దర్యాప్తు బలాన్ని పెంచుతుందని సూచించారు. అలాగే భవిష్యత్తులో ఇలాంటి ప్రమాదాలు జరగకుండా నివారించడానికి ప్రభుత్వం పలు చర్యలు తీసుకుంటున్నట్లు మంత్రి వివరించారు. దేశంలోని విమానాశ్రయాలను అభివృద్ధి చేయడంతో పాటు విస్తరణ పనులను కూడా చేపడుతున్నట్లు తెలిపారు.

అంతేకాకుండా విమానయాన రంగంలో ఉన్న సిబ్బంది కొరతను అధిగమించేందుకు.. అనేక చర్యలు తీసుకుంటున్నామని స్పష్టం చేశారు. ఖాళీగా ఉన్న పోస్టులలో దాదాపు 90 శాతం వరకు భర్తీ ప్రక్రియ కొనసాగుతోందని మంత్రి రామ్మోహన్ నాయుడు పార్లమెంటుకు తెలియజేశారు.