స్కూళ్లలో అవి తప్పనిసరి,,,విద్యార్థుల భద్రతపై సీబీఎస్‌ఈ కీలక ఆదేశాలు

దేశవ్యాప్త తమ పరిధిలోని పాఠశాలల్లో భద్రతా ప్రమాణాలను మరింత బలోపేతం చేయడమే లక్ష్యంగా సెంట్రల్ బోర్డ్ ఆఫ్ సెకండరీ ఎడ్యుకేషన్ సోమవారం కీలక మార్గదర్శకాలను జారీచేసింది. స్కూళ్లలో హై-రెజల్యూషన్ ఆడియోవిజువల్ సీసీటీవీ కెమెరాలను తప్పనిసరిగా ఏర్పాటుచేయాలని సీబీఎస్ఈ ఆదేశించింది. తాజా మార్గదర్శకాల ప్రకారం.. పాఠశాలల ప్రవేశ, నిష్క్రమణ ద్వారాలు, కారిడార్లు, మెట్ల మార్గాలు, తరగతి గదులు, ల్యాబొరేటరీలు, లైబ్రరీలు, క్యాంటీన్లు, స్టోర్ రూమ్‌లు, క్రీడా స్థలాలు వంటి సామూహిక ప్రదేశాల్లో సీసీటీవీలు తప్పనిసరి. అయితే, టాయిలెట్లు, వాష్‌రూములను మాత్రం వీటి నుంచి మినహాయించింది.

సీసీటీవీ కెమెరా వ్యవస్థలు రియల్‌టైమ్ ఆడియో విజువల్ మానిటరింగ్‌కు అనుకూలంగా ఉండాలి.. వాటి రికార్డింగులను కనీసం 15 రోజులు భద్రపరచాలి. అవసరమైతే సంబంధిత అధికారులకు ఈ వీడియోలు సమర్పించాల్సి ఉంటుంది. అంతేకాదు, స్కూల్ మేనేజ్‌మెంట్ ఈ రికార్డుల బ్యాకప్‌ను కూడా ఏర్పాటు చేయాలని సీబీఎస్‌ఈ పేర్కొంది. కాగా, విద్యార్థులపై ఒత్తిడికి తగ్గించేందుకు ఏటా రెండుసార్లు పరీక్షలు నిర్వహించాలని సీబీఎస్ఈ నిర్ణయించింది.

పాఠశాలల్లో చిన్నారుల భద్రత, సంరక్షణపై జాతీయ బాలల హక్కుల పరిరక్షణ కమిషన్  సిఫార్సులకు అనుగుణంగా మార్గదర్శకాలను సీబీఎస్‌ఈ రూపొందించింది. మార్గదర్శకాల్లో మానసిక, శారీరక భద్రతపై ప్రత్యేకంగా దృష్టిసారించాల్సిన అవసరం ఉన్నట్లు తెలిపింది. విద్యార్థులపై జరిగే దాడులు, మానసిక ఒత్తిళ్లు విద్యావ్యవస్థలో దుష్పరిణామాలకు దారితీస్తాయని, పాఠశాల్లో జరిగే అకారణ దాడులను గుర్తించేలా జాగ్రత్త వహించాలని సీబీఎస్ఈ హితవు తెలిపింది.

ఈ భద్రతా ప్రమాణాలను పాటించని పాఠశాలలకు బోర్డు అనుమతి రద్దు చేస్తామని సీబీఎస్ఈ స్కూల్ మేనేజ్‌మెంట్‌లను హెచ్చరించింది. ఉపాధ్యాయులు, సిబ్బంది, విద్యార్థులు, సందర్శకులు, ఔట్‌సోర్స్ ఉద్యోగులు భద్రత పట్ల బాధ్యతగా వ్యవహరించాలని సెంట్రల్ బోర్డ్ ఆఫ్ సెకెండరీ ఎడ్యుకేషన్ సూచించింది. కాగా, ఇటీవల కాలంలో స్కూళ్లలో విద్యార్థులపై భౌతిక దాడులు, లైంగిక వేధింపుల ఘటనలు ఆందోళనకు గురిచేస్తున్నాయి. పాఠశాలల్లో విద్యార్థుల భద్రత విషయంలో చర్యలు తీసుకోవడం లేదనే విమర్శల నేపథ్యంలో సీబీఎస్‌ఈ తాజగా మార్గదర్శకాలను విడుదల చేసింది. అయితే, టాయిలెట్లు, వాష్‌రూమ్‌ల వద్ద మాత్రం వ్యక్తిగత గోప్యతకు భంగం కలిగించకుండా ఉండేందుకు ఆ ప్రాంతాల్లో సీసీటీవీ కెమెరాలను ఏర్పాటుచేయవద్దని సూచించింది.