ఉపవాసం అయిపోయిన తరవాత ఏం తింటే మంచిది

ఉపవాసం ఉండడం చాలా మందికి అలవాటు. దీన్నే ఒక్క పొద్దు అంటారు. ఉపవాసం ఉండడం వెనక ముఖ్యంగా రెండు కారణాలుంటాయి. ఒకటి ఆధ్యాత్మికం, మరోటి ఆరోగ్యం. ఆధ్యాత్మికం విషయానికొస్తే చాలా మంది ఏదో ఓ రోజు భక్తితో తినడం మానేస్తారు. ఇంకొందరు జీర్ణ శక్తి పెంచుకోడానికని, లేదా పొట్టలో ఇంకేదైనా ఇబ్బంది అనిపించినప్పుడు ఉపవాసం ఉంటారు. కారణం ఏదైనా పాటించేది మాత్రం ఒకటే.

అయితే..ఉపవాసం ఉండడం అంటే కొన్ని గంటల పాటు ఏమీ తినకుండా ఉండడం. దీని వల్ల శరీరానికి అందాల్సిన శక్తి కాస్త తగ్గుతుంది. మరీ ఎక్కువ గంటల పాటు బ్రేక్ ఇచ్చి తింటే గ్యాస్, అసిడిటీ లాంటి సమస్యలు వస్తాయి. అయితే..ఉపవాసం అయిపోయిన తరవాత ఎలాంటి ఫుడ్ తీసుకుంటే మంచిదో తెలుసుకోవాలి. ఆ సమయంలో సరైన ఆహారం తీసుకుంటేనే బాడీ రీఛార్జ్ అవుతుంది. మరి ఉపవాసం పూర్తైన తరవాత ఏ ఆహారం తీసుకోవాలో చూద్దాం.

ఉపవాసం

ఉపవాసం ఉన్నప్పుడు కొంత మంది రోజంతా తినడం మానేస్తారు. ఇంకొందరు ఓ పూట మాత్రమే ఉంటారు. ఎవరు ఎలా పాటించినా దీని వల్ల ఆరోగ్యం అందుతుంది. జీర్ణ శక్తిపై ఒత్తిడి పడినట్టు అనిపించినా, ఇంకేదైనా ఇబ్బంది ఉన్నా ఓ పూట తినడం మానేయడమే మంచిది. అందుకే పెద్దలు లంకణం పరమౌషధం అంటారు. ఇదంతా బాగానే ఉంది. ఓ రోజు లేదా పూట తినడం మానేస్తారు సరే. మరి ఉపవాసం పూర్తైపోయిన తరవాత ఏం చేయాలి. ఇదే ముఖ్యం. ఎందుకంటే అన్ని గంటల గ్యాప్ తరవాత తీసుకునే ఆహారం జీర్ణ వ్యవస్థపై కచ్చితంగా ప్రభావం చూపిస్తుంది. అందుకే ఆ సమయంలో ఎలాంటి ఫుడ్ తీసుకోవాలో తెలుసుకోవాలి. ఇప్పుడు దీని గురించే చెప్పుకోబోతున్నాం.

ఏం తింటే మంచిది

ఉపవాసం పూర్తైన వెంటనే కార్బొహైడ్రేట్స్ అధికంగా ఉన్న ఆహారం తీసుకోకూడదు. అందుకు బదులుగా పోషకాలు ఎక్కువగా ఉండే ఫుడ్ తీసుకోవాలి. దీంతో పాటు షుగర్ డ్రింక్స్ పొరపాటున కూడా తాగకూడదు. అంత గ్యాప్ తరవాత డ్రింక్స్ తాగితే ఒక్కసారిగా షుగర్ లెవెల్స్ పెరిగిపోతాయి. దీని వల్ల ఇంకాస్త ఆకలి పెరుగుతుంది. ఎప్పుడు మీరు ఫాస్టింగ్ చేయాలన్నా సరే క్రేవింగ్స్ పెరిగిపోతాయి. హంగర్ హార్మోన్స్ విడుదలవ్వడమే ఇందుకు ప్రధాన కారణం. అందుకే..కూల్ డ్రింక్స్ అవాయిడ్ చేయాలి. ఫాస్టింగ్ అయిపోయిన వెంటనే మొట్ట మొదట చేయాల్సిన పని బాడీని హైడ్రేట్ చేసుకోవడం. అలా అని ఒకేసారి ఎక్కువ నీళ్లు తీసుకోకూడదు. కొంచెం కొంచెంగా తాగాలి. నీళ్లతో పాటు సూప్స్ తీసుకోవడం కూడా మంచిదే. కొబ్బరి నీళ్లు తాగితే ఇంకా బెటర్. వీటి వల్ల బాడీలో ఎలక్ట్రోలైట్స్ పెరుగుతాయి. బాడీ చాలా త్వరగా యాక్టివ్ అవుతుంది.

ఇవి కూడా బెటర్

ఉపవాసం పూర్తైన తరవాత యోగర్ట్ లాంటి ఫర్మెంటెడ్ ఫుడ్స్ తీసుకుంటే చాలా మంచిది. లేదా పెరుగన్నం కూడా తినవచ్చు. దీని వల్ల జీర్ణ శక్తికి కావాల్సిన మంచి బ్యాక్టీరియాని పెంచుకోవచ్చు. ఆకు కూరలు తప్పనిసరిగా డైట్ లో చేర్చుకోవాలి. పాలకూర చాలా కీలకం. ఉపవాసం పూర్తైన తరవాత శరీరానికి పోషకాలు ఎక్కువగా అందాల్సి ఉంటుంది. పాలకూర ఇందుకు బెస్ట్ ఛాయిస్. ఇది సులువుగా జీర్ణ అవడంతో పాటు న్యూట్రియెంట్స్ బాగా అందుతాయి. పైగా వీటిలో కేలరీలు తక్కువ. విటమిన్స్, మినరల్స్, ఫైబర్ ఎక్కువ. కూరగాయలు తప్పనిసరిగా తినాలి. ముఖ్యంగా ఫైబర్ ఎక్కువగా ఉండేవి తీసుకోవాలి. క్యారట్స్, క్యాప్సికమ్ లాంటివి తీసుకుంటే చాలా మంచిది. వీటితో పాటుగా తప్పనిసరిగా తీసుకోవాల్సినవి గుడ్లు. వీటిలో ప్రొటీన్స్ ఎక్కువగా ఉంటాయి. సులువుగా జీర్ణం అవుతాయి.

పండ్లు, వెజిటబుల్ జ్యూస్‌లు

వెజిటబుల్ జ్యూస్ లు కూడా తీసుకోవడం చాలా మంచిది. వీటిలో శరీరానికి కావాల్సిన విటమిన్స్, మినరల్స్ ఉంటాయి. వీటితో పాటు పుష్కలంగా యాంటీ ఆక్సిడెంట్స్ ఉంటాయి. వీటి వల్ల జీర్ణ వ్యవస్థ మెరుగవుతుంది. ఉపవాసం అయిపోగానే పెద్ద మొత్తంలో సాలిడ్ ఫుడ్ తీసుకునే బదులుగా ఇలా కూరగాయల జ్యూస్ లు తీసుకుంటే చాలా మంచిది. పండ్లు కూడా తక్షణమే శక్తినిస్తాయి. వీటిలో కార్బొహైడ్రేట్స్, విటమిన్స్ ఉంటాయి. ఎనర్జీ లెవెల్స్ ని పెంచుతాయి. పైగా వాటర్ కంటెంట్ ఉండడం వల్ల బాడీ హైడ్రేట్ అవుతుంది. పీనట్ బట్టర్ లాంటివి తీసుకున్నా మంచిదే. ఇందులో బ్లడ్ షుగర్ లెవెల్స్ ని కంట్రోల్ చేసే గుణాలుంటాయి. పైగా ఫైబర్ ఎక్కువగా ఉండడం వల్ల సులువుగా జీర్ణం అవుతుంది.

లీన్ మీట్ 

ఉపవాసం తరవాత తప్పకుండా తినాల్సిన వాటిలో లీన్ మీట్ కూడా ఉంది. అంటే చికెన్ లేదా ఫిష్ తినాలి. ఇక వీటితో పాటు హెల్తీ ఫ్యాట్స్ ఎక్కువగా ఉండే కొబ్బరి నూనె, ఆలివ్ ఆయిల్ వాడితే మంచిది. అవకాడో, నెయ్యి లాంటివి చేర్చుకుంటే త్వరగా ఎనర్జీ లెవెల్స్ పెరుగుతాయి. దీంతో పాటు బ్లడ్ షుగర్ లెవెల్స్ స్టేబుల్ గా ఉంటాయి. మరో ముఖ్యమైన విషయం ఏంటంటే..వీటి వల్ల శరీరానికి కావాల్సిన పోషకాలు సరైన విధంగా అందుతాయి. బఠాణిలు తిన్నా కావాల్సిన ఎనర్జీ వచ్చేస్తుంది.