ఇంగ్లండ్‌ గడ్డపై,,,హిస్టరీ క్రియేట్ చేసిన హర్మన్ ప్రీత్ కౌర్

టీమిండియా ఉమెన్స్ టీమ్ కెప్టెన్ హర్మత్ ప్రీత్ కౌర్ ఇంగ్లండ్ గడ్డపై రికార్డు సృష్టించింది. చెస్టర్ లీ స్ట్రీట్‌లో ఇంగ్లండ్‌తో జరుగుతున్న మూడో వన్డేలో సెంచరీతో వీరంగం సృష్టించింది. ఇంగ్లండ్‌లో మూడో శతకం నమోదు చేసిన హర్మన్ ప్రీత్ కౌర్ .. ఇప్పటి వరకు ఎవ్వరికీ దక్కని రికార్డును సొంతం చేసుకుంది. మిథాలీ రాజ్, మేగ్ లానింగ్‌లను అధిగమించి తన పేరును చిరస్థాయిగా నిలుపుకొంది.

ఇంగ్లండ్ - భారత్ మహిళా జట్ల మధ్య జరుగుతున్న వన్డే సిరీస్‌లో భాగంగా చెస్టర్ లీ స్ట్రీట్‌లో మంగళవారం మూడో వన్డే జరిగింది. ఈ మ్యాచ్‌లో 84 బంతుల్లో 102 పరుగులు చేసిన హర్మన్ ప్రీత్ కౌర్ తన వన్డే కెరీర్‌లో 7వ శతకాన్ని నమోదు చేయగా.. ఇంగ్లండ్‌లో ఇది మూడోది కావడం విశేషం. ఇంగ్లండ్‌ గడ్డపై మూడు వన్డే సెంచరీలు చేసిన తొలి విదేశీ మహిళా క్రికెటర్‌గా హర్మన్ ప్రీత్ రికార్డు నెలకొల్పింది. ఇంతకు ముందు భారత్‌కు చెందిన మిథాలీ రాజ్, ఆస్ట్రేలియా మాజీ కెప్టెన్ మేగ్ లానింగ్ వీరిద్దరూ ఇంగ్లండ్‌లో రెండు వన్డే సెంచరీలతో ఉన్నారు.

ఈ వన్డేలో 82 బంతుల్లోనే సెంచరీ పూర్తి చేసిన హర్మన్ ప్రీత్ కౌర్ భారత మహిళల తరఫున రెండో వేగవంతమైన బ్యాటర్‌గా నిలిచింది. గతంలో స్మృతి మంధాన 70 బంతుల్లో సెంచరీ పూర్తి చేసింది. అదేవిధంగా భారత్ తరఫున వన్డేల్లో 4000 పరుగులు చేసిన మూడో మహిళా క్రికెటర్‌గా కూడా హర్మన్ నిలిచింది. మిథాలీ రాజ్, స్మృతి మంధాన తర్వాత ఆమె ఈ ఘనత సాధించింది. ఇంగ్లండ్ గడ్డపై మిథాలీ రాజ్ తర్వాత 1000 వన్డే పరుగులు పూర్తి చేసిన రెండో భారతీయ మహిళగా నిలిచింది.

మ్యాచ్ విషయానికి వస్తే టాస్ గెలిచిన టీమిండియా తొలుత బ్యాటింగ్ ఎంచుకుంది. ఓపెనర్లు ప్రతికా రావల్, స్మృతి మంధాన తొలి వికెట్‌కు 64 పరుగులతో శుభారంభం అందించగా.. మిగతా బ్యాటర్లు కూడా అదే ఊపు కొనసాగించారు. దాంతో భారత మహిళా జట్టు 50 ఓవర్లలో 5 వికెట్ల నష్టానికి 318 పరుగులు చేసింది.

ప్రతిక రావెల్ 33 బంతుల్లో 26, స్మృతి మంధాన 54 బంతుల్లో 5 ఫోర్లతో 45 పరుగులు చేసి అవుటయ్యారు. హర్లీన్ డియోల్ 65 బంతుల్లో 45 పరుగులు చేయగా, కెప్టెన్ హర్మన్ ప్రీత్ కౌర్ 84 బంతుల్లో 14 ఫోర్లతో 102 పరుగులు చేసి అవుటయింది. జెమీమా రోడ్రిగ్స్ 45 బంతుల్లో 50 పరుగులు చేయగా, రిచా ఘోష్ 18 బంతుల్లో మూడు ఫోర్లు, రెండు సిక్సర్లతో 38 పరుగులతో నాటౌట్‌గా నిలిచింది.