అటాడుకొంటుండగా...బిందలోె ఇరుకొన్న చిన్నారి తల

మూడేళ్ల పసి వయసు.. తెలిసీ తెలియని ప్రాయం.. ఏది కనిపించినా ఆడుకోవాలని అనిపిస్తుంది.. ఏ వస్తువైనా కొత్తగానే అనిపిస్తుంది. అలా ఓ మూడేళ్ల చిన్నారి తెలియక చేసిన పని.. రెండు గంటల పాటు ఉక్కిరిబిక్కిరయ్యేలా చేసింది. ఆంధ్ర ఒడిశా సరిహద్దు ప్రాంతమైన మల్కన్‌గిరి జిల్లా కోరుకొండ సమితిలో ఈ ఘటన చోటుచేసుకుంది.

ప్రదీప్ బిశ్వాస్ అనే వ్యక్తి.. మార్కెట్లో కొత్తగా బిందెను కొన్నాడు. ఆ బిందెను ఇంటికి తీసుకువచ్చాడు. అయితే తండ్రి తన కోసం ఏదో కొత్త బొమ్మ తెచ్చాడని బిశ్వాస్ కొడుకు తన్మయ్ మురిసిపోయాడు. ఆ బిందెను తీసుకుని ఆడుకోవటం మొదలెట్టాడు. చిన్నారి సరదాగా ఆడుకుంటున్నాడులే అనుకుని ప్రదీప్ బిశ్వాస్ కూడా కాస్త ఏమరుపాటుగా ఉండిపోయాడు. అయితే ఇదే సమయంలో చిన్నారి తల ప్రమాదవశాత్తు బిందెలో ఇరుక్కుపోయింది. తల బిందెలో చిక్కుకుపోవటంతో చిన్నారి ఊపిరాడక బాధతో విలవిలలాడిపోయాడు.

చిన్నారి బాధను చూడలేక ప్రదీప్ బిశ్వాస్, అతని కుటుంబసభ్యులు తల్లడిల్లిపోయారు బిందెలో ఇరుక్కుపోయిన తన్మయ్ తలను వెలికి తీసేందుకు శాయశక్తులా ప్రయత్నించారు. అయితే ఎలాంటి ఉపయోగం లేకుండా పోయింది. దీంతో ప్రదీప్ బిశ్వాస్ కుటుంబసభ్యులు వెంటనే అగ్నిమాపక సిబ్బందికి సమాచారాన్ని అందించారు. హుటాహుటిన ఘటనాస్థలికి చేరుకున్న అగ్నిమాపక సిబ్బంది తమ వద్ద ఉన్న యంత్రాలతో బిందెలో ఇరుక్కుపోయిన చిన్నారి తలను బయటకు తీసేందుకు తీవ్రంగా ప్రయత్నించారు. సుమారు రెండు గంటల ప్రయత్నం తర్వాత గండం గడిచింది. బిందెలో ఇరుక్కున్న తన్మయ్‌ తలకి ఎలాంటి గాయం కాకుండా బయటకి తీయడంతో అందరూ ఊపిరి పీల్చుకున్నారు.

దీంతో తన బిడ్డను కాపాడిన అగ్నిమాపక సిబ్బందికి ప్రదీప్ బిశ్వాస్ కృతజ్ఞతలు తెలియజేశారు. అగ్నిమాపక సిబ్బంది సకాలంలో స్పందించడంతోనే బిడ్డ ప్రాణాలు నిలిచాయని స్థానికులు ప్రశంసిస్తున్నారు. మరోవైపు చిన్నారుల వద్ద బొమ్మలు ఉంచే సమయంలో అప్రమత్తంగా ఉండాలని అధికారులు సూచిస్తు్న్నారు. ఏ మాత్రం ఏమరుపాటుగా ఉన్న చిన్నారులకు ప్రమాదం జరిగే అవకాశాలు ఉన్న వస్తువులను వారికి దూరంగా ఉంచడం మంచిందంటున్నారు. ముఖ్యంగా బ్యాటరీలతో నడిచే కార్లు, వాహనాలు, మింగేందుకు అవకాశం ఉన్న చిన్న బొమ్మలు వంటివి చిన్నారులకు వీలైనంత దూరంగా ఉంచాలని.. లేదా ఎవరైనా పర్యవేక్షణలోనే అలాంటి వాటితో ఆడించాలని చెప్తున్నారు.