ఏపీలోని ఆటోడ్రైవర్లకు ఆర్థిక సాయం.. ఆ రోజే అకౌంట్లోకి డబ్బులు..

ఏపీలోని ఆటోడ్రైవర్లకు ఆంధ్రప్రదేశ్ ప్రభుత్వం గుడ్ న్యూస్ వినిపించింది. ఆటోడ్రైవర్లకు ఆర్థిక సాయం అందించనుంది. మహిళలకు ఉచిత బస్సు ప్రయాణం పథకం ప్రారంభించే ఆగస్ట్ 15వ తేదీన ఆటోడ్రైవర్లకు కూడా ఆర్థిక సాయం అందించనుంది. ఈ విషయాన్ని సీఎం నారా చంద్రబాబు నాయుడు ఇప్పటికే ప్రకటించగా.. తాజాగా ఏపీ వ్యవసాయ శాఖ మంత్రి కింజరాపు అచ్చెన్నాయుడు కూడా ఇదే విషయాన్ని వెల్లడించారు. ఆర్టీసీ బస్సులలో మహిళలకు ఉచిత బస్సు ప్రయాణం కల్పిస్తే.. తమ ఉపాధి దెబ్బతినే అవకాశం ఉందని ఆటోడ్రైవర్ల నుంచి ఆవేదన వ్యక్తమవుతోంది. పొరుగున ఉన్న తెలంగాణలోనూ ఇదే విషయమై ఆటోడ్రైవర్ల నుంచి అసంతృప్తి, ఆందోళన వ్యక్తమైన సంగతి తెలిసిందే. ఈ నేపథ్యంలోనే ఏపీ ప్రభుత్వం ఇలాంటి ఇబ్బందులు రాకుండా.. మహిళలకు ఫ్రీ బస్ జర్నీ అమలు చేయనున్న ఆగస్ట్ 15వ రోజునే ఆటోడ్రైవర్లకు కూడా ఆర్థిక సాయం అందించాలని నిర్ణయించినట్లు సమాచారం.

మరోవైపు తెలంగాణలో మహాలక్ష్మి పథకం పేరుతో మహిళలకు ఉచిత బస్సు ప్రయాణం పథకం అమలు చేస్తున్నారు. మహాలక్ష్మి పథకం కింద తెలంగాణ వ్యాప్తంగా ఆర్డినరీ, ఎక్స్‌ప్రెస్ బస్సులలో ఉచిత బస్సు ప్రయాణం సదుపాయం కల్పిస్తున్నారు. అయితే మహిళలకు ఉచిత బస్సు పథకం కారణంగా తమ ఉపాధి దెబ్బతిందని, ఆటోలు ఎక్కేవారు లేకుండా పోయారని ఆటోడ్రైవర్లు వాపోతున్నారు. ఆటో నడుపుతూ నాలుగు రాళ్లు వెనకేసుకునే తమకు.. గిరాకీలు పడిపోయాయని ఆవేదన చెందుతున్నారు. ఈ క్రమంలోనే ఏపీ ప్రభుత్వం ముందుచూపుతో.. ఆటోడ్రైవర్లకు ఆర్థిక సాయం అందిస్తామని ప్రకటించిందని విశ్లేషకులు అభిప్రాయపడుతున్నారు.

మరోవైపు ఏపీలోనూ రాష్ట్రవ్యాప్తంగా ఉచిత బస్సు ప్రయాణం పథకం అమలు చేయనున్నారు. ఐదు రకాల బస్సు సర్వీసులలో మహిళలకు ఉచిత ప్రయాణ సదుపాయం కల్పిస్తామని మంత్రి అచ్చెన్నాయుడు ప్రకటించిన సంగతి తెలిసిందే. పల్లెవెలుగు, ఎక్స్‌ప్రెస్, సిటీ ఆర్డినరీ, సిటీ ఎక్స్‌ప్రెస్ వంటి బస్సులలో ఉచిత బస్సు ప్రయాణ సదుపాయం అమలుచేసే అవకాశాలు ఉన్నట్లు తెలిసింది.

ఈ సందర్భంగా మహిళలకు జీరో ఫేర్ టికెట్లు ఇవ్వాలని సీఎం చంద్రబాబు ఇప్పటికే రవాణాశాఖ అధికారులకు సూచించారు. అందులో ప్రయాణం వివరాలు, పథకంతో ఆదా అయిన డబ్బుల వివరాలు వంటవి పొందుపరచాలని సూచించారు. మొత్తంగా ఎన్నాళ్లుగానో ఎదురుచూస్తున్న ఉచిత బస్సు ప్రయాణం పథకం ఆగస్టు 15 నుంచి ఏపీలోని మహిళలకు అందుబాటులోకి రానుంది.