రోజుకు ఇంత కడితే ,,,,ఒకేసారి చేతికి రూ.40 లక్షలు..

కేంద్ర ప్రభుత్వం సామాన్య, మధ్య తరగతి ప్రజలను పొదుపు వైపు ప్రోత్సహించేందుకు చాలా రకాల చిన్న మొత్తాల పొదుపు పథకాలను అందిస్తోంది. పోస్టాఫీసుతో పాటు బ్యాంకుల ద్వారా ఈ పథకాలు నిర్వహిస్తోంది. ఈ పథకాల్లో ఎలాంటి రిస్క్ లేకుండా గ్యారెంటీ రిటర్న్స్ ఉంటాయి. కేంద్ర ప్రభుత్వ హామీ ఉండడంతో ప్రజల నుంచి మంచి ఆదరణ లభిస్తోంది. అలాగే ఈ పథకాలకు ఆదాయపు పన్ను మినహాయింపులు సైతం ఉండడం పొదుపు చేసేందుకు ఆకర్షిస్తాయి. అయితే, భవిష్యత్తు ఆర్థిక లక్ష్యాలకు అనువైన పథకాన్ని ఎంచుకుని పెట్టుబడి పెట్టాల్సి ఉంటుంది. చాలా మంది పోస్టాఫీసు ద్వారా స్మాల్ సేవింగ్స్ స్కీమ్స్ లో పొదుపు చేస్తుంటారు. అందులో ఒక అద్భుతమైన పథకం గురించి ఇప్పుడు తెలుసుకుందాం.

అదే పబ్లిక్ ప్రావిడెంట్ ఫండ్ . దీర్ఘకాలంలో పెద్ద మొత్తంలో రాబడి కోరుకునే వారు ఇందులో పొదుపు చేయవచ్చు. గరిష్ఠంగా పొదుపు చేస్తూ స్కీమ్ పొడిగించుకుంటూ వెళ్తే కోటీశ్వరులు సైతం కావచ్చు. ఇందులో చక్రవడ్డీ మ్యాజిక్ చేస్తుంది. అంటేవడ్డీపైన వడ్డీ జనరేట్ అవుతుంది. ఈ స్కీమ్ మెచ్యూరిటీ టెన్యూర్ 15 సంవత్సరాలుగా ఉంటుంది. ఆ తర్వాత ప్రతి 5 సంవత్సరాలకు ఒకసారి పొడిగించుకోవచ్చు. ఇందులో ప్రస్తుతం వడ్డీ రేటు 7.1 శాతంగా అందిస్తోంది కేంద్రం. అయితే, ప్రతి మూడు నెలలకు ఒకసారి వడ్డీ రేట్లు సమీక్షిస్తుంది. కొన్నిసార్లు మార్చుతుంది. గత కొన్ని నెలలుగా పీపీఎఫ్ వడ్డీ రేటును స్థిరంగా కొనసాగిస్తోంది.

పీపీఎఫ్ అకౌంట్ మెచ్యూరిటీ కాల వ్యవధి 15 సంవత్సరాలుగా ఉంటుంది. ఇందులో కనీస పెట్టుబడి ఏడాదికి రూ.500 ఉండగా గరిష్ఠంగా రూ.1.50 లక్షలుగా ఉంది. గరిష్ఠ పెట్టుబడి అంటే ఏడాదికి లక్షా యాభై వేలు పెట్టుబడి పెడితే అనుకున్న లక్ష్యాన్ని చేరుకోవచ్చు. ప్రతి నెలా రూ.12,500 అంటే రోజుకు దాదాపు రూ.411 పడుతుంది. ఇలా రోజుకు రూ.411 చొప్పున చెల్లిస్తే ఏడాదికి రూ.1.50 లక్షలు అవుతుంది. 15 సంవత్సరాల పాటు ఇలా చెల్లిస్తూ వెళ్తే 7.1 శాతం వడ్డీ రేటుతో రూ.40 లక్షలు చేతికి అందుతాయి.

ఇందులో మీ పెట్టుబడి రూ.22 లక్షల 50 వేలు అవుతుంది. దీనిపై వడ్డీ రూపంలోనే రూ.18 లక్షల 18 వేలకుపైగా జమ అవుతుంది. అంటే 15 సంవత్సరాల తర్వాత మీ చేతికి రూ.40 లక్షల 68 వేలకు పైగా లభిస్తాయి. దీనిని మరో 5 సంవత్సరాలు పొడిగించినట్లయితే మీ చేతికి రూ.50 లక్షలకు పైగానే అందే అవకాశం ఉంటుంది. ఆ తర్వాత సైతం కొనసాగితే చేతికి పెద్ద మొత్తంలో వస్తుంది.