కేరళ రాజకీయాల్లో కేంద్ర మంత్రి సురేష్ గోపి అదృశ్యం

కేరళ రాజకీయాల్లో ప్రస్తుతం వింత వివాదం చోటుచేసుకుంది. త్రిస్సూర్ ఎంపీగా ఎన్నికైన కేంద్ర మంత్రి సురేష్ గోపి గత రెండు నెలలుగా తమ నియోజకవర్గంలో కనిపించడం లేదంటూ కేరళ విద్యార్థి సంఘం (కేఎస్‌‌‌‌యూ) పోలీసులకు ఫిర్యాదు చేసింది. ఈ ఒక్క ఫిర్యాదు రాజకీయ వర్గాల్లో తీవ్ర చర్చకు దారితీసింది. ప్రజాప్రతినిధిగా ప్రజలకు అందుబాటులో ఉండాల్సిన వ్యక్తి అదృశ్యమవ్వడంపై కేఎస్‍యూ ఆగ్రహం వ్యక్తం చేసింది.

కేరళ విద్యార్థి సంఘం జిల్లా అధ్యక్షుడు గోకుల్ గురువాయూర్ త్రిస్సూర్ ఈస్ట్ పోలీస్ స్టేషన్‌‌లో ఈ మేరకు ఫిర్యాదు చేశారు. గత రెండు నెలలుగా సురేష్ గోపి తన నియోజకవర్గ ప్రజలకు అందుబాటులో లేరని.. ఆయన ఎక్కడ ఉన్నారో తెలియడం లేదని ఫిర్యాదులో పేర్కొన్నారు. త్రిస్సూర్ మేయర్, రాష్ట్ర రెవెన్యూ మంత్రి వంటి కీలక అధికారులు కూడా సురేష్ గోపిని సంప్రదించడానికి చేసిన ప్రయత్నాలు విఫలం అయ్యాయని గురువాయూర్ తెలిపారు. ఈ పరిస్థితి నియోజకవర్గ ప్రజలకు తీవ్ర ఇబ్బందులను కలిగిస్తోందని వెల్లడించారు.

ముఖ్యంగా ఛత్తీస్‌గఢ్‌లో మలయాళీ సన్యాసినుల అరెస్ట్ కేసు తర్వాత... ఆ ఘటన అవాస్తవమని సురేష్ గోపి వ్యాఖ్యానించినప్పటి నుంచి ఆయన నియోజకవర్గంలో కనిపించడం లేదని కేఎస్‌యూ ఆరోపించింది. ప్రస్తుతం నియోజకవర్గంలో అనేక వివాదాలు, సమస్యలు ఉన్నప్పటికీ, వాటిపై సురేష్ గోపి ఏమాత్రం స్పందించడం లేదని.. ప్రతిపక్షాల డిమాండ్లను పట్టించుకోవడం లేదని విద్యార్థి సంఘం విమర్శించింది. ప్రజా సమస్యల పరిష్కారంలో ఆయన పూర్తిగా విఫలం అయ్యారని కేఎస్‌యూ తీవ్రంగా ఖండించింది. అందుకే ఆయన అదృశ్యంపై పోలీసులు విచారణ జరపాలని డిమాండ్ చేస్తూ.. తమ నిరసనలను మరింత ఉధృతం చేస్తామని కేఎస్‌యూ స్పష్టం చేసింది.

కేరళ నుంచి ఎన్నికైన ఏకైక, మొదటి బీజేపీ ఎంపీగా సురేష్ గోపి విజయం సాధించారు. అయితే ఆయనపై వచ్చిన ఈ ఆరోపణలు, నియోజకవర్గంలో ఆయన ఉనికిపై ప్రశ్నలు రేకెత్తిస్తున్నాయి. ప్రజలకు అందుబాటులో లేకపోవడం అనేది ఒక ప్రజాప్రతినిధికి ఉండకూడని లక్షణం. ఈ వ్యవహారం రానున్న రోజుల్లో కేరళ రాజకీయాల్లో మరింత చర్చకు దారితీసే అవకాశం ఉంది.