"4 Days Trip: హైదరాబాద్ to అరుణాచలం.. తక్కువ ఖర్చుతో భక్తి యాత్ర"

దేశంలోని ప్రముఖ శైవ పుణ్యక్షేత్రాల్లో అరుణాచలం ప్రత్యేక స్థానం కలిగిఉంది. ప్రతి రోజూ లక్షలాది మంది భక్తులు దర్శనం కోసం తరలివస్తుంటారు. దక్షిణాది రాష్ట్రాల నుంచే కాకుండా దేశంలోని వివిధ ప్రదేశాల నుంచి కూడా భక్తులు ఇక్కడికి వస్తారు.అరుణాచలంలో గిరి ప్రదక్షిణకు ప్రత్యేకమైన ప్రాధాన్యం ఉంది. పంచభూత లింగాలలో ఒకటైన ఈ దేవాలయం చుట్టూ పౌర్ణమి రోజున గిరి ప్రదక్షిణ చేయడానికి భక్తులు భారీ సంఖ్యలో తరలివస్తారు. ‘అరుణ’ అంటే ఎరుపు, ‘అచలం’ అంటే కొండ అనే అర్థం వస్తుంది. కాబట్టి దీనికి ‘ఎర్రని కొండ’ అనే అర్థం వస్తుంది. తమిళంలో దీనిని తిరువన్నామలై అని పిలుస్తారు. శైవభక్తులు తిరువన్నామలైని కైలాస పర్వతానికి సమానంగా భావిస్తారు. ‘తిరు’ అంటే శ్రీ, ‘అణ్ణామలై’ అంటే పెద్ద కొండ అని అర్థం. తెలుగు రాష్ట్రాల నుంచీ ప్రతిరోజూ వేలాదిమంది భక్తులు ఈ పవిత్రక్షేత్రాన్ని దర్శిస్తుంటారు.ఈ పుణ్యక్షేత్రానికి వెళ్లే భక్తుల కోసం తెలంగాణ టూరిజం ప్రత్యేక ప్యాకేజీని ప్రకటించింది. రాబోయే సెప్టెంబర్ నెల తేదీలను కూడా తాజాగా విడుదల చేసింది. హైదరాబాద్ నుంచి బయల్దేరే ఈ టూర్ ప్యాకేజీ ప్రత్యేకంగా గిరి ప్రదక్షిణ కోసం వెళ్లే భక్తులను దృష్టిలో ఉంచుకుని అందుబాటులోకి తెచ్చారు. ఈ టూర్‌ను తెలంగాణ టూరిజం గత కొంతకాలంగా నిరంతరం నిర్వహిస్తూ, ప్రతి నెలా తేదీలను ముందుగానే ప్రకటిస్తోంది.
HYDERABAD - ARUNACHALAM టూర్ మొత్తం 4 రోజులు కొనసాగుతుంది. సెప్టెంబర్ నెలలో 5, 12, 19, 26 తేదీల్లో బస్సులు హైదరాబాద్ నుంచి బయల్దేరుతాయి. టికెట్లు ముందుగానే బుక్ చేసుకోవడానికి Telangana Tourism Website లో అవకాశం ఉంది.టూర్ షెడ్యూల్ ప్రకారం మొదటి రోజు సాయంత్రం 6:30 గంటలకు హైదరాబాద్ బషీర్‌బాగ్ నుండి బస్సు బయల్దేరుతుంది. మధ్యలో కాణిపాకం ఆలయాన్ని దర్శించిన తర్వాత అరుణాచలం చేరుకుంటారు. అరుణాచల దర్శనం తర్వాత భక్తులు వేలూరు శ్రీపురం గోల్డెన్ టెంపుల్ ను కూడా సందర్శించే అవకాశం ఉంటుంది. నాలుగో రోజు తిరిగి హైదరాబాద్ చేరుకోవడంతో ఈ యాత్ర ముగుస్తుంది.టూర్ ప్యాకేజీ ధర పెద్దలకు ఒక్కొక్కరికి రూ. 8,000, పిల్లలకు రూ. 6,400 గా నిర్ణయించారు.