వారానికి 3 సార్లు జామ ఆకు తినండి, షుగర్ మీ జోలికి రాదు, మరెన్నో సమస్యలు దూరం

ప్రకృతి ఎన్నో ఔషధాలకు నిలయం. మామూలు మూలికల్లోనూ ఎంతో గొప్ప ఔషధ గుణాలుంటాయి. ముఖ్యంగా ఎందుకూ పనికి రావు అనుకున్న ఆకులు కూడా ఆరోగ్యాన్ని అందిస్తాయి. అలాంటి వాటిలో చాలా కీలకంగా చెప్పుకోవాల్సింది జామ ఆకుల గురించే. చిన్నప్పుడు జామ ఆకుల్లో చింతపండు, చక్కెర, ఉప్పు పెట్టుకుని తినే వారు చాలా మంది. తెలియకుండానే ఆరోగ్యాన్ని పొందే వారు. జామకాయల్లో ఎన్నో పోషకాలుంటాయని అంతా అనుకుంటారు. అయితే..అదే స్థాయిలో జామ ఆకుల్లోనూ పోషకాలు ఉంటాయి. సరైన విధంగా వాడడం తెలిస్తే ఈ ఆకులతోనే ఎన్నో అనారోగ్యాలను దూరం పెట్టవచ్చు. మరి ఈ ఆకుల్లో ఎలాంటి న్యూట్రియెంట్స్ ఉంటాయి. వీటి ద్వారా ఆయా అనారోగ్యాల నుంచి ఎలా దూరంగా ఉండవచ్చు. ఈ వివరాలు తెలుసుకుందాం.

జామలో పోషకాలు

జామ కాయ రుచి చాలా తీపిగా ఉంటుంది. కానీ..ఇది కేవలం రుచికోసమే కాదు. అంతకు మించి ఆరోగ్యాన్ని అందించడంలోనూ తోడ్పడుతుంది. జామ కాయలో విటమిన్ సి, ఎ ఉంటాయి. వీటితో పాటు పుష్కలంగా ఐరన్ ఉంటుంది. వాతావరణం చల్లగా ఉన్నప్పుడు సరైన విధంగా శరీరానికి పోషకాలు, మినరల్స్ అందాలంటే జామకాయ అందుకు బెస్ట్ ఆప్షన్. ఆయుర్వేదం ప్రకారం జామ కాయకు ఎంతో ప్రాధాన్యత ఉంది. కేవలం కాయలకే కాదు. ఈ చెట్టు ఆకులకు కూడా ఎంతో ప్రాధాన్యతను కల్పించింది ఆయుర్వేదం. వీటితో ఎన్నో ఆరోగ్య ప్రయోజనాలు పొందవచ్చు. చెడు కొలెస్ట్రాల్ ని తగ్గించడం నుంచి బరువు తగ్గడం, షుగర్ కంట్రోల్ చేయడం లాంటి లాభాలనూ అందిస్తుంది. అందుకే..వారానికి కనీసం మూడు సార్లు అయినా పరగడుపున జామ ఆకు తినాలని సూచిస్తున్నారు ఎక్స్ పర్ట్స్. మరి ఇలా చేయడం వల్ల ఎలాంటి హెల్త్ బెనిఫిట్స్ ఉంటాయో వివరంగా తెలుసుకుందాం.

జీర్ణ శక్తికి

మీకు జీర్ణ సమస్యలు ఉండి ఏం చేయాలో అర్థం కాకపోతే..సింపుల్ గా ఇప్పుడు చెప్పినట్టుగా ఓ చిట్కా ఫాలో అయిపోండి. అసిడిటీ తరచూ వస్తున్నా..జామ ఆకులతో సమస్యను దూరం చేసుకోవచ్చు. జీర్ణ వ్యవస్థలో ఉన్న చెడు బ్యాక్టీరియాని తొలగించడంలో జామ ఆకులు ఎంతో తోడ్పడతాయి. ముఖ్యంగా మలబద్ధకాన్ని తగ్గించడంలో సాయ పడతాయి. అంతే కాదు. డయేరియా లాంటి ఆహారం ద్వారా వచ్చే వ్యాధుల నుంచీ రక్షిస్తాయి.

మరి ఎలా తీసుకోవాలో తెలుసా. జామ ఆకులను నీటిలో వేసి బాగా మరిగించాలి. పది నిముషాల పాటు మరిగించిన తరవాత ఆకులను వడబోసి ఆ నీటిని గ్లాసులోకి తీసుకోవాలి. పరగడుపున ఈ రసం తాగాలి. రుచి కాస్త వగరుగా అనిపించినప్పటికీ దీని వల్ల ఎన్నో ప్రయోజనాలుంటాయి. మరీ టేస్ట్ నచ్చకపోతే అందులో కాస్త తేనె కలుపుకుంటే సరిపోతుంది. ఇలా చేయడం వల్ల యాంటీ ఆక్సిడెంట్స్ సరైన విధంగా శరీరానికి అందుతాయి. టాక్సిన్స్ అన్నీ బయటకు వెళ్లిపోతాయి.

షుగర్ కంట్రోల్

ఆయుర్వేదం ప్రకారం..జామ ఆకులు బ్లడ్ షుగర్ లెవెల్స్ ని కంట్రోల్ చేయడంలో ఎంతో తోడ్పడతాయి. ఇందులో యాంటీ ఆక్సిడెంట్స్ ఎక్కువగా ఉండడమే ఇందుకు కారణం. డయాబెటిస్ తో ఇబ్బంది పడుతున్న వారు రోజూ జామ ఆకు పరగడుపున తినడం చాలా మంచిది. ముఖ్యంగా ఇన్సులిన్ సెన్సివిటీని పెంచడంలో జామ ఆకులు ఎంతో తోడ్పడతాయి. రోజూ పరగడుపున ఉదయమే జామ ఆకులు నమిలి తినడం వల్ల కేవలం డయాబెటిస్ కంట్రోల్ అవడమే కాదు. మెటబాలిజం కూడా మెరుగవుతుంది. అదే సమయంలో లివర్ పని తీరు కూడా మెరుగవుతుందని చెబుతున్నారు ఎక్స్ పర్ట్స్. ఈ ఆకుల్లోని పోషకాలు లివర్ డిటాక్స్ కి సాయపడతాయి. కాలేయం సరైన విధంగా పని చేసేందుకు సహకరిస్తాయి. రోజు వారీ డైట్ లో జామ ఆకులను చేర్చుకోవడం ద్వారా జీర్ణ సమస్యలను తొలగించుకోవడంతో పాటు ఇప్పుడు చెప్పిన అన్ని ప్రయోజనాలు పొందవచ్చు.

బరువు తగ్గేందుకు

డయాబెటిస్ ని కంట్రోల్ చేయడం మాత్రమే కాదు. అంతకి మించిన ఓ ప్రయోజనాన్ని అందిస్తాయి జామ ఆకులు. అదేంటంటే..ఆకలిని నియంత్రిస్తాయి. ముఖ్యంగా అనారోగ్యకరమైన ఆకలిని తగ్గిస్తాయి. ఎక్కువగా స్నాక్స్ తినే అలవాటు ఉన్న వారు చాలా త్వరగా లావైపోతారు. ఏవి పడితే అవి తినడం వల్ల బరువు పెరుగుతారు. అలాంటి ఇబ్బంది లేకుండా ఆకలిని కంట్రోల్ చేస్తాయి జామ ఆకులు. అంతే కాదు. ఒంట్లో పేరుకున్న కొవ్వుని వేగంగా కరిగించడంలోనూ సాయపడతాయి. ఫలితంగా బరువు తగ్గేందుకు వీలుంటుంది. బరువు తగ్గాలని చూసే వారు తప్పనిసరిగా రోజూ జామ ఆకులు తినడం మంచిది. జామ ఆకుల్లో క్వెర్సెటిన్, ఫ్లేవనాయిడ్స్ లాంటి యాంటీ ఆక్సిడెంట్స్ ఉంటాయి. ఇవి ఫ్రీ ర్యాడికల్స్ నుంచి శరీరాన్ని కాపాడతాయి. ఇదే సమయంలో డ్యామేజ్ అయిన లివర్స్ సెల్స్ ని బాగు చేస్తాయి. టాక్సిన్స్ ని బయటకు పంపుతాయి.

గుండె సేఫ్

జామ ఆకులతో గుండె భద్రంగా ఉంటుంది. ఇందులో బయోయాక్టివ్ కంపౌడ్స్ ఎక్కువగా ఉంటాయి. ఇవి గుండె జబ్బులు రాకుండా అడ్డుకుంటాయి. అంతే కాదు. ఇందాకే చెప్పుకున్నట్టుగా ఇందులో ఫ్లేవనాయిడ్స్ ఉంటాయి. ఇవి లిపోప్రొటీన్ కొలెస్ట్రాల్ లెవెల్స్ ని కంట్రోల్ లో ఉంచుతాయి. అంటే..చెడు కొవ్వు తగ్గిపోతుంది. ఫలితంగా గుండె జబ్బులు రాకుండా ఉంటాయి. ఇక ఇమ్యూనిటీ పెంచడంలోనూ జామ ఆకులు ఎంతో ఉపయోగపడతాయి. వీటిని నేచురల్ ఇమ్యూనిటీ బూస్టర్ గా పరిగణిస్తారు. బ్రాంకైటిస్, పంటి నొప్పి, అలెర్జీలు లాంటి వాటి నుంచి ఉపశమనం పొందేందుకు జామ ఆకులను విరివిగా వినియోగిస్తారు. గొంతునొప్పి నుంచి రిలీఫ్ వస్తుంది. హానికరమైన రసాయనాలను శరీరంలో నుంచి బయటకు పంపిస్తాయి.