బ్రహ్మోత్సవాలు సిరిసిల్లలో ఘనంగా ప్రారంభం..! తిరుమల వాహన సర్వీసులు అందరూ ఆస్వాదించం

కార్మిక ప్రాంతంగా పేరుగాంచిన రాజన్న సిరిసిల్ల జిల్లా కేంద్రంలోని శ్రీశాల లక్ష్మీ వేంకటేశ్వరస్వామి ఆలయంలో బ్రహ్మోత్సవాలు ఘనంగా ప్రారంభమైనాయి.స్నపన తిరుమంజనంతో ప్రారంభమైన ఈ ఉత్సవాలు అక్టోబర్ 8 వరకు కొనసాగనున్నాయి. ప్రత్యేకంగా, ఈ ఉత్సవాలు తిరుమల శ్రీవారి బ్రహ్మోత్సవాల తరహాలోనే ఘనంగా నిర్వహించబడుతున్నాయి. స్వామివారి వాహనసేవలు, భారీ రథోత్సవం ఈ ఉత్సవాలకు ప్రత్యేక ఆకర్షణగా నిలుస్తున్నాయి.ఉత్సవాలలో మంగళవారం ఉదయం ఆలయంలో ఆరాధన, సేవాకాలం, బాలభోగం, నివేదన, శాత్తుమురై కార్యక్రమాలు జరిగాయి. తరువాత శాంతిపాఠం, యాగశాల ప్రవేశం, ద్వారతోరణం, ధ్వజకుంభారాధన, చతుస్థానార్చన, మూర్తిమంత్ర హోమం, ధ్వజారోహణ, గరుడ ప్రసాద వితరణ కార్యక్రమాలు జ‌రిపారు. సాయంత్రం సామూహిక విష్ణు సహస్రనామ స్తోత్రపారాయణం, భేరీపూజ, దేవతాహ్వానం, హోమం, నివేద, తీర్థ ప్రసాద వితరణ వంటి కార్యక్రమాలు కొనసాగాయి. అనంతరం స్వామివారు శేషవాహనంపై విహరించారు.అక్టోబర్ 1 ఉదయం స్వామివారికి ప్రత్యేక పూజలు, హోమాలు, పూర్ణాహుతి నిర్వహించబడతాయి. సాయంత్రం స్వామివారు హంసవాహనంపై శ్రీశాల వీధుల్లో విహరించి భక్తులను ఆశీర్వదిస్తారు.దసరా రోజైన అక్టోబర్ 2న ఉదయం స్వామివారి సింహవాహన సేవ జరుగుతుంది. సాయంత్రం అశ్వవాహనంపై స్వామివారు విహరిస్తూ సిరిసిల్ల మానేరు నదీ తీరానికి చేరుకుంటారు. అక్కడ శమీ దర్శనం జరుగుతుంది.అక్టోబర్ 3 ఉదయం స్వామివారు ప్రీతికరమైన గరుడవాహనంపై విహరిస్తారు. అలాగే, ఎదుర్కోలు ఉత్సవం, కల్యాణ వేడుకలు కూడా జరిగే అవకాశం ఉంది.రాత్రి స్వామివారు హనుమంత వాహనంపై విహరిస్తారు.4న ఉదయం స్వామివారు సూర్యప్రభ వాహనంపై, సాయంత్రం చంద్రప్రభ వాహనాలపై నుంచి భక్తులను ఆశీర్వదిస్తారు.5న ఆండాళ్ అమ్మవారికి ఒడిబియ్యం సమర్పణ జరుగుతుంది. రాత్రి గజవాహన సేవ ఉంటుంది.6న రాత్రి పొన్నవాహన సేవ నిర్వహణ జరుగుతుంది.7వ తేదీ పౌర్ణమి రోజున ఉదయం నుంచి స్వామివారు రథంపై దర్శనం ఇస్తారు. సాయంత్రం 5 గంటలకు రథోత్సవం జరుగుతుంది. రాత్రి అశ్వవాహన సేవతో ఉత్సవాలు కొనసాగుతాయి.8వ తేదీ, ఉత్సవాల చివరి రోజున చక్రస్నానం, పుష్పయాగం, ధ్వజా అవరోహణం, ఏకాంత సేవలతో బ్రహ్మోత్సవాలు ముగుస్తాయి.