నిమిషాల్లో రూ.895 కోట్ల విలువైన నగలు కొట్టేసిన చిల్లర దొంగలు!

పారిస్‌లోని ప్రఖ్యాత లవ్రే మ్యూజియంలో అక్టోబరు 19న జరిగిన చోరీ ఘటన యావత్తు ప్రపంచాన్ని నివ్వేరపోయేలా చేసింది. కేవలం నిమిషాల వ్యవధిలో విలువైన ఆభరణాలు సహా రూ. 895 కోట్ల విలువైన వస్తువులను దొంగలు ఎత్తుకెళ్లారు. తాజాగా, ఈ కేసులో విస్తుపోయే విషయం వెలుగులోకి వచ్చింది. చిన్న చిన్న చోరీలు చేసే ఓ సాధారణ దొంగల ముఠా మ్యూజియంలో ఆభరణాలు ఎత్తుకెళ్లినట్టు పారిస్ ప్రాసిక్యూటర్ లారే బేకువా వెల్లడించారు. అత్యంత భద్రత కలిగిన లవ్రే మ్యూజియంలో దోపిడీని కరుడుగట్టిన నేరస్థుల ముఠా చేయలేదని చెప్పారు. సాధారణ నేరాలకు పాల్పడే ముఠాయే ఈ చోరీ చేసుంటుందని లారే బేకువా పేర్కొన్నారు. కాగా, దీని తర్వాత ఫ్రాన్స్‌లోని మరో మ్యూజియంలోనూ చోరీ జరిగిన సంగతి తెలిసిందే.

మ్యూజియం చోరీ కేసులో నలుగురు అనుమానితుల్లో ఇప్పటి వరకూ ముగ్గురిని అరెస్టు చేసినట్లు ఆయన వెల్లడించారు. వ వారి నేర చరిత్రను పరిశీలిస్తే వ్యవస్థీకృత ముఠాకు చెందిన దొంగలుగా కనిపించడం లేదని ఆయన అన్నారు. గతంలో శివారు ప్రాంతాల్లో వారు చిన్న చిన్న నేరాలకు పాల్పడినట్లు అభియోగాలు ఉన్నాయని వివరించారు. అరెస్టయిన ముగ్గురూ స్థానికులేనని, వారిలో ఒక మహిళ కూడా ఉందని, ఆమె వీరిలో ఒకరికి గర్ల్ ఫ్రెండ్ అని ప్రాసిక్యూటర్ లారే బేకువా వెల్లడించారు.

పరారీలో ఉన్న నాలుగో వ్యక్తి కోసం గాలిస్తున్నామని, దోపిడీకి ప్రధాని సూత్రధాని అతడే అయి ఉంటాడని ఫ్రాన్స్ హోం మంత్రి లారెన్ నిజ్ పేర్కొన్నారు. చోరీ అనంతరం వజ్రాలు, వైఢూర్యాలు పొదిగిన బంగారు కిరీటంతో పాటు వారు ఉపయోగించిన కొన్ని పరికరాలు, గ్లోవ్స్‌ను అక్కడే వదిలేసి పరారయ్యారని ఆయన చెప్పారు. ఘటనా స్థలిలో పరిస్థితులను చూస్తే ఇది వ్యవస్థీకృత నేరాల ముఠా పనిగా కనిపించడం లేదని ఆయన అభిప్రాయపడ్డారు.

గత నెల 19న పట్టపగలే పారిస్‌లోని లవ్రే మ్యూజియంలో చోరీ జరిగింది. మ్యూజియం వెనుక భాగం నుంచి దుండగులు లోనికి ప్రవేశించారు. రెండో అంతస్తులోని నెపోలియన్ కాలం నాటి వస్తువులు, ఆభరణాలు ఉన్న గ్యాలరీలోకి చొరబడి అందులోని తొమ్మిది వస్తువులను ఎత్తుకెళ్లారు. వీటి విలువ 88 మిలియన్ యూరోలు (భారత కరెన్సీలో దాదాపు రూ. 895 కోట్లు)గా అంచనా వేశారు.

చోరీ జరిగిన వారం తర్వాత అనుమానితులుగా భావిస్తోన్న ఇద్దర్ని పోలీసులు అరెస్ట్ చేశారు. వీరిలో ఒకరు 2010 నుంచి ఫ్రాన్స్‌లో నివసిస్తున్న అల్జీరియా పౌరుడు. అల్జీరియాకి విమానం ఎక్కే ప్రయత్నంలో అతడ్ని పారిస్ ఎయిర్‌పోర్ట్‌లోనే అరెస్ట్ చేశారు. అరెస్టైన ఈ ఇద్దరు అనుమానితులు ఉత్తర పారిస్‌లోని అబేరివిల్లిరీస్‌లోని ఓ ఇంట్లో ఉంటున్నట్టు చెప్పారు.