AP Rains Update: రెండు అల్పపీడనాలు రూపం.. పలు జిల్లాల్లో భారీ వర్షాల అలెర్ట్!

రాష్ట్ర వాతావరణంపై ప్రస్తుతం రెండు అల్పపీడనాల ప్రభావం కనిపిస్తోందని ఏపీ వాతావరణ శాఖ తెలిపింది. వీటి ప్రభావంతో పలు జిల్లాల్లో భారీ నుండి అతిభారీ వర్షాలు కురిసే అవకాశం ఉన్నట్లు సూచించింది.నైరుతి బంగాళాఖాతం–శ్రీలంక తీర ప్రాంతంలో కొత్తగా అల్పపీడనం ఏర్పడినట్టు విపత్తుల నిర్వహణ సంస్థ ఎండీ ప్రఖర్ జైన్ తెలిపారు. ఈ వ్యవస్థకు అనుబంధంగా ఉన్న ఉపరితల ఆవర్తనం సముద్ర మట్టానికి 5.8 కిలోమీటర్ల ఎత్తు వరకు విస్తరించి ఉందని చెప్పారు. రాబోయే 24 గంటల్లో ఇది పశ్చిమ–వాయువ్య దిశగా క్రమంగా కదిలే అవకాశం ఉందని వెల్లడించారు. దీని కారణంగా దక్షిణ కోస్తా ప్రాంతాల్లో గంటకు 35–55 కిమీ వేగంతో ఈదురుగాలులు వీచవచ్చని పేర్కొన్నారు. ప్రజలు అప్రమత్తంగా ఉండాలని, సోమవారం వరకు మత్స్యకారులు సముద్రంలోకి వెళ్లకూడదని ఆయన హెచ్చరించారు.
*మూడు రోజుల పాటు ఏపీలో వర్షాలు సోమవారం (17–11–2025) న నెల్లూరు, అన్నమయ్య, చిత్తూరు, తిరుపతి జిల్లాల్లో పిడుగులతో కూడిన మోస్తరు నుంచి భారీ వర్షాలు పడే అవకాశం ఉందని విపత్తుల నిర్వహణ సంస్థ తెలిపింది. అలాగే ప్రకాశం, కడప జిల్లాల్లో తేలికపాటి నుండి మోస్తరు వర్షాలు నమోదయ్యే సూచనలు ఉన్నాయి.
-పిడుగులతో కూడిన వర్షాల హెచ్చరిక మంగళవారం (18–11–2025) రోజున నెల్లూరు, తిరుపతి జిల్లాల్లో పిడుగులతో వచ్చే భారీ వర్షాలు కురిసే అవకాశం ఉందని అంచనా వేశారు. ప్రకాశం, సత్యసాయి, కడప, అన్నమయ్య, చిత్తూరు జిల్లాల్లో కూడా తేలికపాటి నుండి మోస్తరు వర్షాలు కురిసే అవకాశం ఉందని తెలిపారు.నవంబర్ 21న మరో అల్పపీడనం ఇప్పటికే ఏర్పడిన అల్పపీడనం ప్రభావం కొనసాగుతుండగా—నవంబర్ 21 నాటికి ఆగ్నేయ బంగాళాఖాతంలో మరో కొత్త అల్పపీడనం పుట్టే అవకాశం ఉందని ఎండీ ప్రఖర్ జైన్ పేర్కొన్నారు. ప్రస్తుత వాతావరణ సూచనలు పరిశీలిస్తే, ఈ రెండవ వ్యవస్థ ప్రభావంతో నవంబర్ 24 నుండి 27 వరకు కోస్తాంధ్ర, రాయలసీమ జిల్లాల్లో మోస్తరు నుంచి భారీ వర్షాలు కురిసే అవకాశం ఉంది. ఈ నేపథ్యంలో రైతులు తమ వ్యవసాయ పనుల్లో ముందస్తు జాగ్రత్తలు తీసుకోవాలని అధికారులు సూచిస్తున్నారు.