కందనకాయల్ని వీరు తింటే ఏమవుతుందో తెలుసా

సండే వచ్చిందంటే చాలు చాలా మంది చికెన్, మటన్, ఫిష్ తినడానికి ఇష్టపడతారు. ఇప్పటికే కార్తీక మాసం అయిపోయింది. నెల రోజుల పాటు నోళ్లు కట్టుకున్న నాన్ వెజ్ ప్రియులు ముక్క తినడానికి రెడీ అయిపోయారు. ఇక, చాలా మంది చికెన్‌ను ఇష్టంగా తింటారు. చికెన్ ఫ్రై, చికెన్ పులుసు, చికెన్ బిర్యానీ, చికెన్ 65 ఇలా రకరకాలుగా ఓ పట్టు పట్టేస్తుంటారు.

చికెన్‌ కూడా ప్రోటీన్, విటమిన్లు, ఖనిజాలకు మంచి వనరు. కండరాల నిర్మాణం, బరువు నిర్వహణ కోసం చాలా మంది చికెన్ తింటారు. జిమ్‌కు వెళ్లే వాళ్లు ప్రోటీన్ కోసం చికెన్ లాగిస్తుంటారు. ఇక, చికెన్‌లో కూడా చాలా భాగాలు ఉంటాయి. చికెన్ బ్రెస్ట్, చికెన్ లెగ్స్, లివర్, కందనకాయలు (రాతి గుండెలు) ఇలా సపరేటుగా వండుకుని తినే వాళ్లు ఉన్నారు.

చాలా మందికి చికెన్ గిజార్డ్స్ అదేనండీ.. కందనకాయలు అంటే ఎంతో ఇష్టం. తక్కువ బడ్జెట్‌లో ఎక్కువ పోషకాలు లభిస్తాయి. కందనకాయల్ని ఫ్రై చేసుకుని చాలా మంది ఇష్టంగా లాగిస్తారు. అయితే, ఎన్నో పోషకాలు ఉన్నప్పుటికీ.. కొన్ని అనారోగ్య సమస్యలతో బాధపడేవారు కందనకాయలు తినకూడదంటున్నారు డాక్టర్ సంతోష్ జాకబ్. ఆయన ప్రకారం కందనకాయలు తినడం వల్ల లాభాలు, ఎవరు తినకూడదో పూర్తి వివరాలు ఇప్పుడు తెలుసుకుందాం.

చికెన్ గిజార్డ్స్ తినడం వల్ల లాభాలు

చెన్నైలోని ఏజ్‌లెస్ ఫిట్‌నెస్‌లో ఒబేసిటీ మేనేజ్‌మెంట్ అండ్ ఎక్సర్‌సైజ్ మెడిసిన్ HOD డాక్టర్ సంతోష్ జాకబ్ ప్రకారం.. ప్రతి చికెన్ గిజార్డ్ దాదాపు 30 నుంచి 40 గ్రాములు ఉంటుంది. 7 నుంచి 10 గ్రాముల ప్రోటీన్ కలిగి ఉంటుంది. జింక్, సెలీనియం వంటి పోషకాలు ఉంటాయి.

ప్రోటీన్ కోసం చూసేవాళ్లు వీటిని ఎంచక్కా తినవచ్చు. విటమిన్ బి12 పుష్కలంగా ఉంటుంది. ఈ పోషకాలు కండరాల పెరుగుదలకు తోడ్పడతాయి. రోగనిరోధక శక్తిని పెంచుతాయి. అయితే, కొన్ని సమస్యలు ఉన్నవారు అస్సలు తినకూడదు. వాళ్లు ఎవరంటే..

యూరిక్ యాసిడ్

ఈ రోజుల్లో చాలా మంది యూరిక్ యాసిడ్ సమస్యతో బాధపడుతున్నారు. అలాంటి వారు కందనకాయలకు దూరంగా ఉండాలని నిపుణులు చెబుతున్నారు. కందనకాయల్లో ప్యూరిన్ ఎక్కువగా ఉంటుంది. శరీరం ప్యూరిన్‌లను విచ్ఛిన్నం చేసినప్పుడు, అది యూరిక్ యాసిడ్‌ని తయారు చేస్తుంది. రక్తంలో ఎక్కువ యూరిక్ ఆమ్లం గౌట్‌ సమస్యలకు దారి తీస్తుంది. అంటే కీళ్ల నొప్పులు ఎక్కువైపోతాయి. ఇప్పటికే యూరిక్ యాసిడ్ సమస్యతో బాధపడేవారు కందనకాయలు తినకూడదని డాక్టర్ చెబుతున్నారు.

అధిక కొలెస్ట్రాల్ సమస్య ఉన్నవారు

​అధిక కొలెస్ట్రాల్ సమస్య ఈ రోజుల్లో సర్వసాధారణమై పోయింది. చాలా మంది ఈ సమస్యతో బాధపడుతున్నారు. కొలెస్ట్రాల్ ఎక్కువైతే.. గుండెపోటు, స్ట్రోక్ వంటి ప్రాణాంతక పరిస్థితులు తలెత్తవచ్చు. అందుకే హై కొలెస్ట్రాల్‌తో బాధపడేవారు చికెన్ గిజార్డ్స్ తినకూడదని నిపుణులు చెబుతున్నారు. ఒక కందనకాయ ముక్కలో చాలా తక్కువ కొవ్వు ఉంటుంది. అయితే, చాలా మంది వీటిని ఫ్రై చేసి ఎక్కువ మోతాదులో తింటారు. దీంతో కొలెస్ట్రాల్ ఎక్కువగా ఉంటుంది. అందుకే ఈ సమస్య ఉన్నవారు వీటిని తినకూడదు.

బరువు తగ్గాలనుకునేవారు

కండ బలం పెంచుకోవడానికి చికెన్ గిజార్డ్స్ బెస్ట్ ఆప్షన్ అంటున్నారు డాక్టర్. ఎందుకంటే ఇందులో ప్రోటీన్ ఎక్కువ ఉంటుంది. అయితే, బరువు తగ్గాలనుకునేవారికి మాత్రం ఇది బ్యాడ్ ఛాయిస్ అంటున్నారు నిపుణులు. చాలా మంది కందనకాయల్ని డీప్ ఫ్రై చేసుకుని తింటారు. దీంతో వీటిలో సోడియం, కొవ్వు పరిమాణం చాలా పెరిగిపోతుంది. దీంతో, వీటిని తినడం వల్ల ఊబకాయం పరిస్థితి తలెత్తవచ్చు. అందుకే బరువు తగ్గాలనుకునేవారు వీటిని తినకూడదంటున్నారు నిపుణులు.

అధిక రక్తపోటు

అధిక రక్తపోటుతో బాధపడేవారు కూడా చికెన్ గిజార్డ్స్ తినే విషయంలో అప్రమత్తంగా ఉండాలి. వీటిని డీప్ ఫ్రై చేసినప్పుడు సోడియం లెవల్స్ పెరుగుతాయి. ఇవి అధిక రక్తపోటుతో బాధపడేవారికి మంచివి కావు. సోడియం లెవల్స్ పెరిగితే.. హై బీపీ రీడింగ్ దాటిపోతుంది. అందుకే ఈ సమస్యతో బాధపడేవారు కందనకాయలకు దూరంగా ఉండాలి.

ముఖ్యమైన విషయాలు

​ఏ ఆహారం అయినా మితంగా తినాలి. ఎక్కువగా తింటే అసలు సమస్యలు వస్తాయి. చికెన్ గిజార్డ్స్ విషయంలో కూడా అంతే. మితంగా తింటే మంచిది. ఎక్కువగా తింటే ఆరోగ్య సమస్యలు వస్తాయని నిపుణులు అంటున్నారు.

అంతేకాకుండా చికెన్ గిజార్డ్స్‌ను బాగా ఉడకబెట్టుకుని వండుకోవాలని నిపుణులు సూచిస్తున్నారు. అంతేకాకుండా డీప్ ఫ్రై కూడా అవాయిడ్ చేస్తే మంచిది.