ఏపీలో 8 వేలకోట్లతో స్టీల్ ఫ్యాక్టరీ.. ఆ ప్రాంతం దశ తిరిగినట్లే

విజయనగరం జిల్లా చీపురుపల్లి నియోజకవర్గ ప్రజలకు శుభవార్త. చీపురుపల్లి నియోజకవర్గ పరిధిలో స్టీల్ ప్లాంట్ ఏర్పాటు చేయనున్నట్లు స్థానిక ఎమ్మెల్యే కిమిడి కళా వెంకటరావు వెల్లడించారు. చీపురుపల్లి నియోజకవర్గంలోని మెరకముడిదాం మండలంలో పలు కుటుంబాలు తెలుగుదేశం పార్టీ చేరాయి. ఈ సందర్భంగా కిమిడి కళా వెంకట్రావు వారికి కండువాలు కప్పి పార్టీలోకి ఆహ్వానించారు. అనంతరం మాట్లాడిన కిమిడి కళా వెంకటరావు.. చీపురుపల్లి నియోజకవర్గ అభివృద్ధి కోసం కృషి చేస్తున్నట్లు తెలిపారు. అందులో భాగంగా చీపురుపల్లి నియోజవర్గంలో 8 వేల కోట్ల రూపాయలతో స్టీల్ ఫ్యాక్టరీ ఏర్పాటుచేయనున్నట్లు వెల్లడించారు. స్టీల్ ఫ్యాక్టరీ ఏర్పాటుతో స్థానిక యువతకు ఉద్యోగ, ఉపాధి అవకాశాలు లభిస్తాయన్నారు.

మరోవైపు చీపురుపల్లి నియోజకవర్గం పరిధిలోని గుర్ల మండలంలో ఇంటిగ్రేటెడ్ స్టీల్ ప్లాంట్ ఏర్పాటు చేయనున్నారు. కెల్ల సమీపంలో ఈ స్టీల్ ప్లాంట్ ఏర్పాటుకు ఏపీ ప్రభుత్వం గ్రీన్ సిగ్నల్ ఇచ్చింది. సూపర్ స్మెల్టర్స్ లిమిటెడ్ సంస్థ ఈ స్టీల్ ప్లాంట్ ఏర్పాటు చేయనుంది. ఈ స్టీల్ ప్లాంట్ కోసం ఏపీ ప్రభుత్వం కెల్ల సమీపంలో 1,085 ఎకరాల భూమిని కేటాయించింది. ఈ స్టీల్ ప్లాంట్ ప్రాజెక్టు కోసం సూపర్ స్మెల్టర్స్ లిమిటెడ్ సంస్థ రూ. 8,570.50 కోట్లు పెట్టుబడి పెడుతోంది. ఈ స్టీల్ ప్లాంట్ ద్వారా ఏటా 2 మిలియన్ టన్నుల స్టీలును ఉత్పతి చేయాలని లక్ష్యంగా పెట్టుకున్నారు. రెండు దశల్లో ఈ స్టీల్ ప్లాంట్ నిర్మాణం కానుంది. ఈ స్టీల్ ప్లాంట్ అందుబాటులోకి వస్తే 750 మందికి ప్రత్యక్షంగా ఉపాధి అవకాశాలు లభిస్తాయని అధికారుల అంచనా.

మరోవైపు గుర్ల మండలం విస్తీర్ణం పరంగా పెద్దదే అయినప్పటికీ.. ఉపాధి అవకాశాలు లేకపోవటంతో ఇక్కడి యువత ఇతర ప్రాంతాలకు వలస పోతున్నారు. ఈ నేపథ్యంలో గుర్ల మండలంలో స్టీల్ ప్లాంట్ ఏర్పాటైతే స్థానిక యువతకు ఉపాధి లభించే అవకాశాలు ఉన్నాయి. అలాగే కెల్ల సమీపంలోనే గడిగడ్డ రిజర్వాయర్‌తో పాటుగా.. తారకరామ తీర్థసాగర్ ప్రాజెక్టులు ఉన్నాయి. దీంతో స్టీల్ ప్లాంట్‌కు కావాల్సిన నీటి అవసరాలు తీరతాయని అధికారులు అంచనా వేస్తున్నారు.

చీపురుపల్లిలో స్టీల్ ప్లాంట్ ఏర్పాటు కోసం కొన్ని గ్రామాల్లో సర్వే పూర్తి చేసి.. 1,080 ఎకరాలు గుర్తించారు. అనుమతులు సకాలంలో పూర్తి అయితే నిర్మాణం చేపట్టాలని అధికారులు భావిస్తున్నారు. స్టీల్ ప్లాంట్ నిర్మాణం పూర్తి అయ్యి.. అందుబాటులోకి వస్తే.. జిల్లాలో ఉపాధి, ఉద్యోగ అవకాశాలు పెరగటమే కాకుండా.. వలసలు తగ్గుతాయని అధికారులు, ప్రభుత్వం చెప్తోంది.