ఆ జిల్లా లోని 217 మంది అంగన్వాడీ కార్యకర్తలకు ప్రమోషన్లు

ఆంధ్రప్రదేశ్ వ్యాప్తంగా 5 వేల మినీ అంగన్వాడీలను.. మెయిన్ అంగన్వాడీ కేంద్రాలుగా మార్చుతున్నట్లు ఏపీ మహిళా, శిశు సంక్షేమ శాఖ మంత్రి సంధ్యారాణి వెల్లడించారు. ఈ క్రమంలోనే పార్వతీపురం మన్యం జిల్లాలో 217 మంది అంగన్వాడీ కార్యకర్తలకు.. అంగన్వాడీ టీచర్లుగా పదోన్నతులు కల్పించనున్నట్లు వివరించారు. అంగన్వాడీ కేంద్రాలలో పిల్లల పోషణ, ఆరోగ్యం, ప్రీస్కూల్ సేవలను మరింత బలోపేతం చేయాల్సిన అవసరం ఉందని మంత్రి సంధ్యారాణి అన్నారు. అలాగే బాల్య వివాహాల నిర్మూలన కోసం కృషి చేయాల్సిన అవసరం ఉందని అభిప్రాయపడ్డారు. మరోవైపు మినీ అంగన్వాడీ కేంద్రాలను.. అంగన్వాడీ కేంద్రాలుగా మారుస్తామని ఎన్నికల సమయంలో కూటమి పార్టీలు హామీ ఇచ్చాయి.

ఇక ఇచ్చిన మాట ప్రకారం రాష్ట్రంలో 7 వేల వరకూ మినీ అంగన్వాడీ కేంద్రాలు ఉండగా.. వాటిలో 5 వేల మినీలను.. అంగన్వాడీ కేంద్రాలుగా మారుస్తున్నాయి. మినీ అంగన్వాడీ కేంద్రాలలో కేవలం అంగన్వాడీ కార్యకర్తలు మాత్రమే ఉంటారు. ఆయాలు ఉండరు. ఈ అంగన్వాడీ కార్యకర్తలే చిన్నారులు, గర్భిణులు, బాలింతలకు పౌష్ణికాహారం సహా ఇతరత్రా సేవలు అందించాల్సి ఉంటుంది. దీంతో వీరిపై పనిభారమే కాకుండా సేవల విషయంలో ఇబ్బందులు వస్తాయనే కారణంతో.. మినీ అంగన్వాడీ కేంద్రాలను.. మెయిన్ అంగన్వాడీ కేంద్రాలుగా అప్ గ్రేడ్ చేస్తున్నారు.

దీంతో అంగన్వాడీ కార్యకర్త హోదా కూడా అంగన్వాడీ టీచర్‌గా మారనుంది. అలాగే వీటిలో ఆయాలను కూడా ఏర్పాటు చేస్తారు. కార్యకర్త జీతం కూడా రూ.7000 నుంచి రూ.11,500 వరకూ పెరుగుతుందని అధికారులు చెప్తున్నారు. ఈ క్రమంలోనే పార్వతీపురం మన్యం జిల్లాలో 217 మందికి అంగన్వాడీ టీచర్లుగా పదోన్నతి కల్పిస్తున్నట్లు తాజాగా మంత్రి సంధ్యారాణి వెల్లడించారు.

ఇంటిగ్రేటెడ్ చైల్డ్ డెవలప్‌మెంట్ సర్వీసెస్ కార్యక్రమంలో భాగంగా ఏపీలో అంగన్వాడీ కేంద్రాలను ఏర్పాటు చేశారు. ఈ కేంద్రాల ద్వారా చిన్నారులు, బాలింతలు, గర్భిణులకు అవసరమైన సేవలు అందిస్తారు. ఆరేళ్లలోపు వయసు గల పిల్లలతో పాటుగా, గర్భిణులు, బాలింతలకు పోషకాహారం అందిస్తారు. చిన్నారుల ఆరోగ్య సంరక్షణతో పాటుగా వారి శారీరక, మానసిక, సామాజిక అభివృద్ధికి అంగన్వాడీ కేంద్రాల ద్వారా సహాయ సహకారాలు అందిస్తారు. అలాగే అంగన్వాడీ కేంద్రాలలో ప్రీప్రైమరీ విద్యను కూడా అందిస్తున్నారు. వీటికోసం అంగన్వాడీ టీచర్, ఆయాలను మెయిన్ అంగన్వాడీ కేంద్రాలలో ప్రభుత్వం అందుబాటులో ఉంచుతోంది.