వరుస అల్పపీడనాలు, వాయుగుండాలు.. ఈ జిల్లాల్లో నాలుగు రోజులు వర్షాలు

ఏపీవాసులకు అలర్ట్.. రాష్ట్రంలో మరికొన్ని రోజుల పాటు వర్షాలు కొనసాగనున్నాయి. మలక్కా జలసంధి ప్రాంతాల్లో వాయుగుండం కొనసాగుతోంది. ఈ వాయుగుండం పశ్చిమ వాయువ్య దిశగా కదులుతోందని ఏపీ విపత్తుల నిర్వహణ సంస్థ తెలిపింది. ఈ వాయుగుండం రాబోయే 48 గంటల్లో మరింత బలపడనుందని వెల్లడించింది. అలాగే నైరుతి బంగాళాఖాతం, దక్షిణ శ్రీలంక, హిందూ మహాసముద్రం మీదుగా మరో అల్పపీడనం కొనసాగుతోందని ఏపీ విపత్తుల నిర్వహణ సంస్థ వెల్లడించింది. ఈ అల్పపీడనం ఉత్తర- వాయువ్య దిశగా కదులుతోందని.. వచ్చే 24 గంటల్లో తీవ్ర అల్పపీడనంగా మారే అవకాశం ఉందని ఏపీ విపత్తుల నిర్వహణ సంస్థ ఎండీ ప్రఖర్ జైన్ తెలిపారు. తీవ్ర అల్పపీడనంగా మారిన 24 గంటల తర్వాత వాయుగుండంగా బలపడుతుందని తెలిపారు.

వీటి ప్రభావంతో ఆంధ్రప్రదేశ్ వ్యాప్తంగా శనివారం (నవంబర్29) నుంచి మంగళవారం వరకూ (డిసెంబర్ 2) రాయలసీమ, కోస్తాంధ్ర జిల్లాలలో మోస్తరు వర్షాలు కురిసేందుకు అవకాశాలు ఉన్నాయని ఏపీ విపత్తుల నిర్వహణ సంస్థ అంచనా వేసింది. అల్పపీడనం, వాయుగుండాల నేపథ్యంలో గురువారం నుంచి మత్స్యకారులు సముద్రంలో వేటకు వెళ్ళరాదని హెచ్చరించింది. రైతులు కూడా అప్రమత్తంగా ఉండాలని.. వ్యవసాయ పనుల్లో తగిన జాగ్రత్తలు తీసుకోవాలని ఏపీ విపత్తుల నిర్వహణ సంస్థ సూచించింది.

మరోవైపు రాష్ట్రంలో వివిధ ప్రాంతాల్లో మోస్తరు వర్షాల నేపథ్యంలో ఏపీ విపత్తుల నిర్వహణ సంస్థ రైతులకు పలు సూచనలు చేసింది. ముఖ్యంగా వరి కోతలు సాగుతున్న నేపథ్యంలో నష్టపోకుండా ఉండేందుకు కీలక సూచనలు చేసింది. అల్పపీడనాలు, వాయుగుండాల ప్రభావంతో వర్షాలు కురిసి పంటలు తడిసిపోకుండా ఉండేందుకు రైతులు వెంటనే ధాన్యం కుప్పలు వేసుకోవాలని ఏపీ విపత్తుల నిర్వహణ సంస్థ సూచించింది. ధాన్యాన్ని తడవకుండా టార్పాలిన్లు కప్పి సురక్షితంగా భద్రపరచుకోవాలని తెలిపింది.

వర్షపు నీటికి తడిచి ధాన్యం రంగుమారకుండా ఉండేందుకు జాగ్రత్తలు తీసుకోవాలని.. తడిసిన గింజలు మొలకెత్తకుండా ఉండేలా, నాణ్యత కోల్పోకుండా ఉండేలా ముందస్తు జాగ్రత్త చర్యలు తీసుకోవాలని సూచించింది. వర్షాల నేపథ్యంలో ఎవరికైనా అత్యవసర సహాయం అవసరమైతే ఏపీ విపత్తుల నిర్వహణ సంస్థ కంట్రోల్ రూమ్‍‌లో టోల్ ఫ్రీ నెంబర్లు 112,1070, 18004250101 అందుబాటులో ఉంచినట్లు తెలిపింది.