గర్భం ఎక్కడికి వెళ్తే ప్రమాదం? ఎక్టోపిక్ ప్రెగ్నెన్సీ గురించి తెలుసుకోవాల్సినది

మహిళల గర్భాశయం లోపలి భాగంలోనే పిండం పెరగడం సహజం. కానీ కొన్ని సందర్భాల్లో అండం ఫెలోపియన్ ట్యూబ్‌లోనే ఫలదీకరణం అవుతుంది. ఈ ట్యూబులు అండాశయం నుంచి అండాన్ని గర్భాశయం వైపు తీసుకెళ్లే సన్నని నాళాలు. ఇక్కడే గర్భం పెరగడం మొదలైతే దాన్ని “ఎక్టోపిక్ ప్రెగ్నెన్సీ” అంటారు. ఇది సాధారణ గర్భాల కంటే చాలా ప్రమాదకరం.
ఎక్టోపిక్ ప్రెగ్నెన్సీలో 90 శాతం కేసులు ఫెలోపియన్ ట్యూబ్‌లోనే జరుగుతాయి. మిగిలినవి అండాశయాల్లో, గర్భాశయ ముఖద్వారం దగ్గర (సర్వైకల్), లేదా కడుపు కుహరంలో కూడా ఏర్పడవచ్చు. ఈ ప్రాంతాలన్నీ పిండం పెరుగుదలకు అనుకూలం కావు. ట్యూబ్ గోడలు సన్నగా ఉంటాయి కాబట్టి పిండం పెరిగే కొద్దీ ట్యూబ్ చిట్లి రక్తస్రావం మొదలవుతుంది. ఆలస్యం చేస్తే తల్లి ప్రాణానికే ముప్పు వాటిల్లుతుంది.
ఎక్టోపిక్ గర్భం ఎందుకు వస్తుందంటే… ఫెలోపియన్ ట్యూబ్ దెబ్బ తగిలి, గాయాలు, ఇన్ఫెక్షన్లు, ముందు చేసిన శస్త్రచికిత్సలు, పెల్విక్ ఇన్ఫ్లమేటరీ డిసీజ్ (PID), ధూమపానం, 35 ఏళ్లు పైబడిన వయసు, ముందు ఎక్టోపిక్ గర్భం ఉన్న చరిత్ర – ఇవన్నీ రిస్క్‌ను పెంచుతాయి. IVF వంటి ఫెర్టిలిటీ చికిత్సలు తీసుకునే వాళ్లలోనూ కొంచెం ఎక్కువగా కనిపిస్తుంది.
మీకు ఆలస్యమైన పీరియడ్స్, కడుపు ఒకవైపు తీవ్ర నొప్పి, యోని నుంచి రక్తస్రావం, మైకం కొట్టడం, భుజం నొప్పి వస్తే వెంటనే డాక్టర్‌ని కలవాలి. అల్ట్రాసౌండ్, రక్త పరీక్షల ద్వారా త్వరగా గుర్తిస్తే మందులతోనో, అవసరమైతే చిన్న ఆపరేషన్‌తోనో సమస్యను పూర్తిగా తొలగించవచ్చు. ఆలస్యం చేయకూడదు – ప్రాణాలు ఆదా అవుతాయి, భవిష్యత్తులో మళ్లీ సంతానం కలిగే అవకాశం కూడా కాపాడుకోవచ్చు.