మామ కష్టార్జితం తీసుకోను.... పీటలపైనే ఆదర్శమైన పెళ్లి

కట్నం పూర్తిగా ఇవ్వలేదంటూ.. పీటల మీద పెళ్లిళ్లు ఆగిపోయిన సంఘటనలు మనం ఇప్పటికే ఎన్నోసార్లు చూశాం. పెళ్లి చేసుకున్న తర్వాత భర్త, అత్తమామలు కలిసి.. భార్యను వేధించడం, కొట్టడం, తిట్టడం, హింసించడం వంటివి చేస్తున్న వారిని చూస్తున్నాం. కట్నం పూర్తిగా ఇచ్చినా.. అదనపు కట్నం కోసం వేధింపులకు గురి చేసేవారిని కూడా చూస్తున్నాం. కానీ ఒక వ్యక్తి మాత్రం.. తనకు కట్నమే వద్దంటూ పీటలపైనే తెగేసి చెప్పేసి.. అందరికీ ఆదర్శమూర్తిగా మారిపోయాడు. తన మామ కష్టార్జితాన్ని తీసుకోలేనని తేల్చి చెప్పేశాడు. ఈ క్రమంలోనే పెళ్లిలో రూ.31 లక్షల కట్నం వద్దని.. ఒక్క రూపాయి మాత్రమే తీసుకున్నాడు. ఉత్తర్‌ప్రదేశ్‌లో జరిగిన ఈ సంఘటన ఇప్పుడు దేశవ్యాప్తంగా తీవ్ర ఆసక్తికరంగా మారింది.

ముజఫర్‌నగర్‌లో జరిగిన ఓ వివాహ వేడుకలో వరుడు తీసుకున్న నిర్ణయం ఇప్పుడు అందరి హృదయాలను హత్తుకుంది. కట్నంగా ఇచ్చిన భారీ మొత్తాన్ని సున్నితంగా తిరస్కరించి.. కేవలం రూ.1 శుభశకునం మాత్రమే స్వీకరించి.. ఆ యువకుడు సమాజానికి బలమైన సందేశం ఇచ్చాడు. ఆగ్రా సమీపంలో జరిగిన వివాహంలో.. ముజఫర్‌నగర్‌కు చెందిన 26 ఏళ్ల వరుడు అవధేష్ రాణా.. కట్నంగా పెళ్లి కుమార్తె కుటుంబం ఇచ్చిన రూ.31 లక్షల మొత్తాన్ని తిరస్కరించారు. నాగ్వా గ్రామానికి చెందిన కాస్మెటిక్స్ వ్యాపారి అవధేష్ రాణాకు.. సహరాన్‌పూర్ నివాసి అయిన 24 ఏళ్ల అదితి సింగ్ పెళ్లి నవంబర్ 22వ తేదీన జరిగింది.

పెళ్లిలో తిలకం కార్యక్రమంలో భాగంగా వధువు కుటుంబం రూ.31 లక్షల కట్నం అలంకరించిన పళ్లెంలో ఉంచి ఇవ్వగా.. దానికి అవధేష్ వద్దని చెప్పాడు. ఇది వధువు తండ్రి కష్టార్జితమని.. దాన్ని తీసుకునే హక్కు తనకు లేదని.. తాను దీన్ని అంగీకరించలేనని చెబుతూ డబ్బును తిరిగి ఇచ్చేశాడు. కొవిడ్ మహమ్మారి సమయంలో తండ్రి సునీల్ సింగ్‌ను కోల్పోయిన వధువు అదితి సింగ్.. ఆమె తల్లి, తాత కలిసి ఈ రూ.31 లక్షల డబ్బును ఏర్పాటు చేసింది. ఇక వరుడు తీసుకున్న ఈ నిర్ణయాన్ని అతడి తల్లిదండ్రులు కూడా సమర్థించారు.

ఈ అద్భుతమైన సంఘటన మొదట అక్కడ పెళ్లికి వచ్చిన అతిథులను ఆశ్చర్యానికి గురి చేసినప్పటికీ.. ఆ తర్వాత అందరి నుంచి ప్రశంసలు దక్కాయి. ఈ వివాహం ఇప్పుడు కట్న ఆచారంపై వ్యతిరేకతకు.. వివాహంలో సమానత్వానికి ఒక బలమైన ఉదాహరణగా నిలిచిందని స్థానికులు కొనియాడారు. అవధేష్ చేసిన ఈ పనిపైనే జిల్లా వ్యాప్తంగా చర్చ జరుగుతోందని స్థానికులు తెలిపారు.