'ఒక్క హెచ్-1బీ ఉద్యోగి 10 మంది అక్రమ వలసదారులతో సమానం

ప్రముఖ అమెరికన్ పోల్‌స్టర్, రాజకీయ వ్యాఖ్యాత అయిన మార్క్ మిచెల్ చేసిన వివాదాస్పద వ్యాఖ్యలు ప్రపంచవ్యాప్తంగా సంచలనం సృష్టిస్తున్నాయి. ముఖ్యంగా అమెరికాలోని భారతీయ నిపుణుల మధ్య తీవ్ర చర్చకు దారితీశాయి. ప్రధాన యూఎస్ కంపెనీలు తమ ఉద్యోగుల నుంచి "డీ-ఇండియనైజ్" (భారతీయులను తగ్గించుకోవడం) కావాలని ఆయన బహిరంగంగా సూచించారు. ఈ ప్రక్రియలో కంపెనీలకు సహాయం చేయడానికి తాను ఒక కొత్త కన్సల్టెన్సీని ప్రారంభించాలనుకుంటున్నట్లు ఎక్స్ వేదికగా పోస్ట్ చేశారు. ముఖ్యంగా ఒక్క హెచ్-1బీ ఉద్యోగి పది మంది అక్రమ వలసదారులతో సమానం అని చెప్పారు.

భారతీయుల ఆధిపత్యంపై విమర్శ

రాస్ముస్సెన్ రిపోర్ట్స్ హెడ్ పోల్‌స్టర్‌గా ఉన్న మార్క్ మిచెల్.. స్టీఫెన్ బ్యానన్‌తో కలిసి 'ది వార్ రూమ్' పోడ్‌కాస్ట్‌లో పాల్గొన్నారు. ఈ సందర్భంగానే ఆయన మాట్లాడుతూ.. హెచ్-1బీ వీసా ప్రోగ్రామ్‌లో భారతీయుల ఆధిపత్యంపై తీవ్ర విమర్శలు గుప్పించారు. ఒక సీనియర్ హెచ్-1బీ డెవలపర్‌ను (ఉదాహరణకు యాపిల్ వంటి పెద్ద సంస్థల నుంచి) తిరిగి పంపడం ఆర్థికంగా పది మంది అక్రమ వలసదారులను పంపడంతో సమానం అని ఆయన పేర్కొన్నారు. ఒక హెచ్-1బీ డెవలపర్ 90,000 డాలర్ల వరుకూ సంపాదిస్తే.. అది గంటకు 9 డాలర్లు సంపాదించే పది మంది అక్రమ కార్మికులను దిగుమతి చేసుకున్నట్లు అని ఆయన పోల్చారు.

అక్కడితో ఆగుకండా మిచెల్ అమెరికన్ టెక్ కంపెనీలపై తీవ్ర ఆరోపణలు గుప్పించారు. విదేశాల నుంచి వచ్చే తక్కువ ఖర్చుతో కూడిన ఇంజనీర్లపై ఆధార పడటం వల్ల అమెరికన్ ఉద్యోగులు నష్టపోతున్నారని అన్నారు. 12 మిలియన్ల మంది అమెరికన్ టెక్ ఉద్యోగులు.. తమ ఉద్యోగాలు కోల్పోవడానికి విదేశీయులే కారణమని, వీరు సిలికాన్ వ్యాలీని 'ఇండిఫికేట్' (భారతీయమయం) చేశారని ఆయన ఆరోపించారు. అలాగే సిలికాన్ వ్యాలీలో పని చేసే శ్రామిక శక్తిలో సుమారు మూడింట రెండొంతుల మంది విదేశీయులు ఉన్నారని.. వాల్‌మార్ట్ వంటి భవనాల్లో 85 నుంచి 95 శాతం మంది భారతీయ పౌరులే ఉన్నారని ఆయన పేర్కొన్నారు.

టెక్ రంగంలో మొత్తంగా 66 శాతం మంది విదేశీయులు పని చేస్తుండగా.. వీరిలో 23 శాతం మంది భారతీయులు, 18 శాతం మంది చైనీయులు ఉన్నట్లు ఒక నివేదిక తెలిపింది. మిచెల్ వ్యాఖ్యలు.. ముఖ్యంగా "డీ-ఇండియనైజ్" అనే పదం సోషల్ మీడియాలో తీవ్ర వ్యతిరేకతను ఎదుర్కొన్నాయి. అనేక మంది నెటిజెన్లు ఆయనపై జాతి వివక్ష ఆరోపణలు చేశారు.