యూపీలో పూర్తైన ఎస్ఐఆర్.. 2.89 కోట్ల ఓటర్లు తొలగింపు

ఉత్తర్‌ప్రదేశ్ ఎన్నికల సంఘం చేపట్టిన ఓటర్ల జాబితా ప్రత్యేక సవరణ ప్రక్రియ ( ఎస్ఐఆర్ ) శుక్రవారంతో ముగిసింది. ఇందులో సుమారు 15.4 కోట్ల మంది నమోదిత ఓటర్లలో 18.7 శాతం మంది అంటే దాదాపు 2.89 కోట్ల మంది వివరాలను బూత్ లెవల్ ఆఫీసర్లు (బీఎల్ఓలు) సేకరించలేకపోయారు. వీరందరినీ లెక్కించలేని ఓటర్ల జాబితాలో చేర్చారు. వీరంతా ఇతర రాష్ట్రాలకు, దేశాలకు వలస వెళ్లిన వారు, చనిపోయిన వారు, నకిలీ ఓటర్లు, డూప్లికేట్ ఓటర్లు, అందుబాటులో లేని వారిగా బీఎల్ఓలు పేర్కొన్నారు.

అయితే యూపీ ఓటర్ల తుది జాబితా.. వచ్చే ఏడాది ఫిబ్రవరి 28వ తేదీన విడుదల కానుంది. ఆ జాబితాలో ఈ 2.89 కోట్ల మంది పేర్లను తొలగించనున్నట్లు తెలుస్తోంది. ఇక ఈ తొలగించే జాబితాలో ఉన్న 2.89 కోట్ల మందిలో సుమారు 1.3 కోట్ల మంది ఓటర్లు శాశ్వతంగా ఇతర ప్రాంతాలకు వలస వెళ్లినట్లు తెలుస్తోంది. దాదాపు 45 లక్షల మంది ఓటర్లు మరణించారు. రెండు చోట్ల ఓటు హక్కు ఉండి.. స్వచ్ఛందంగా వెల్లడించిన వారు 23 లక్షల మంది ఉన్నారు. సుమారు 84.5 లక్షల మంది ఓటర్లు తమ నివాసాల వద్ద లేకపోవడం లేదా ఆచూకీ లభించకపోవడం జరిగింది.

లక్నోలో మరింత దారుణంగా పరిస్థితి

మరోవైపు.. ఉత్తర్‌ప్రదేశ్ రాజధాని లక్నోలో దాదాపు 30 శాతం మంది (12 లక్షల మంది) వివరాలు లభ్యం కాలేదు. వీరిలో 5.4 లక్షల మంది ఇతర ప్రాంతాల్లో ఓటు హక్కును ఎంచుకోగా.. 4.3 లక్షల మంది ఓటర్ల ఆచూకీ అస్సలు దొరకలేదు.

ఓటర్ల జాబితాలో తప్పులు లేకుండా చేసేందుకు ఎన్నికల సంఘం మరికొంత సమయాన్ని నిర్ణయించింది. డిసెంబర్ 31వ తేదీ వరకు ఓటర్ల ముసాయిదా జాబితాను ప్రచురించనున్నారు. డిసెంబర్ 31వ తేదీ నుంచి జనవరి 30వ తేదీ వరకు అభ్యంతరాలు, క్లెయిమ్‌ల స్వీకరణ (కొత్తగా ఓటు నమోదు లేదా మార్పుల కోసం) సమయం కేటాయించారు.

ఫిబ్రవరి 28వ తేదీన యూపీ తుది ఓటర్ల జాబితా విడుదల చేయనున్నారు. ముందుగా నిర్ణయించినట్లు జనవరి 1వ తేదీ నాటికి 18 ఏళ్లు నిండిన వారు.. కొత్తగా ఓటు హక్కు కోసం దరఖాస్తు చేసుకోవచ్చని ఉత్తర్‌ప్రదేశ్ రాష్ట్ర ఎన్నికల ప్రధాన అధికారి నవదీప్ రిన్వా తెలిపారు.