అమెరికాలో భారత సంతతి విద్యార్థి అరెస్ట్

ఉన్నత చదువులు చదివి.. పెద్ద పెద్ద కొలువులు చేసి అమ్మానాన్నలకు మంచి పేరు తేవాలనుకున్న ఓ భారత సంతతి విద్యార్థి.. అమెరికాలో కటకటాల పాలయ్యాడు. తనను పెంచి పెద్ద చేసిన కుటుంబ సభ్యులపైనే ఉగ్రవాద తరహా బెదిరింపులకు దిగడమే కాకుండా.. నివసిస్తున్న ఇంటికే నిప్పు పెట్టేందుకు ప్రయత్నించిన ఆరోపణలపై అరెస్ట్ అయ్యాడు. అయితే ఇతను మరెవరో కాదు.. 22 ఏళ్ల మనోజ్ సాయి లేళ్ల. ఈయన చేసిన పనికి గాను టెక్సాస్‌లోని ఫ్రిస్కో పోలీసులు అరెస్ట్ చేశారు. తెలుగు మూలాలు ఉన్నట్లు భావిస్తున్న ఈ యువకుడి ప్రవర్తన ఇప్పుడు స్థానిక ప్రవాస భారతీయుల్లో తీవ్ర కలకలం రేపుతోంది.

అసలేం జరిగిందంటే..?

యూనివర్శిటీ ఆఫ్ టెక్సాస్‌లో సీనియర్ విద్యార్థిగా చదువుతున్న మనోజ్ సాయి లేళ్ల.. గత కొంతకాలంగా మానసిక ఆరోగ్య సమస్యలతో ఇబ్బంది పడుతున్నట్లు సమాచారం. డిసెంబర్ 22 తేదీ సోమవారం రోజు అతని నివాసంలో ఒక మానసిక ఉద్రిక్తత చోటుచేసుకోవడంతో కుటుంబ సభ్యులు పోలీసులకు సమాచారం అందించారు. మనోజ్ తమను తీవ్రంగా బెదిరిస్తున్నాడని.. గత కొన్ని రోజుల క్రితమే ఇంటికి నిప్పు పెట్టేందుకు కూడా ప్రయత్నించాడని వారు పోలీసుల వద్ద వాపోయారు.

కుటుంబ సభ్యుల ఫిర్యాదు మేరకు రంగంలోకి దిగిన ఫ్రిస్కో పోలీసులు మనోజ్ సాయిని అదుపులోకి తీసుకున్నారు. అతనిపై రెండు ప్రధాన సెక్షన్ల కింద కేసులు నమోదు చేశారు. ఇంటిని ధ్వంసం చేయాలనే ఉద్దేశంతో నిప్పు పెట్టడం ఒకటి కాగా.. ఇది టెక్సాస్ చట్టాల ప్రకారం తీవ్రమైన నేరం. అలాగే దీనికి శిక్షగా 5 ఏళ్ల నుంచి 99 ఏళ్ల వరకు లేదా జీవిత ఖైదు పడే అవకాశం ఉంది. అలాగే కుటుంబ సభ్యులను భయాందోళనకు గురిచేస్తూ ఉగ్రవాద తరహా బెదిరింపులకు దిగడం.

ప్రార్థనా స్థలాలకు ముప్పు ఉందా?

అలాగే మనోజ్ సాయిపై మోపిన కేసుల్లో.. ఓ'ప్రార్థనా స్థలానికి కూడా నిప్పు పెట్టినట్లు పేర్కొన్నారు. కానీ దీనిపై పోలీసులు స్పష్టతనిస్తూ.. మనోజ్ వల్ల ఏ ప్రార్థనా స్థలానికి ముప్పు ఉన్నట్లు ఆధారాలు లేవని, చట్టపరమైన సెక్షన్ల ప్రకారం ఆ అభియోగం నమోదైందని స్పష్టం చేశారు. ప్రస్తుతం మనోజ్ కొల్లిన్ కౌంటీ జైలులో ఉన్నాడు. ఇంటికి నిప్పు పెట్టినందుకుగాను.. 1,00,000 డాలర్లు, బెదిరింపుల కేసులో 3,500 డాలర్ల చొప్పున కోర్టు బాండ్‌ మొత్తాన్ని నిర్ణయించింది.

మనోజ్ సాయి చదువులో ప్రతిభావంతుడని, గతంలో వాలంటీర్‌గా కూడా పనిచేశాడని అతని సన్నిహితులు చెబుతున్నారు. అయితే అకస్మాత్తుగా అతనిలో వచ్చిన ఈ మానసిక మార్పులు, కుటుంబంపైనే దాడులకు దిగే వరకు వెళ్లడం విచారకరం. ఈ ఘటనపై పోలీసులు మరింత లోతుగా దర్యాప్తు చేస్తున్నారు.