వెండి ధర ఢమాల్..! గంటల్లోనే రూ.21 వేల పతనం – మార్కెట్‌లో కలకలం

నూతన సంవత్సరం, సంక్రాంతి పండుగల సందర్భంగా వెండి (Silver) కొనుగోలు చేయాలని భావిస్తున్న వారికి శుభవార్త. వెండి ధర (Silver Price Decreased) ఒక్కసారిగా భారీగా తగ్గింది.గంటల వ్యవధిలోనే వెండి కిలో ధర రూ.21వేల వరకు పడిపోయింది.గత కొద్దిరోజులుగా వెండి ధరలు ఆకాశమే హద్దుగా దూసుకెళ్లి సరికొత్త రికార్డులను నమోదు చేశాయి. అయితే, మల్టీ కమొడిటీ ఎక్స్ఛేంజీలో మార్చి కాంట్రాక్ట్ వెండి ధర గంటలోనే రూ.21వేల మేర క్షీణించింది. నాన్‌స్టాప్ ర్యాలీ అనంతరం కిలో వెండి ధర రూ.2,54,174 నుంచి రూ.2,33,120కు చేరింది.రాజకీయ, భౌగోళిక పరిణామాల కారణంగా వరుసగా పెరిగిన వెండి ధరలు ఒక్కసారిగా పతనమయ్యాయి. గ్లోబల్ మార్కెట్లో ఔన్సుకు 80 డాలర్ల మార్కును దాటిన వెండి, ప్రస్తుతం 50 డాలర్ల దిగువన ట్రేడవుతోంది. గరిష్ట స్థాయిల వద్ద పెట్టుబడిదారులు లాభాల స్వీకరణకు దిగడంతో వెండి ధరలు భారీగా తగ్గాయి.వెండి ధర పతనానికి పలు కారణాలు ఉన్నాయి. రష్యా–యుక్రెయిన్ మధ్య శాంతి ఒప్పందం దిశగా కీలక పరిణామాలు చోటుచేసుకోవడంతో యుద్ధానికి ముగింపు పడుతుందనే అంచనాలు పెరిగాయి. దీని ప్రభావంగా వెండి ధరలు తగ్గాయి. అంతేకాకుండా, చికాగో మర్చంట్ ఎక్స్ఛేంజీలో అమ్మకాల ఒత్తిడి కూడా వెండి ధరలపై ప్రభావం చూపినట్లు తెలుస్తోంది.ఈ ఏడాది ఇప్పటివరకు వెండి ధర దాదాపు 181 శాతం పెరిగింది. గరిష్ట స్థాయిల వద్ద పెట్టుబడిదారులు ప్రాఫిట్ బుకింగ్‌కు దిగడమే తాజా పతనానికి మరో కారణమని అనలిస్టులు చెబుతున్నారు.ప్రస్తుత మార్కెట్ పరిస్థితులను బట్టి 2026 జనవరి నాటికి వెండి ధరలు మరింత తగ్గే అవకాశాలు ఉన్నాయని నిపుణులు అంచనా వేస్తున్నారు. వచ్చే నెలల్లో రష్యా–యుక్రెయిన్ యుద్ధానికి ముగింపు దిశగా మరిన్ని చర్చలు జరిగే అవకాశం ఉంది. అవి సఫలమైతే వెండి రేటు ఇంకా దిగొచ్చే అవకాశముందని మార్కెట్ వర్గాలు భావిస్తున్నాయి.