నిద్రలోనే 16 మంది సజీవదహనం,,,,అర్ధరాత్రి నర్సింగ్‌ హోమ్‌లో ఎగసిపడ్డ నిప్పులు

ఇండోనేషియాలో అత్యంత విషాదకర సంఘటన చోటుచేసుకుంది. సులవేసి ద్వీపంలోని మనాడో నగరంలో ఉన్న ఒక నర్సింగ్ హోమ్ భారీ అగ్నిప్రమాదానికి గురైంది. ఆదివారం రాత్రి సంభవించిన ఈ ప్రమాదంలో 16 మంది వృద్ధులు.. ప్రాణాలు కోల్పోయారు. మరో ముగ్గురు తీవ్రంగా గాయపడ్డారు. అయితే నిస్సహాయ స్థితిలో ఉన్న వృద్ధులు మంటల నుంచి తప్పించుకోలేక.. తమ గదుల్లోనే సజీవ దహనం అయినట్లు తెలుస్తోంది.

అర్ధరాత్రి వేళ మృత్యుఘోష..

నిక అధికారులు తెలిపిన వివరాల ప్రకారం.. మనాడోలోని 'వెర్ధా దమాయ్' నర్సింగ్ హోమ్‌లో ఆదివారం రాత్రి 8.31 గంటల ప్రాంతంలో ఒక్కసారిగా మంటలు చెలరేగాయి. ఆ సమయంలో వృద్ధులంతా తమ గదుల్లో నిద్రిస్తున్నారు. మంటలు క్షణాల్లోనే భవనం అంతటా వ్యాపించడంతో వారు బయటకు వచ్చే అవకాశం లేకపోయింది. అగ్నిమాపక సిబ్బంది ఘటనా స్థలానికి చేరుకుని మంటలను అదుపు చేసినప్పటికీ.. అప్పటికే 16 మంది ప్రాణాలు కోల్పోయారు. మృతదేహాలు అన్నీ వారి గదుల్లోనే పడి ఉండటం అక్కడి భీభత్సాన్ని కళ్లకు కట్టినట్లు చూపిస్తోంది.

మంటలు ఎగసి పడుతున్న సమయంలో స్థానికులు ప్రాణాలకు తెగించి కొందరు వృద్ధులను రక్షించారు. మెట్రో టీవీ ప్రసారం చేసిన విజువల్స్ ప్రకారం.. మంటలు భవనాన్ని చుట్టుముట్టగా, స్థానిక యువకులు కిటికీల గుండా లోపలికి వెళ్లి వృద్ధులను మోసుకుంటూ బయటకు తీసుకు వచ్చారు. అధికారుల సహాయంతో మొత్తం 12 మందిని సురక్షితంగా బయటకు తరలించి స్థానిక ఆసుపత్రిలో చేర్పించారు. వీరిలో ఎవరికీ గాయాలు కాలేదని అగ్నిమాపక సేవల విభాగం అధిపతి జిమ్మీ రోటిన్సులూ తెలిపారు.

దాదాపు 17 వేల ద్వీపాల సముదాయమైన ఇండోనేషియాలో ఈ మధ్యకాలంలో అగ్నిప్రమాదాలు ఆందోళన కలిగిస్తున్నాయి. ఈ నెల ప్రారంభంలోనే రాజధాని జకర్తాలోని ఒక ఏడంతస్తుల కార్యాలయంలో జరిగిన అగ్నిప్రమాదంలో 22 మంది మరణించారు. గత వారం జకర్తాలోనే మరో నివాస గృహంలో అగ్నిప్రమాదం సంభవించి ఐదుగురు ప్రాణాలు కోల్పోయారు. 2023లో ఒక నికెల్ ప్రాసెసింగ్ ప్లాంట్‌లో జరిగిన పేలుడులో 12 మంది కార్మికులు మృతి చెందారు. ప్రస్తుతం మనాడో పోలీసులు ఈ ప్రమాదానికి గల కారణాలపై దర్యాప్తు చేస్తున్నారు. షార్ట్ సర్క్యూట్ కారణంగానే మంటలు చెలరేగి ఉండవచ్చని ప్రాథమికంగా భావిస్తున్నారు. ఈ ఘటనతో ఇండోనేషియావ్యాప్తంగా విషాద ఛాయలు అలముకున్నాయి.