వైఎస్సార్ కడప జిల్లాలో దారుణ ఘటన.. ఫ్యానుకు వేలాడుతున్న తల్లిని చూపించిన కొడుకు

ఆర్థిక ఇబ్బందులు ఓ కుటుంబంలో చిచ్చు రేపాయి. క్షణికావేశంలో ఓ మహిళ తీసుకున్న కఠిన నిర్ణయం.. ఇద్దరు చిన్నారులకు అమ్మ ప్రేమను దూరం చేసింది. స్కూటీని తాకట్టు పెట్టిన విషయంలో భార్యాభర్తల మధ్య తలెత్తిన గొడవ.. చివరకు ఓ ప్రాణం పోవటానికి కారణం కాగా.. పిల్లల కళ్లెదుటే తల్లి ఫ్యానుకు ఉరి వేసుకుని బలవన్మరణానికి పాల్పడటం.. స్థానికంగా తీవ్ర కలకలం రేపింది. ఈ ఘటన కడప శివారు ప్రాంతమైన చలమారెడ్డిపల్లెలో చోటుచేసుకుంది. పోలీసులు వెల్లడించిన వివరాల ప్రకారం.. మైదుకూరు మండలానికి చెందిన మంజుల, పెండ్లిమర్రి మండలానికి చెందిన కిరణ్ కుమార్ ఆరేళ్ల కిందట ప్రేమ పెళ్లి చేసుకున్నారు.

ఈ దంపతులకు ఒక కుమారుడు. ఒక కుమార్తె ఉన్నారు. కిరణ్‌కుమార్‌ ప్రైవేట్‌ ఉద్యోగి. కడప శివారు ప్రాంతమైన చలమారెడ్డిపల్లెలో ఓ ఇల్లు అద్దెకు తీసుకుని అందులో ఈ కుటుంబం ఉంటోంది. అయితే చిరుద్యోగం కావటం.. ఆర్థిక ఇబ్బందులు ఎదురుకావటంతో కుటుంబ పోషణ భారంగా మారింది. దీంతో కిరణ్ కుమార్ స్కూటీని తాకట్టు పెట్టారు. అయితే ఈ విషయంలో కిరణ్ కుమార్, మంజుల మధ్య గొడవ జరిగింది. మంగళవారం ఉదయం కిరణ్ కుమార్ పని మీద బయటకు వెళ్లారు.

అయితే భర్త తన మాటను వినలేదన్న కోపంతో ఉన్న మంజుల.. భర్త బయటకు వెళ్లగానే ఇంట్లోని ఫ్యాన్‌కు ఉరి వేసుకుని బలవన్మరణానికి పాల్పడ్డారు. ఇద్దరు పిల్లల కళ్ల ముందే.. ఆత్మహత్య చేసుకున్నారు. తల్లి ఏం చేస్తోందో అర్థం కానీ ఆ ఇద్దరు చిన్నారులు.. అలా చూస్తూ ఉండిపోయారు. అయితే కిరణ్ కుమార్.. మంజులకు ఫోన్ చేయటంతో ఆత్మహత్య చేసుకున్న విషయం తెలిసింది. కిరణ్ కుమార్ ఫోన్ చేస్తే.. అతని కొడుకు ఫోన్ లిఫ్ట్ చేశాడు. అమ్మ ఏం చేస్తోందంటూ కిరణ్ కుమార్ ప్రశ్నించగా.. పాపం ఆ పసివాడు ఏం చెప్పాలో తెలియక, ఇంట్లో ఫ్యాన్‌కు వేలాడుతున్న మంజులను చూపించాడు. దీంతో కిరణ్ కుమార్ హుటాహుటిన అక్కడకు చేరుకున్నప్పటికీ.. జరగాల్సిన నష్టం అప్పటికే జరిగిపోయింది.

ఈ ఘటనపై సమాచారం అందుకున్న పోలీసులు అక్కడకు చేరుకున్నారు. మృతదేహాన్ని పోస్టుమార్టం కోసం తరలించి.. కేసు నమోదు చేసుకుని దర్యాప్తు ప్రారంభించారు. మరోవైపు క్షణికావేశంలో మంజుల తీసుకున్న నిర్ణయంతో.. ఆమె ఇద్దరు పిల్లలకు ఇప్పుడు తల్లి ప్రేమకు దూరమయ్యారు. అయితే పిల్లల ముందే తల్లి ఆత్మహత్య చేసుకోవడం.. ఈ విషయం వారికి అర్థం కాకపోవటం చూపరులను కలిచి వేస్తోంది.