హిమాలయాల్లో అద్భుతం.. 30 ఏళ్లకు ఒక్కసారి పూసే పువ్వు

హిమాలయ పర్వత శ్రేణుల్లో అత్యంత అరుదుగా కనిపించే ' సిక్కిం సుందరి ' పుష్పం దశాబ్దాల తర్వాత వికసించి ప్రకృతి ప్రేమికులను అబ్బురపరుస్తోంది. ఈ సిక్కిం సుందరి పువ్వును శాస్త్రీయంగా 'రుమ్ నోబిలే' అని పిలుస్తారు. ఇటీవల సోషల్ మీడియాలో ఈ సిక్కిం సుందరి పుష్పానికి సంబంధించిన ఫోటోలు, వీడియోలు వైరల్ కావడంతో దీని విశేషాలు ఇప్పుడు ప్రపంచవ్యాప్తంగా తీవ్ర చర్చనీయాంశంగా మారాయి.

సహజమైన గ్లాస్ హౌస్ పుష్పం

ఈ సిక్కిం సుందరిని 'గ్లాస్ హౌస్ ప్లాంట్' అని కూడా పిలుస్తారు. ఈ మొక్క చుట్టూ పారదర్శకమైన పొరలు ఉంటాయి. ఇవి హిమాలయాల్లోని గడ్డకట్టే చలి, గాలులు, సూర్యుడి నుంచి వచ్చే ప్రమాదకరమైన అతినీలలోహిత కిరణాల నుంచి లోపల ఉండే పువ్వులను కాపాడుతూ ఉంటాయి. ఈ పొరలు సూర్యరశ్మిని లోపలికి పంపించి.. ఒక గ్రీన్‌హౌస్‌లా పనిచేస్తూ లోపల వేడిని నిలిపి ఉంచుతాయి. దీనివల్ల అతిశీతల వాతావరణంలోనూ ఈ సిక్కిం సుందరి మొక్క మనుగడ సాగిస్తుంది.

దశాబ్దాల నిరీక్షణ.. ఒక్కసారే వికసిస్తుంది!

ఈ మొక్క జీవితచక్రం చాలా వింతగా ఉంటుంది. ఇది 'మోనోకార్పిక్' రకానికి చెందిన మొక్క. ఇది సుమారు 7 ఏళ్ల నుంచి 30 ఏళ్ల వరకు కేవలం ఆకులతో నేలకు హత్తుకుని పెరుగుతూ శక్తిని కూడగట్టుకుంటుంది. దశాబ్దాల నిరీక్షణ తర్వాత ఒక్కసారి మాత్రమే ఇది సుమారు 2 మీటర్ల ఎత్తు వరకు పెరిగి.. అద్భుతమైన గోపురం ఆకారంలో పూలను పూయిస్తుంది. విత్తనాలను వెదజల్లిన వెంటనే ఈ మొక్క మరణిస్తుంది.

ఈ సిక్కిం సుందరి కేవలం తూర్పు హిమాలయాల్లో.. మరీ ముఖ్యంగా సిక్కిం, నేపాల్, భూటాన్, టిబెట్ ప్రాంతాల్లో కనిపిస్తుంది. అందుకే ఈ మొక్కను సిక్కిం సుందరి అని పిలుస్తారు. సముద్ర మట్టానికి 4 వేల నుంచి 4,800 మీటర్ల ఎత్తులో.. గాలి పల్చగా ఉండే కఠినమైన పర్వత ప్రాంతాల్లో మాత్రమే ఈ సిక్కిం సుందరి మొక్క పెరుగుతుంది.

సిక్కిం సుందరి ప్రాముఖ్యత

ఇక ఈ సిక్కిం సుందరి మొక్కలో అనేక ఔషధ గుణాలు ఉంటాయి. స్థానిక తెగలు దీని వేర్లను సాంప్రదాయ టిబెటన్ వైద్యంలో ఉపయోగిస్తారు. దీని కాండం నుంచి వచ్చే ద్రవాన్ని దాహం తీర్చుకోవడానికి కూడా వాడుతుంటారు. ఇటీవల బిజినెస్‌మెన్, మహీంద్రా అండ్ మహీంద్రా గ్రూప్ ఛైర్మన్ ఆనంద్ మహీంద్రా ఈ సిక్కిం సుందరి పువ్వును 'మాస్టర్‌క్లాస్ ఇన్ పేషెన్స్' (ఓర్పుకు నిదర్శనం) అని వర్ణిస్తూ చేసిన పోస్ట్ సోషల్ మీడియాలో సెన్సేషన్ సృష్టించింది.