మోదీకి 108 గుర్రాలతో కాన్వాయ్‌,,,,,సోమనాథ్‌లో శౌర్య యాత్ర

గుజరాత్‌లోని పవిత్ర సోమనాథ్ క్షేత్రంలో ఆదివారం శౌర్య యాత్ర నిర్వహించారు. సోమనాథ్ స్వాభిమాన్ పర్వ్‌ పేరుతో నిర్వహించిన ఈ యాత్రలో ప్రధానమంత్రి నరేంద్ర మోదీ పాల్గొన్నారు. సోమనాథ్ ఆలయంపై జరిగిన దాడులను ఎదుర్కొని.. ప్రాణాలర్పించిన వీరులను స్మరించుకోవడంలో భాగంగా ఈ కార్యక్రమాన్ని నిర్వహించారు. ఈ యాత్రలో 108 శిక్షణ పొందిన గుర్రాలు.. ప్రధాని మోదీ కాన్వాయ్‌కు రక్షణగా సాగడం ప్రత్యేక ఆకర్షణగా నిలిచింది. శివ భక్తుల డమరుక నాదాల మధ్య ప్రధాని నరేంద్ర మోదీ స్వయంగా తన రెండు చేతులతో డమరుకాన్ని వాయిస్తూ అక్కడికి వచ్చిన భక్తజనసందోహాన్ని ఉత్సాహపరిచారు.

సోమనాథ్ రక్షణలో ప్రాణత్యాగం చేసిన వీర హమిర్జీ గోహిల్ విగ్రహానికి ప్రధాని మోదీ పూలమాల వేసి నివాళులు అర్పించారు. క్రీస్తుశకం 1026లో మహమ్మద్ గజనీ సోమనాథ్ ఆలయంపై జరిపిన మొదటి దాడికి 1000 ఏళ్లు పూర్తి అయిన సందర్భంగా ఈ సోమనాథ్ స్వాభిమాన్ పర్వ్ నిర్వహిస్తున్నారు. భారతదేశానికి స్వాతంత్ర్యం వచ్చిన తర్వాత సర్దార్ వల్లభాయ్ పటేల్ చొరవతో పునర్నిర్మించిన ఈ సోమనాథ్ ఆలయం తిరిగి 1951లో ప్రారంభమైంది. ఆ పునఃప్రతిష్ఠాపన జరిగి 75 ఏళ్లు పూర్తి అయిన సందర్భాన్ని కూడా ఈ వేడుక ప్రతిబింబిస్తోంది.

ప్రధాని మోదీ మొత్తం 3 రోజుల పర్యటనలో భాగంగా గుజరాత్ చేరుకోగా.. ఈ ఉదయం శౌర్యయాత్రలో పాల్గొన్నారు. సోమనాథ్‌ స్వాభిమాన్ పర్వ్‌లో భాగంగా నిర్వహించిన సాంస్కృతిక కార్యక్రమాలు అందర్నీ కట్టిపడేశాయి. ఈ యాత్రలో భారీగా పాల్గొన్న ప్రజలు.. మోదీ, మోదీ నినాదాలతో హోరెత్తించారు. ప్రధాని మోదీ ఆలయం వద్దకు వెళ్తుండగా.. ఆ 108 గుర్రాలు ఎస్కార్ట్‌గా వెళ్లడం అందర్నీ మంత్రముగ్దుల్ని చేసింది. ఆ తర్వాత సోమ్‌నాథ్‌ ఆలయానికి చేరుకున్న ప్రధాని మోదీ.. ప్రత్యేక పూజలు నిర్వహించారు.

ప్రధాని పర్యటన వివరాలు

సోమనాథ్ పర్యటన తర్వాత ప్రధాని మోదీ.. గుజరాత్‌ రాష్ట్రంలో పలు అభివృద్ధి కార్యక్రమాల్లో పాల్గొన్నారు. మధ్యాహ్నం రాజ్‌కోట్‌లోని మార్వాడి యూనివర్సిటీలో వైబ్రెంట్ గుజరాత్ రీజనల్ కాన్ఫరెన్స్ (కచ్, సౌరాష్ట్ర) ప్రారంభించి.. ట్రేడ్ షోను సందర్శించారు. సాయంత్రం గాంధీనగర్ - అహ్మదాబాద్ మెట్రో రెండో దశ (సెక్టార్ 10ఏ నుంచి మహాత్మా మందిర్ వరకు) మార్గాన్ని ప్రారంభించనున్నారు. సోమవారం రోజున అహ్మదాబాద్‌లో జర్మనీ ఛాన్సలర్ ఫ్రెడరిక్ మెర్జ్‌తో ప్రధాని మోదీ ద్వైపాక్షిక చర్చలు జరపనున్నారు.