టీవీకే విజయ్‌తో కాంగ్రెస్ పొత్తు! రాహుల్ గాంధీ హింట్

ప్రముఖ తమిళ నటుడు, టీవీకే పార్టీ అధినేత విజయ్‌ నటిస్తున్న చివరి సినిమా ‘జననాయగన్‌’. విడుదల నేపథ్యంలో ఈ సినిమా వివాదాల్లో చిక్కుకుంది. ఈ చిత్రం కంటెంట్‌పై అభ్యంతరాలు వ్యక్తమయ్యాయి. దీంతో ఈ వివాదం మద్రాసు హైకోర్టుకు చేరింది. అయితే జననాయగన్‌ విడుదలపై నెలకొన్న వివాదంపై తాజాగా కాంగ్రెస్‌ అగ్రనేత రాహుల్ గాంధీ స్పందించారు. ఈ సినిమాను కేంద్ర ప్రభుత్వం అడ్డుకుంటోందని ఆరోపించారు. తమిళ సంప్రదాయాలపై బీజేపీ సర్కార్ దాడి చేస్తోందని మండిపడ్డారు. కాంగ్రెస్ అగ్రనాయకుడు అనూహ్యంగా టీవీకే విజయ్‌కు మద్దతు తెలపడంపై సర్వత్రా చర్చ జరుగుతోంది. 2026 తమిళనాడు ఎన్నికల నేపథ్యంలో టీవీకేతో పొత్తుకు కాంగ్రెస్‌కు ప్రయత్నిస్తోందా అనే సందేహాలు కూడా మొదలయ్యాయి. దీనిపై రాహుల్ గాంధీ ఇండైరెక్ట్‌గా హింట్ ఇచ్చారా? అనే అనుమానాలు వ్యక్తమవుతున్నాయి.

జననాయగన్‌ సినిమా గురించిన మాట్లాడిన రాహుల్ గాంధీ.. విజయ్‌ సినిమా విడుదల కాకుండా కేంద్ర సమాచార, ప్రసార మంత్రిత్వ శాఖ అడ్డుకుంటోందని ఆరోపించారు. అధికారంతో తమిళ ప్రజల గొంతును నొక్కాలని ప్రధాని మోదీ ప్రయత్నిస్తున్నారన్నారు. అయితే అది ఎప్పటికీ సాధ్యం కాదని రాహుల్ అన్నారు. రాహుల్ గాంధీ చేసిన ఈ వ్యాఖ్యలు తమిళనాడులో కాంగ్రెస్ అనుసరించాల్సిన వ్యూహంపై కొత్త చర్చకు దారితీశాయి.

సొంత పార్టీలోనే..!

ఈ నేపథ్యంలో టీవీకేతో సంబంధాలను ఏర్పరచుకునే విషయంపై రాష్ట్ర కాంగ్రెస్ ఆలోచించాలని పార్టీలో ఒక వర్గం భావిస్తున్నట్లు తెలుస్తోంది. ముఖ్యంగా యువత, మొదటిసారి ఓటు వేసేవారిలో విజయ్‌కు ఉన్న పాపులారిటీ.. తమిళనాడులో కాంగ్రెస్‌కు కలిసివస్తుందని వారు భావిస్తున్నట్లు సమాచారం. అంతేకాకుండా విజయ్, రాహుల్ గాంధీ ఇద్దరూ ప్రచారాలు నిర్వహిస్తే.. క్షేత్రస్థాయిలో ప్రజలతో బలంగా కనెక్ట్ కావచ్చని, తద్వారా రాష్ట్రంలో రాజకీయ వాతావరణాన్ని మార్చవచ్చని వారు అనుకుంటున్నారు.

రాష్ట్ర కాంగ్రెస్‌లో ఇది ఒక వర్గం అభిప్రాయం మాత్రమే అని తెలుస్తోంది. చాలా మంది సీనియర్ నాయకుల అభిప్రాయం ప్రకారం.. తమిళనాడులో కాంగ్రెస్.. డీఎంకేతో ఉన్న తన దీర్ఘకాలిక పొత్తుకు కట్టుబడి ఉండాలని భావిస్తున్నారు. డీఎంకేతో భాగస్వామ్యం అనేక సంవత్సరాలుగా స్థిరంగా ఉందని, రాష్ట్రంలో పార్టీకి ప్రాముఖ్యత, రాజకీయ ప్రయోజనాలను తీసుకువచ్చిందని వారు అంటున్నారు. ఇక టీవీకేతో కొత్త కూటమిని ఏర్పాటు చేయడానికి ప్రయత్నించడం.. ప్రారంభంలో ఎంత ఉత్సాహంగా ఉన్నా.. దాని వెంటే ప్రమాదం కూడా పొంచి ఉందంటున్నారు. డీఎంకేకు దూరం కావడానికి బదులుగా..పొత్తులోనే బలమైన పాత్ర కోసం చర్చలు జరపాలని వారు వాదిస్తున్నట్లు తెలుస్తోంది.