పండుగ వేళ ఒక్కటైన లాలూ కుమారులు

రాజకీయ విభేదాలు, వ్యక్తిగత మనస్పర్థలను పక్కనపెట్టి.. రక్తసంబంధాన్ని మళ్లీ చిగురింపజేశారు లాలూ యాదవ్ కుమారులు. ముఖ్యంగా బీహార్ మాజీ ముఖ్యమంత్రి రబ్రీ దేవీ నివాసమైన '10 సర్క్యులర్ రోడ్' మంగళవారం ఒక భావోద్వేగ సన్నివేశానికి వేదికైంది. గత కొంతకాలంగా కుటుంబానికి దూరంగా ఉంటున్న పెద్ద కుమారుడు, ఆర్జేడీ నేత తేజ్ ప్రతాప్ యాదవ్.. తన తల్లిదండ్రులు, తమ్ముడు తేజస్వి యాదవ్‌ను కలుసుకున్నారు. నేరుగా ఆయనే వెళ్లి మరీ తన కుటుంబ సభ్యులను కలిసి ఆప్యాయంగా పలకరించారు. పలు సమస్యల వల్ల దూరంగా ఉంటున్న తాము.. పండుగ రోజైన మకర సంక్రాంతి నాడైనా సరదాగా కలిసి సంబురాలు చేసుకుందామని చెప్పారు. బుధవారం రోజు తాను ఏర్పాటు చేసిన 'దహీ-చూరా' (పెరుగు-అటుకులు) విందుకు కుటుంబం మొత్తం రావాలని కోరారు.

చాలా కాలం తర్వాత తేజ్ ప్రతాప్ తన తమ్ముడు, బీహార్ అసెంబ్లీ ప్రతిపక్ష నేత తేజస్వి యాదవ్‌తో ఎంతో ఆప్యాయంగా గడపడం అందరినీ ఆకట్టుకుంది. స్వయంగా తన సోదరుడికి ఆహ్వాన పత్రికను అందజేసిన తేజ్ ప్రతాప్.. ఇది కేవలం పండగ విందు మాత్రమే కాదు, తమ మధ్య ఉన్న సోదరభావానికి ప్రతీక అని చాటిచెప్పారు. లోపలికి రాగానే తండ్రి లాలు ప్రసాద్, తల్లి రబ్రీ దేవీల పాదాలకు నమస్కరించి వారి ఆశీస్సులు తీసుకున్నారు. మీడియా ముందు చాలా కాలం తర్వాత అన్నదమ్ములిద్దరూ చిరునవ్వుతో కనిపించడంతో అంతా హర్షం వ్యక్తం చేస్తున్నారు.

చిన్నారి కాత్యాయినితో క్యూట్ మోమెంట్

ఈ భేటీలో అన్నింటికంటే ఆకర్షణీయమైన అంశం.. తేజస్వి యాదవ్ కుమార్తె కాత్యాయినిని తేజ్ ప్రతాప్ ఎత్తుకుని ముద్దాడటం అందరినీ ఆకట్టుకుంది. అయితే ఇందుకు సంబంధించిన ఫొటోలను తేజ్ ప్రతాప్ యాదవే నేరుగా తన ఎక్స్ ఖాతా వేదికగా పంచుకున్నారు. పండుగ సందర్భంగా తల్లిదండ్రులతో పాటు తమ్ముడిని తన ఇంటికి ఆహ్వానించినట్లు చెప్పారు. ఇలా చాలా కాలం తర్వాత కుటుంబం మొత్తం ఒక్కచోట కనిపించడంతో.. ఫొటోలు క్షణాల్లోనే వైరల్ అయ్యాయి. ముఖ్యంగా ఈ ఫొటోలు చూసిన లాలూ అభిమానులు అందరూ.. "మా దళపతి కుటుంబం ఒక్కటైంది" అంటూ కామెంట్లు చేస్తున్నారు.

లాలు కుటుంబంలో చీలికలు వచ్చాయని, అన్నదమ్ముల మధ్య పచ్చగడ్డి వేస్తే భగ్గుమంటుందని విమర్శలు చేస్తున్న విపక్షాలకు ఈ భేటీ గట్టి సమాధానం ఇచ్చింది. బుధవారం జరగబోయే 'దహీ-చూరా' విందు ఇప్పుడు కేవలం విందుగానే కాకుండా.. యాదవ కుటుంబం యొక్క ఐక్యతను చాటే వేదికగా మారనుంది. ఈ విందులో తేజస్వి యాదవ్, ఇతర కుటుంబ సభ్యులు పాల్గొంటారా లేదా అనేది ఇప్పుడు ఆసక్తికరంగా మారింది. మొత్తానికి మకర సంక్రాంతి వేళ లాలు ప్రసాద్ యాదవ్ కుటుంబంలో రాజకీయ వేడి తగ్గి, ప్రేమాభిమానాలు వెల్లివిరియడం బీహార్ పాలిటిక్స్‌లో సరికొత్త చర్చకు దారితీసింది.