తిరుమల అపవిత్రతపై పవన్ నిప్పులు.. వైసీపీ నేతలు మోకరిల్లి క్షమాపణ చెప్పాల్సిందే!

తిరుమల శ్రీవారి లడ్డూ ప్రసాదంలో జంతువుల కొవ్వు కలిసిందన్న అంశం అత్యంత సున్నితమైనదని, దీనిపై వైసీపీ నేతలు బేషరతుగా క్షమాపణలు చెప్పాలని డిప్యూటీ సీఎం పవన్ కళ్యాణ్ డిమాండ్ చేశారు. ఎక్కడా ఏ నివేదికలోనూ వైసీపీ ప్రభుత్వానికి క్లీన్ చిట్ రాలేదని ఆయన స్పష్టం చేశారు. కలియుగ దైవం వేంకటేశ్వరుడి సన్నిధిలో మోకరిల్లి తప్పు ఒప్పుకోవాలని, అప్పుడే వారికి ప్రాయశ్చిత్తం జరుగుతుందని పవన్ కళ్యాణ్ ఘాటుగా వ్యాఖ్యానించారు.
గత ప్రభుత్వ హయాంలో 2022లోనే నెయ్యి కల్తీకి సంబంధించిన నివేదికలు వచ్చినా, వాటిని కావాలనే తొక్కిపెట్టారని పవన్ కళ్యాణ్ ఆరోపించారు. అధికారులకు మరియు పాలకులకు అన్నీ తెలిసే ఈ అపవిత్ర కార్యానికి పాల్పడ్డారని ఆయన విమర్శించారు. తిరుమల పవిత్రతను కాపాడటంలో గత పాలకులు ఘోరంగా విఫలమయ్యారని, హిందువుల మనోభావాలను దెబ్బతీసే విధంగా వ్యవహరించడం క్షమించరాని నేరమని ఆయన ఆగ్రహం వ్యక్తం చేశారు.
వైసీపీ పార్టీ ధోరణి ఆది నుంచీ తిరుమల పట్ల అగౌరవంగానే ఉందని, "ఏడు కొండల దేవాలయానికి రెండు కొండలు చాలు" అనే ఆలోచనా విధానం నుంచి వచ్చిన పార్టీ ఇదని పవన్ విమర్శించారు. సనాతన ధర్మం పట్ల వారికి కనీస గౌరవం లేదని, ప్రతి విషయంలోనూ రాజకీయ లబ్ధి కోసమే పాకులాడుతున్నారని మండిపడ్డారు. తిరుమలకు ఉన్న విశిష్టతను మరియు ఆధ్యాత్మిక ప్రాధాన్యతను తగ్గించేలా గత పాలన సాగిందని ఆయన ఆవేదన వ్యక్తం చేశారు.
గతంలో అంతర్వేదిలో రథం కాలిపోయినప్పుడు ఒక పిచ్చోడు చేశాడని చెప్పి కేసును నీరుగార్చారని, ఇప్పుడు లడ్డూ వివాదంలోనూ అదే తరహాలో తప్పించుకోవాలని చూస్తున్నారని పవన్ విమర్శించారు. ఇలాంటి ఘటనలను చూసీచూడనట్లు వదిలేయడం వల్లనే వ్యవస్థలు భ్రష్టుపట్టాయని ఆయన పేర్కొన్నారు. ఇప్పటికైనా తప్పును అంగీకరించి భక్తుల క్షమాపణ కోరాలని, లేనిపక్షంలో ప్రజలే తగిన బుద్ధి చెబుతారని హెచ్చరించారు.