రష్యన్ భార్యను వేదిస్తున్న భారతీయ భర్త,,,,స్వదేశానికి వెళ్లలేక, ఇక్కడ ఉండలేక నరకం

ఉన్నత చదువుల కోసం దేశాన్ని వదిలి వచ్చేసింది. పీహెచ్‌డీ పట్టా పుచ్చుకోవాలని చాలానే ప్రయత్నాలు చేసింది. కానీ ప్రేమ అనే మాయలో పడిన ఆమె జీవితాన్నే కోల్పోయింది. ముఖ్యంగా ప్రేమించాడని నమ్మి పెళ్లాడితే.. భర్తే ఆమె కొంపముంచాడు. అతడిని వదిలేసి కన్నవాళ్ల కోసం స్వదేశానికి వెళ్లాలనుకున్నా .. వెళ్లనీయకుండా నరకం చూపిస్తున్నాడు. రష్యాకు చెందిన ఓల్గా అనే మహిళ ఎదుర్కొంటున్న ఈ సమస్య.. ఇప్పుడు దేశ రాజధానిలో చర్చనీయాంశంగా మారింది.

ప్రేమలో పడింది ఇలా..

రష్యాకు చెందిన ఓల్గా 2015లో జవహర్‌లాల్ నెహ్రూ యూనివర్సిటీ (జేఎన్‌యూ)లో పీహెచ్‌డీ చేసేందుకు భారత్‌కు వచ్చింది. అయితే అంతకు ముందే అంటే 2014లోనే ఒక భారతీయ యువకుడితో ఆమెకు పరిచయం ఏర్పడింది. ఆ పరిచయం కాస్తా ప్రేమగా మారింది. ఇక ఆమె ఇండియా వచ్చిన తర్వాత వీరిద్దరూ చెట్టాపట్టాలేసుకుని తిరిగారు. 2019లో ఇద్దరూ వివాహం కూడా చేసుకున్నారు. కొన్నేళ్లపాటు వీరి సంసారం బాగానే సాగింది. కానీ 2023 నవంబర్ నుంచి వీరిద్దరి మధ్య గొడవలు మొదలయ్యాయి.

వారణాసిలో సాధువుగా కనిపించి..

ముఖ్యంగా భర్తతో పాటు ఇక్కడే హాయిగా జీవించాలని నిర్ణయించుకున్న ఓల్గా తన స్పౌస్ వీసా కోసం దరఖాస్తు చేసుకుంది. అయితే ఇంటర్వ్యూకు వెళ్లే రోజు భర్త అకస్మాత్తుగా మాయం అయ్యాడు. దీంతో అతడికి ఏమైపోయిందో అని భయపడ్డ ఓల్గా.. పోలీసులకు ఫిర్యాదు చేసింది. కేసు నమోదు చేసుకుని పోలీసులు దర్యాప్తు చేయగా.. విస్తుపోయే విషయాలు వెలుగులోకి వచ్చాయి. ముఖ్యంగా ఓల్గా భర్త వారణాసి వీధుల్లో సాధువు వేషంలో తిరుగుతూ కనిపించాడు. ఇందుకు సంబంధించిన వీడియోను సైతం పోలీసులు ఓల్గాకు చూపించగా.. ఆమె షాక్‌కు గురైంది. వెంటనే అక్కడకు వెళ్లి భర్తను ప్రశ్నించింది. భార్యకు అతడు దొరికిపోవడంతో.. క్షమించమంటూ ప్రాధేయపడ్డాడు. భర్తే కదా అని క్షమించి ఓల్గా రెండో అవకాశం ఇచ్చింది.

హిమాచల్‌లో అక్రమ సంబంధం

అప్పటికైనా మారీ భార్యను సంతోషంగా చూసుకుంటూ జీవితాన్ని హాయిగా గడపాల్సిన అతడు.. మళ్లీ తన వంకర బుద్ధిని చూపించాడు. హిమాచల్ ప్రదేశ్‌లో ఓల్గా సంపాదన పైనే బతుకుతూ.. మరో మహిళతో సహజీవనం చేస్తూ మళ్లీ వెన్నుపోటు పొడిచాడు. ఈ విషయం తెలుసుకున్న ఓల్గా.. వరుస ద్రోహాలను భరించలేక తన స్వదేశానికి వెళ్లిపోవాలనుకుంది. తన తల్లిదండ్రులతోనే కలిసి జీవించానుకుంది. కానీ అక్కడే మరో కుట్రకు తెరలేపాడు ఆమె భర్త. ఆమెపై తప్పుడు మిస్సింగ్ కేసు పెట్టడంతో ఎయిర్‌పోర్టులో అధికారులు ఆమెను విమానం ఎక్కనివ్వలేదు. దీంతో చేసేదేమీ లేక ఓల్గా మళ్లీ ఇంటికి వచ్చింది.

చేతిలో చిల్లి గవ్వ లేక భర్తను నమ్మి మోసపోయినందుకు గుండెలవిసేలా రోదిస్తోంది. ముఖ్యంగా వీసా గడువు కూడా ముగిసిపోవడంతో నరకం చూస్తోంది. ప్రేమించిన పాపానికి అటు స్వదేశానికి వెళ్లలేక, ఇటు భారత్‌లో ఉండలేక చుక్కలు చూస్తోంది. తనను మోసం చేసిన వ్యక్తిపై కఠిన చర్యలు తీసుకోవాలని కోరుకుంటూనే.. తనను ఎలాగైనా రష్యాకు పంపించమని వేడుకుంటోంది.