డీఎంకేతో విజయ్‌కాంత్ పార్టీ పొత్తు,,,సీట్ల సర్దుబాటు, అభ్యర్థుల ఎంపికపై కమిటీ ఏర్పాటు

మరి కొద్ది వారాల్లో అసెంబ్లీ ఎన్నికలు జరగనున్న తమిళనాడులో రాజకీయాలు సమీకరణాలు శరవేగంగా మారుతున్నాయి. తాజాగా, అధికార డీఎంకే కూటమిలోకి కొత్త పార్టీ వచ్చి చేరింది. కెప్టెన్ విజయ్‌కాంత్ పార్డీ దేశీయ ముర్పోక్కు ద్రావిడ కజగం (డీఎండీకే)... డీఎంకేతో జతకట్టింది. ఆ పార్టీ అధ్యక్షురాలు, దివంగత విజయ్ కాంత్ భార్య ప్రేమలత.. ముఖ్యమంత్రి ఎంకే స్టాలిన్‌ను గురువారం కలుసుకున్నారు. చెన్నైలోని డీఎంకే ప్రధాన కార్యాలయం ‘అన్నా అరివాల్యమ్‌’కి తన సోదరుడు ఎల్కే సుధీష్‌తో కలిసి ప్రేమలత విజయ్‌కాంత్ వచ్చారు. సీఎం ఎంకే స్టాలిన్, ఉప-ముఖ్యమంత్రి ఉదయనిధి స్ఠాలిన్, డీఎంకే పార్లమెంటరీ పార్టీ నేత కనిమొళి, సీనియర్ మంత్రి కేఎన్ నెహ్రూలు.. ప్రేమలతను సాదరంగా ఆహ్వానించారు.

ఇన్నాళ్లు పొత్తులపై అడుగుతున్న ప్రశ్నలకు ఇదే తన సమాధానమని, తమ కూటమి ఖరారైందని మీడియాకు ప్రేమలత వెల్లడించారు. జిల్లా కార్యదర్శులు, క్యేడర్ అభిప్రాయాలకు అనుగుణంగానే డీఎంకే కూటమిలో చేరినట్టు ఆమె తెలిపారు. ‘మా నాయకుడు కెప్టెన్ (విజయ్‌కాంత్) 2016లోనే డీఎంకేతో పొత్తుకు ప్రయత్నించారు.. కరుణానిధి సైతం ఇదే కోరుకున్నారు. కెప్టెన్ ఇప్పుడు మన మధ్య లేకపోయినా.. పదేళ్ల తర్వాత ఆయన కోరిక నెరవేరింది’ అని డీఎండీకే జనరల్ సెక్రెటరీ అన్నారు.

తొలిసారి డీఎండీకే, డీఎంకే పొత్తు పెట్టుకున్నాయని, ఇరు పార్టీల నాయకులు, కార్యకర్తలు దీనిని స్వాగతిస్తున్నారని ఆమె చెప్పారు. వచ్చే ఎన్నికల్లో తమ కూటమి 200కిపైగా స్థానాల్లో విజయం సాధిస్తుందని జోస్యం చెప్పారు. అయితే, తమ పార్టీ ఎన్ని స్థానాల్లో పోటీచేస్తుందనే ప్రశ్నకు మాత్రం ఆమె సమాధానం ఇవ్వలేదు. అలాగే, ఆమె రాజ్యసభకు వెళ్తారా? ఎన్నికల్లో పోటీచేస్తారా? అనేదానికి సమాధానం దాటవేశారు. సీట్ల సర్దుబాటు, అభ్యర్థుల ఎంపిక కోసం కమిటీ వేసి చర్చిస్తామని, తుది నిర్ణయం ముఖ్యమంత్రి ఎంకే స్టాలిన్ ప్రకటిస్తారని ప్రేమలత చెప్పారు.

అలాగే, అన్నాడీఎంకే-బీజేపీ కూటమిలో చేరనున్నట్టు వచ్చిన నివేదికలపై కూడా ప్రేమలత స్పందించారు. ఎన్డీఏ కూటమిలో చేరుతామనే జరిగిన ప్రచారంలో నిజం లేదని, ఇదంతా యూట్యూబర్లు, శాటిలైట్ ఛానెల్స్‌లు తమ టీఆర్పీలు పెంచుకోడానికి చేసిన ప్రచారమని తిప్పికొట్టారు. ఇక, డీఎండీకేతో పొత్తులపై సీఎం స్టాలిన్ ఎక్స్( ట్విట్టర్)లో వెల్లడించారు. ‘కరుణానిధితో అపారమైన అనుబంధం ఉన్న విజయ్‌కాంత్ ఏర్పాటుచేసిన డీఎండీకే తమతో కలిసినందుకు చాలా సంతోషంగా ఉంది’ అని అన్నారు.